Life insurance – Luangkhaam na nei hiam?

Life insurance – Luangkhaam na nei hiam?

Mihing te nuntaakna sung ah, a kipat, a laizang, a nununghun cihbang deipite a om a hihi. Singkung lopate bel’ nuntaakna a vial in, kipei thei tawh kibang aa, mihingte a hih leh, tuadeipi teng khatvei bek kikantan-kha a hihi. Eiguak ih picin nading in, kidon kikhoi kimakaih maksak kul aa, ei leh ei ih hihzawh nawnloh hunciang, kikep kikhoi kulkik a hihi.

Hih deipite ih kantan zawh nading in, an leh tui, thagui-thatang, sum leh paai te’ a hunhun in hong dinpih ding’ ih kisam hi. Tua hong dinpih pen luangkhaam kici thei hi. Naupangte pen a Nu leh Pa in dinsak a hihi. A golsa te bel’ a mau leh a mau hizo tamah leh, banglo khat hikha leh, dongtuak hong dinpihding midang kisam veve a hihi. Khanglui lai-in, Nu leh Pa, U leh Nau, lawm le gual , beh leh phung in hong dinpih a hihi.

Nuntaakzia kilam dang in, khual gamla pi-tuipi galkaai in kiteengta a hih man-in, ih dongtuak ciang hong dihpih ding kuamah a kicing in, a omnawn kei hi. Tua a hih man-in, midangte ih kisamta hi. mite zong eimahbang na hi-uh aa, hongphaam-honghuaiding’ kipawlkhopna, khat hong kisam hi. Nasep nading in sum kisam ahih man-in, sumtawh kipawl a kulta hi. Tua hi aa, tua kipawlna in hong-etding ih utleh sumpiak hongkul hi. Tua sum pen kipawlna dungzui in, pawlsum/ membership/ premium kici a hihi. Tua sumpiakna tungtawn-in, sum in naa hongsem ding a hihi.

Pasian thu hi, ‘bangmah cikei ning’ kici kha ding hi. Ih nuntaaksung ei leh ei ih hizo phialzong omnawm keileng, ih nung ah, it leh ngaih te kibuaisak thei pha mahmah vevelai a hihi. Zomi pawlkhat aa ding in, lunglut huailo a bat-hang, theihhuaithu khat hong-hita hi. A diakdiak in singta gamlai-mundang gamdang ah banglo khat hikha leeng cih, ngaihsut huai hi. Eipat hilo in, USA bang ah ci leeng, a masapen luangkhaam/life insurance pen Philadelphia ah kingah aa, tu-ni in, kum225 cingta ahi hi.

“Ka lam-etna, ka tunnang vangam hi” ih cizong, tuapen ih kha aa ding bek hi. Ei leh, it leh ngaihte’ leitung pumpi a phaam ding’ luangkhaam/Life insurance ih lei nai, ih nei nai hiam?

A thupi zaw ah, kha luangphaam ding naungek honpa Jesu hongsuahzawh Kum2017 cingpeet ta ding, nang leh, na it-na ngaih te’ aa dingbeek’ leitungsum tawh leitheihloh- Lungtangbek tawh kingah- insurance nala nai hiam? Assurance/Upkiciatna na ngah nai hiam? Merry Christmas. Nantal’suan (15th December 2017)