Leitungbup Zomite minam kikhoppi, KL, Malaysia ~ Dr. Dongno

Leitungbup Zomite minam kikhoppi, KL, Malaysia ~ Dr. Dongno

Zahtak Sponsor ZIUSA makaite, Inntek ZAM makaite leh ong pai ZCD leh party dang makaite, kipawlna tuam-tuam makaite leh Zomi uliante,

Zomi Innkuan USA panin Feb. 17-19 sung Leitungbup Zomi-te Minam Kikhoppi, Kuala Lumpur, Malaysia khuapi ah kihel dingin sapna lai ka ngah aa ka lung adam hi, Ahih hangin, ong pai thei lo ding ka hih manin, ka gennop leh kikupnop thu pawl khat hiah kong khak hi.

Hih pen thu thak hi lo-in Oct 2016 aa ZCD makaite, GZA makaite TA makaite leh ZYA makaite tung ah kong khak sa leh Nov 14, 2018 ni-in, A 4veina GZA Kikhop pi, ah kong khak sa thute vive mah ahi hi. Tua bang ka khak hangin kikhopna thu lu tawh kituak kisa lo hi dingin ka um hi; ong ki thuk kik ngei lo hi.Tua ahih ciangin, tu-in Zomi makaiteng kimuh khopna ah kong khak kik leuleu hi. Hih kaan aa Zomi muante tutkhopna hun pha om lo ding ahih ciangin muanna leh lametna lianpi kong nei hi.

Zomi tawh kisai gen ding hawm ding thu tampi om aa, politics, economy, education, health, environment, human right, cihbangin tampi om aa, tua teng pan hih anuai ateng kong kuppih nuam hi.

MRTV program : Falam gam sung bek nangawn ah khua khat leh khat, minamkee khat leh khat pau kibang lo, kithei ngiat lo, pau nam tuamtuam om uh hi. Laizo pau kici Falam pau azang taktak mi 18,000 kiim bek om hinapi MRTV ah program nei uh hi. Tua mah bangin Mindat gam ah zong mi 13,000 kiim bekin azat Dai pau MRTV ah program nei khin uh hi.

Zopau pen Cikha khuakhung pan Valung dong, Tedim Subdiv. pop. 96,000, Tonzang Subdiv. pop. 35,000, Cikha pop. 12,000 leh Falam gam sung ah pau i kibat pih Ngawnte tawh, mi 150,000 val in i zat Zopau tuni dong MRTV ah kinei nai lo hi.

Hih 150,000 miphazah peen Khamtung, Chin State sung teng bek hi aa Kawl zaang, Tamu kiim, Mandalay, Yangon teng kigawm hizah sangin tam zaw lai hi. Tuate tawh, atawmpeenpeenin, 3000,000 val in Zo pau azang i hi hi. India gam ah zong Zopau kamphen kuul lo Mizo State leh Manipur State sung ah kigawm tua zah mah om lai ding uh hi. Tua ahih ciangin, Zopau peen, mualtungmite lak ah mi atampeen zat pau khat ahi hi. Mi tawm nono-in azat pau MRTV ah program nei i hih leh Zopau i neih loh pen akingaihsun zo lo zahin thu lamdangpi khat ahi hi.

Tua ahih ciangin, hih thu i vekpi aa i vei khop ding thu ahi hi. Adiakdiakin, hih lai aa ong kikhawm Zomi makai leh muan tengin nasiatakin ngaihsunin nong kikup ding uh thupi hi. Mi hizahin azat pau hi bang aa kipaampaih mawk cih pen phatak ngaihsun dih ni ci-in kong zawn hi. Gentehna-in, van zuakna ad khat Zopau-in ki ‘kywa nya’ leh adangte sangin azah tampi kikhawngzaw pah ding hi.

Tua ahih ciangin sum bawlna ah phattuamna nakpi-in piang aa, Zomite economy azah tampi-in khangto lai ding hi. Tua i neih ciang bekin, Zomi’ liim-leh-vang ong zai semsem ding aa Zokam leh Zomite economy zong ong khangto pah ding hi. Radio, TV program pen, koigam-koigam ah mitampite theih pau kihel hamtang hi. MRTV ah Zopau program om loh aphamawh thu ahi hi.

Tua ahih ciangin, MRTV ah Zopau program i neih theih nading ong kikum hamtang le uhcin ci-in deihna lianpi tawh lametna ka nei hi.

Zogam leh Sagaing gamgi : Tu-in Zogam leh Sagaing kikaal gamgi bawl phat ding thu Chin State panin ki za aa hih zong thupi ngaihsut mahmah ding thu ahi hi. I Zogam pen Sagaing Div. in acre tul tampi i muh gige-in ong eeu hi. Zomite adingin, hih gam thu thuneu liai hi lo hi. Tua ong ki sut Zogam zaang sung aa piang buh, bee, sathau, att. Zogam buppi-in gai zo lo ding ihih ciangin, hih hun hoih i khahsuah loh ding nakpitakin i ngaihsun ding hi. I khahsuah ngawngaw leh cikmah hunin Zomite-in i gam i ngah kik zo kei ding aa i tu-i tate gamgi vai sep ding ‘ gamh’ anusiat i suak ding hi.

