Len Nupa hawhna ~ Zomi Quavadis

Len Nupa hawhna ~ Zomi Quavadis

A minthang vangvang, ka muhnop mahmah Len Nupa mualah khatvei ka va hawh kha hi. Ka zinna uh Saizang khua panin Kapteel khua zuan in ka pai uh a, Kapteel khua ka tun un sun 12 saat khin ta hi. Tua panin khuamite hanciamna tawh a kito lampi ah saikel tawh ka pai kiaukiau uh hi.

Saikel tawh a kipai theihna ciang paiin, saikel kikoihna mun ka tun uh ciangin ka saikel uh ka koih uh hi. Ko pai laiin ko bek ka hi uh a, lungmuang takin ka saikel uh nusia in, hong makaihpa tawh ko thum teng Len Nupa omna mualdawn tuai lam zuanin ka kizuito hiamhiam uh hi.

Lampi pen to lua mahmah hi. Zaang gam a om ka hihmanin to lua a sa ka hi diam bel thei keng, ahihangin gim cihtakin gim ingh. Sisan huup thei vot lah tam cihtakin tam hi. Dinkhawl pak ni cilenglah vot in hong bawh huan pahpah ahihmanin tawlpipi in ka kahtoto uh hi. Lamto ah ka pai laitakun tawl lua ka hihmanin ka bah liang hi. Tui thawlkhat ka puak pen Len Nupa tungto man loin hong bei ta lailai hi.

Vot hong pehna pan a luang khia sisan naisan leh gim luat manin a luang khia khua-ul tawh nai khat val ka kahtoh khit uh ciangin Len Nupa akicihna mun Zogam mualdawn tuai ka tungto uh hi. Zogam huihkhi vot hiauhiau in hong na dawntuah a, hong seem hiauhiau ahihmanin ka gim ka tawlna teng hong veng hi. Egypt kumpipa pen a tutna munah a nawl tuak panin nungak melhoih mahmah nih in a zaap hiauhiau mah bangin kei zong hong kizaap liang hiam ka ci simsim hi.

A mun ka tuntoh uh ciangin na nuam mahmah hi. Khua daakna khempeuh ah hoihna vive kimu hi. Hoihna, etlawmna, ngaihbanna cih kammalte pen hih mun panin hong kipan hi liang dingin ka um hi. A kolhna munte pen loneel hing dikdek in tuam a, Italy grass akici kiakneel bang pen singkung po lohna mun awngte ah kiphah dihdiah hi. Ka muh ngei nailoh paak hoihte zong ka mu a, ka innkuanpihte ka puak ding ciin loin ka diary bu kawmah ka zep hi. Hun sawt nei bang hileng Adam leh Eve tedanin guaktanga bualbualna dingin iplah huai mahmah hi.

A gaal khat a mual tuampo khat pen leicial kibawl bang lianin na om a, makaipa khiangah, “Hih mun loin kikho ngei maw?’ cia ka dot leh, “A khokho om himah lo diam, ko bel kho ngei kei ungh” ciin nui kawmin hong dawng hi. Tua mualdawn ah singlamteh na kiphut teutau hi. “Kua phuh hiam?” ciin ka dong leuleu a, ama hong dawnna ah “Hua pen piangthakte phuh hi” hong ci hi.

Ka ngaihsun a, hibang mun khawngah singlamteh phut a gualzawhna laan ih khai sangin mite lungsim zingcip sungah khuavaak puakin, singlamteh thu thei sakin gualzawhna laan khai zaw lehang a hoih zaw kha kei tam ka ci simsim hi. Bangbang hileh kiphut khin ahihmanin lungdam huai hi.

Ka pai kawmkawm un paakte, mun leh mualte maan ka zaih kawikawi a, hibang mun hoih a bawl Pasian pen khutsiam sa lua ka hihmanin ka phatphat hi. A denciangin tuisiang luanna mun ka tung uh hi. Tua munah suangpeek golpipi na kiphah a, makaipa in “Hih mun pen dawite tuangdung kici hi. Hih suangpeekte pen amau phah ahihi” ciin hong gen hi. Limsuaih siamte in hoih a sak penpen amau ngaihsut tawm tawh a suaih uh limte sangin hoihzaw pek mawk hi.

Hih Len Nupa mual pen tulai numeite dan a zep zawh leh puah zawh man beka hoihte hilo hi. Amah pen a hoih ngiat, zep leh puah kul lo, ama hihna taktak ORIGINAL pen a tuaci mah dingin a bawlpa in a bawl ahihi. Zeem in puah lehang a hoihna bei zaw ding hi. A hidandan a koih ding pawl ahihi. (Zom lai ni!)