Leitung galpi thumna piannading panin akhamzo pa

Leitung galpi thumna piannading panin akhamzo pa

Tuma kum 50 kiim in, Cuba thautangpi (Cuban missile crisis) hangin USA le Soviet Union (tuhun ah Russia) te kikal ah kilemlohna nasia takin khangin a kivau vau ta phial uh ahi hi. Tawmkhat khialhna khat, thusia khat a om lian leh akikap ding dinmun ahita uhi. Galpi thumna ding pen galpi nihna sangin ki lipkhap zaw hi.

Banghang hiam cih leh nuclear bombte gamlian, gamhau te in neikim tek uh ahih manin hite zangin kikap leitung a beizo zah phial dingin a khauhluat man zong ahi hi.

USA gambup lutang Jonh F Kennedy le Soviet makaipi Khurchev te akipan gam nih makai thuneite UN lutangpi ahi tualaitak in Kawlgammi U Thant in a leptuah laitak zong ahi hi. Hi leptuah na hangin Soviet gamin Cuba gamah a puak uh thautangpi te a gam vuah kileh sak kik uh a, galpi thumna zong hong pianglo hi. Ahi zongin hithute kawmkal ah a tamzaw in akithei khalo thu khat na om citciat hi.

Tua in 27 October, 1962 in…
US te in Soviette tuisungtembaw B-59 (Submarine) a gamlam vuah akileh kik na dingin bomb tanglianpite tua tuisung tembaw kiim teng ah upmawh khiat uhi.

Tua hun laitak in tuisung tembaw B-59 in a phualpi uh Moscow tawh radio kizopna ngah zolo ahih manin, galpi thumna akipan taktak ta hiding hi ci’n ummawh uhi.

B-59 tuisung tembaw ah makai te nih in tui maitang ah pusuak khia in US gal tembawpi te kap khap ding thukim uhi. Ahizongin tua galkapbo tegel thu cih galkap thunei nihna pa in thukimpihlo in na nial hi. B-59 puak thautangte pen nuclear thautang ahih khu in zong tembaw sungah thunei mithumte thukimna akisam sese ahi hi.

A zenzen in hih thunei nihna pa na thukim hizen leh… bang piang ding cih kigen theilo hi.

Tua thunei nihnapa (Second-in-command) min in Vasilli Arkhipov (1926 – 1998) ahi hi.

“Suangpi suangneu in thek” cih mah bangin, thuhoih, thulian khat pen thuneu no khat hangin hoihkip thei hi. Tua mah bangin zong kisiacip thei hi. Nk Khanno Ref: Video Inspiration