Lennupa Buaina Leh 2008 Thukhunpi ~ Bob Tuangpi

Lennupa Buaina Leh 2008 Thukhunpi ~ Bob Tuangpi

2008 gambup thukhunpi akilaih zawh masiah tua siksanin kikalsuan ding ahih manin, tua sungah minamvai leh gam leitang koicih kepin panla lehang muibun ding cih 2008 gambup thukhunpi khenpi (53) na sung ka etcianna kong luikhia nuam hi.

2008 gambup thukhunpi khenpi (53) -(a) na ah gambup ah om gamkee (State & Region) tuamtuamte’ leitangvai leh gamgi puahphat ding thu a om leh tua gamkee sungah teeng khuapi huam (Township/သက္ဆိုင္ရာျမိဳ႕နယ္) mipi taangpi taangta’ deihna lakna (Referendum) neih masak ding kisam hi.

2008 Thukhunpi 53- (b) na ah tua bangin gamkee (State & Region) khat sung ah om khuapi huam (Township) leitang ah ateeng mipi deihna akilaak ciangin tua khuapi huam sungah om, meetang (Vote) khiathei (kum 18 tungsiah cihna) mipi deihna alangval ( atawm pen 51% cihna) in gamkee khat ii gamgi puahphat dingvai athukim kei leh kuamah in kheltheilo ding hi, ci-in kiciantak gen hi.

2008 Thukhunpi 53-(c) na ah tua bangin akisaikha gamkee khat ii khuapi huam (Gtna : Chin State sungah om Township-9 teng lakah Tedim Township leitang huam gamgi puah nang akisap leh -Gtna : Lennupa pen Falam Tsp huam ah khiin ding ahih leh) mipi meetang khiathei alangval (Tedim Tsp huam) in gamgi puahphat ding mipi deihna laakna (Referendum) ah athukim uh leh tua gamkee innpi deihna (Gtna : Chin State Parliament/Hluttaw) khensakna laakkul hamtang ding hi.

2008 Thukhunpi 53-(d)na ah tua bang akisaikha gamkee Innpi (State & Region Hluttaw) in athukim pih khensatna vuah gamkee Innpi taangmi (MPs) vekpi lakah sehli suah sehthumval (75 +%?) gamgi puahphat ding athukim uh leh gambup Innpi (Union parliament) in thukimpih phot ding (Vote khaikullo) aa, tua khit teh gambup makaipi ((President of The Republic of The Union of Myanmar) in kipsakna nei ding hi.

2008 Thukhunpi 53-(e)na ah gambup ah om gamkee khat ii gamgi puahphat dingvai tua gamkee (State &Region) ah om khuapi huam (Township) sungah ateengmipi atamzaw in gamgi puahphat ding thukimna pi’n gamkee Innpi (State &Region Hluttaw) in athukimpih kei leh gambup Innpi (Pyitaungsu Hluttaw/Union Parliament) ngaihsutna leh thukimpihna laakkul ding hi.

2008 Thukhunpi 53-(f)na ah gambup Innpi (Union Parliament) khensatna akilaak ciang’n gambup Innpi taangmi (MPs) sehlisuah sehthumval (75+%?) in athukimpih (Vote khaikul ding) leh gambup makaipi (President of The Republic of The Union of Myanmar) in gamkee khat ii gamgi puahphat ding akisam bangin sem ding hi, ci-in sepzia leh kivaipuakzia limtak gencian hi.

Tua bangin 2008 thukhunpi in kiciantak hong lak ahih manin, tutung “Lennupa Vai” ilunghimawhna leh buaina pen kiim-le-paam thuging huzaap hangin kipatautek zongh hiding hi. Tua ipatauhna pen ikhua leh tui, igam leitang i itna hang hi-in angeina lungdam huai hi. Leitung minam khempeuh in aminam, leitang uh it-in akep ding uh ahihi.

Ei lam pan hih vai akiciantak itel theih nading kongzing thuthangte sangin akisaikha Chin State kumpi thuneite (Gtna : Chin State Chief Minister, Social Affairs Minister Pu Paulun leh Forestry Minister Pu Mang Hen Dal) te in Chin State sung nasepnate/thusimte thei pelmawh ding uh ahih manin, hih vai ah adiang tanusem (Gtna : GZA) in amau’ muhna leh dinmun dong hamtang leh kilawm hi.

Tua ban ah hih “Lennupa” Community Forest dingin abawlsawm kipawlna leh mimalte athu-le-kizopna kankhia-in amau’tungah ideihna lai phahkul (လိပ္မူ) pah zaw leeng muibun zaw ding hi.

Atung ah 2008 thukhunpi siiksanin igen mah bang aa, Tedim gamhuam Kapteel gam sungah om “Lennupa” ahih leh Falam gamhuam ah 2008 thukhunpi kiplai teng kituah/kikhin thei peuh mahlo ding hi. Azenzen akikhin leh zong 2008 thukhunpi khen (53) sung khenneu A-B-C-D-E -F sung siksanin sepkul ding cihna hi.

More: Lennupa Falam te’n hong suhsawm thu azom ~ Dr. Dong No

Ahizongin, Tedim gamhuan icih zong Chin State kumpi thuneihna sungah om ahih mah bangin, Community Forest ading abawlnuam leh asemnuam mimal/Company khat peuh in Chin State kumpi’tung septheihna phalna (Permission/Licence) ngahkhia zenzen leh sumbawlna ding ngah thei maitak hi. Kawlgam sung mun tuamtuam ah zong tua bang om lua hi. Ahih hangin, Tedim gamhuam pan Falam gamhuam ah bel kituah thei hetlo ding hi, cih 2008 thukhunpi siksanin ka mimal muhna leh lunghimawhna kong pulaak hi. Agelh : Bob Tuangpi (02182018)