Uganda gamah gialbem (Leopard) in naupangno petlum in asa ne

Uganda gamah gialbem (Leopard) in naupangno petlum in asa ne

Africa, Uganda gamsung ah gialbem (Leopard) akici sahang namkhat in naupangno khat asa ne cih AFP pan kiza hi. Uganda gamsung aom Queen Elizabeth National Park kicihna ah nung Friday ni in thupiang ahihi.

Queen Elizabeth National Park pen aminthang khat hi a, ganhing tuamtuamzong aki khawina khat ahihi. Tualai ah nasem nupi khat ii ata pasalno kum 3 bek aphapan khat Leopard in aneksak ahihi.

Tua naupangno pen naukem numei “Nanny” tawh aomkhawm uh ahihi. Queen Elizabeth National Park sung aom dai akikailo nasemte omna Staff Quarters sungah Nanny tawh kikem in aomlaitak Friday zanin gialbem khatin tua naupangno na tuahkhia hi.

Wildlife authority spokesman Bashir Hangi in agenkhiatna ah tua naupangno pen akemnu tawh apualam Outdoor ah ki zuikhia uh cihi.

Ahi zongin naupangno in azuihlam pen tua naukemnu in phawkkhalo, theikhalo cihi. Tualaitak in naupangno akapgawp azak ciangin delhpah hi. Gialbem khatin tua naupangno napet in, naukemnu in ahutsawm hangin hunkhia zolo hi.

Tua naupangno pen gialbem in gamsung ah taipih vingveng ahih manin, Search Team te’nzong zongpah ngeingai uhhi. Azanzan in azonzon uhhangin gialbem leh tua naungek pen muzo mahmahlo uh a, ahi zongin azingciang naungek ii aluguh bek mukhia uhhi.

More: Nepal vanlengtual ah Leopard kimu ahih manin tawlkhat kikhakcip ~ ZD

Tua gialbem tepen mihingsa khatvei nekhakhinleh alimna thei in, duhkikzel uh ahih manin, lauhuai mahmah hi. Tua ahih manin tua mihingsa anekha gialbem pen ganhing khawina sungpanin matkhiatding leh thatlupding in kizonsan cih kiza hi. Sawltak #zomidaily