Hih vai tawh kisai-in tu-in alunghimawh mi pawlkhatin ahih zawh zah un hanciam uh hi. Tanglai pekin i pu-i pate-in Zogam ci-in a sabet na uh tangthu leh late, Mangkangte ciaptehna laite leh athei mite gennate kikaikhawmin, gamgi suangphuhte kizong kik aa, avekpi dektakin ki mu khia kik khin ta hi.

Hih vai asem aphual aa omte adingin, khualzinna, nek leh dawn cihbang atuamtuam amau ip sung pan zang uh aa, ahi thei zahzahin mimal huhna kipuak hi. Huhna sum zong ki-ngen kawikawi hi. ZIUSA-in huhna $ US 1,000 ( LenNupa ading tawh) ong pia aa ka lungdam mahmah uh hi. Ahihangin kicing zo nai peuhmah lo ding ahih ciangin, kuamapeuhin deihsakna tawh, kipawlna ahi zongin, mimal ahi zongin i panpih ciat lai ding kong zawn hi. “Zogam leh Zomite ading in ka kipia ing” i cihcih tun tua hun ong tung ta ahi hi.

LenNupa : I thuak khop, i thangpaih khoppih ding thu i neih lak ah, July, 2018 sungin i pu-i pate-in Zovangil manpha tampi leh mihing pum tawh aleisa uh Zogam sung aa om LenNupa leh akiim singpi-pona tupi acre 12,000 apha, i gamveeng Falamte-in sut dingin ong kithawi uh hi. Falam gam sung ah koihin amau thuneih nading angaihsutna uh i zak phetin i kiko kawikawi aa, mimal ahi zongin, Tedim CSO leh GZA ahi zongin nu’ mun-pa’ mun ong la-in kyi-ngya-chiat ong thoh uh aa nakpi-in i lungdam hi.

Yangon, Kapteel Kipawlna in zong Falamte ngiimna, i State level ah kankuat uh hi. A mau tung ah zong i lung dam hi. LenNupa Tedimgam’ neihsa ahihna tangthu Chin State PM, Forest lam Minister leh Falam lam ulian pawlkhat ka khak aa, Nyipitaw ah ZCD founder/lutangpi leh ulian pawlkhat zong ka pia hi. Hihin i phuut khak thu, kipumkhat aa i sepkhop na hangin mainawtin kal khat asuan zo ihi hi.

Ahih hangin aman siangta hi nai lo kha thei lai ding hi. Mitsuan gige ding kul lai hi. Athu ala ong kan pha lai un la, sep ding akuul a om laite abulin i long khia ding hi. Sagaing Div. bekin i gam ong deihgawh i sak leh i mipih Falamte ong khan ciangin, ong suukzaw lai tawh kibang hi. Hih zong “Zogam, Zomi ading” icihcih tun ong tung ahi hi.

Thau tawi-in siah kai : CNF deih lohna mi tul tampi minthuh petition pen Tedim gam sung ah akiza ngei lo amasapeen lungphona ahi hi. Tua zah aa kideih lo, kinial kimlai tu democracy hun sansanin banghangin Zogam sung ah ong man ong that CNF-te-in mizawng daipaamte tung pan thau tawi-in ngen thei sawnsawn lai mawk uh hiam? Bangci i sa hiam? Hi bang mahin koihkoih i sawm lai hiam? Bangteng hangin i Zomi mipih azawng daipamte thuakna khutzepin i en lel hiam?

Beng : Tonzang gam sung ah beng kiciingin mitampi sia khin, si khinta bek tham lo-in khua nangawn tampi beimang khin ta hi. Banghangin i zaak ngei loh Meitei gamdangmite ong pai-in i gam ah upadi tawh kituak lo, beng langtangpi-in ong ciing hiithiat thei uh hiam? Hih pen Zomite cimang sak ding ngiimna bulpi ahih lam beek i phawk hiam? Bang ngak lai i hi hiam?

Tedim Khazaing ding vai : A thuneu lo anunung kong kuppih nop in Tedim in Division i ngah ding vai ahi hi. Division piak nading aa kisam na khempeuh Tedim, Tonzang, Cikha kigawmin kicing khin aa Division dingin a kilawmpeen hi napi, ong deih sak lo nih leh thum hang bekin tuni dong i ngah nai kei hi. Hih zong mi ading adaal hi lo, asut hi lo, a kilawmpeen i hih ciangin nasiatakin nong ngaihsut ding un mipi-in kong ngak uh hi. Ka lungdam, Dr J Suan Za Dong (Dong No)Sydney, Australia