Luahsuk mawhna’ sukkhakloh Jesuh suah lungdamna

Luahsuk mawhna’ sukkhakloh Jesuh suah lungdamna

(Rom. 5: 12-19; 1Cor. 15: 22; 45-49) – Luahsuk Mawhna pen Guilt kici hi. Guilt pen Luahsuk mawhna hi. Pianpih Mawhna pen Corruption kici hi. Corruption pen Pianpih mawhna kici hi. Topa Jesuh pen luahsuk mawhna tawh a kipelh theih nadingin Mary pen mawhnei lo Nu a suah kul hi, a ci pawl om hi. Luahsuk mawhna le pianpih mawhna a khen thei lote in mawhna pen Adam’ tungtawnin AIDS danin kilawh suk hi, ci uh hi. Ci le sa le sisan tawh kilawh danin mu uh hi. Hihte gel kikal ah thulimci khat ih gen nuam hi.

AIDS kilawh bangin luahsuk mawhna kilawh mawk leh Mary tungtawnin Jesuh zong mawhna in lawh thei ding hi. Banghang hiam cih leh Mary mahmah in zong Jesuh pen ka si le ka sa tawh ka paai, ci-in na gen veve hi. Naubu sungah Jesuh pen Mary sisan tawh kituam hi.

Tua ahih manin AIDS kilawh bangin si le sa tawh kilawh thei hi leh Jesuh zong mawhna in a suk khak loh phamawh ding hi. Tua ahih manin luahsuk mawhna pen Tangmi (federal headship) tungtawnin kilawh hi, cih ka gen nuam hi. “Federal” cih pen gam ki-ukna a hoih theih nadingin zong a kideih mahmah kammal khat ahi hi.

Mawhna tawh kisai ah Adam pen mihingte adingin a hoih pen Tangmi na hi khin zo hi. Tua mah bangin Dikna tawh kisai ah zong Jesuh pen a nunung pen Tangmi ahi hi. Tua tangmi tungtawna ih luahsuk mawhna (guilt) pen ih pianpih mawhna (corruption) ong suak ta hi. Bangci bangin kiluah hiam cih leh Tangmi pa’ tungtawnin kiluah a, bangci bangin kipianpih hiam cih leh ih zanni, ih tuni, ih zing ciang mawhnate tawh a kipian pih hong suak ta hi.

Adam in singgah a nek pen na nekpih lian loh hangin, nang zong Adam hi lecin, Adam mah a bang lian ding na hihna zia tawh a ne khawm a mawh khawm mah ih suak hi. David in ka nu’ sung pan a mawhsa in ka piang hi, na ci hi. Adam pen kicin zawhlohna le mawhna tawh kisai ah ih tangmi taktak ahihna a beisa pan na mawhna, tulaitak na paubanna le zingciang zong a mawh a paubang ding na hihna ah kilang pha mahmah hi. Tua ahih manin hotkhiatna bucing ih cih pen zanni pan, tuni pan, zing ciang pan ahi hi. Salvation is from the Past, Salvation is from the Present, and Salvation is from the Future.

Ci le sa sisante pen mawhna hi lo hi. Mawhna ih cih pen a kilawng thei hi lo hi. A kimu thei hi lo hi. Sisan sungah mawhna om ahih manin zatui sun ni, kici thei lo hi. Mawhna koilai ah om hiam ci-in kizong thei lo a, mawhna pen a kibawlna bekah a gah in kimu thei bek hi. Hih hi ei mawhna! ci-in khut tawh kitawi thei lo hi.

Mawhna ih cih pen Tangmi tungtawn zia khat tawh a kiluah hi a, tua ih luah pen a zia khat tungtawnin a kilawh suk leuleu na hi a, sisan sung, thagui sung, guh sung tang sungah mawhna a om hi lo hi. Mawhna adingin zatui zaha om lo hi. Mawhna tawh kisai dam nading Jesuh’ sisan bek om hi. A mi mudah ding hi lo a, a mawhna mudah ding ahi hi. Mawhna ih hi kei a, mimawh ih hi bek hi.

Tua ahih manin, numei khempeuh lakah a siangtho pha pen Mary hi mah ta leh Mary zong luahsuk mawhna tawh kipeng thei lo hi. Ahi zongin Mary’ sisan pen mawhna na hi pah lo ahih manin tua sisan tawh naubu sunga kituam Jesuh pen tua luahsuk mawhna zia in lawh thei lo hi.

Mary pen mawhna hi loin mimawh nu ahi hi. Sisan tungtawn in AIDS bangin mawhna kilawh lo hi. Mawhna pen mimawh ih hihna tungtawnin kilawh bek hi. Mary pen mimawh ahih hangin a sisan pen mawhna hi lo ahih manin Jesuh Khrih a paaina le a suah khiatna ah bangmah pauban nading om lo hi.

Tua banah Kha Siangtho’ gai sak nasep hi sawnsawn lai hi. Banghang hiam cih leh Adam pen Jesuh’ adingin Tangmi na hi lo a, Jesuh pen Adam’ suan le khak tampi takte’ tangmi ong suah theih nadingin Mary naubu Pasian in a teelna ah Mary in zong lamdang sa a, ka Honpa (God my Savior) na ci hi (Luke 1:46-47). Tua tangmi Jesuh’ tungtawn in Dikna pen upna tawh ih ngah thei ta hi.

Luahsuk mawhna ih cih pen sisan tawh kilawh thei lo hi. Beh le phung le minam tungtawnin kilawh thei lo hi. Luahsuk mawhna pen Tangmi tungtawn in kilawh hi. Tangmi tungtawn in kiluah suka, christmaszomiluahsuk tungtawnin kipianpih ahihna ih pianpih mawhna in hong lak hi. Adam mawh sak theih tuam om nawn lo hi. Nangma mawhna keima mawhna hi ta hi.

Adam tawh ih mawhna hi ta hi. Adam pen tangmi dingin na san leh mimawh pa hi mah ing ei na ci thei pan ding hi. Mimawh pa/nu za ah za na hih lam na ki-up ciangin gupkhiatna na ngah nading kal masa a suan pan na hihi. Tua bangin Adam tangmi dingin sanna in kitelna hi a, tua ciangin a dang tangMi khat na kisap lam na phawk thei pan ding hi. Tua pan pen nang le kei bangin Luahsuk mawhna in sukha lo hi.

Luahsuk mawhna’ suk khak theih loh Jesuh suah Lungdamna thupha nang le na innkuan tungah a thakin ong tungta hen!!! Luahsuk mawhna pen Adam tungtawn hi a, luahtoh dikna pen Khrih tungtawn ahi hi (Rom. 5: 12-19; 1Cor. 15: 22; 45-49). Adam – Federal headship / Representative – Guilt – Corruption. Adam pen Tangmi, mihingte in luah suk, kipian pih, mawhna suak, mawhneite. Khrih pen Tangmi, mawhneite’ Diktanna, diktang mite kigumkhia. Christ – Federal headship or Representative – Justification – Sanctification. Not by way of infusion but by imputation. Evan. Suang Dal