Leitung bup Zomite tungah Thuzaksakna (17 July 2014)

Leitung bup Zomite tungah Thuzaksakna (17 July 2014)

Leitung bup ah Pasian thupha sangin gam tuamtuam ah atung it leh ngaih Zomi khempeuh tungah Pasian kiang panin daihna thupha leh mavanna thupha hong tungta hen! ci’n thupha kong paih masa hi. Ahun simin thu hong zasak zelzel nuam napi ingin keima pumpi thanemna hangin kong zasak pahpah theikei hi. Ahizongin Leitung bup aom Zomite khempeuh adingin thukong ngetsak den hi.

Tutung a, kong thuzaksakna ah Zomi bup adingin thulian mahmah nih hong zasak nuam ka hihi. Ka thugen akitel zawdeuh khak leh ci’n nambat pi nih tawh kong khen ding hi.

I. LEITUNG BUP GAM TUAMTUAM AH GZA TAWH KIZOM ZOMI KIPAWLNA NEIHNA DING HANTHOTNA

Gamdang tung masa sa Zomite in na omna mun tek uhah Zomi Innkuan ci’n Zomi kipawlna nana phut kawikawi uha, lungdam huai lua kasa hi. Tu-a kong hanthot nopna pen tua bang a, Zomi Innkuan aphutsate nahi uh zongin aphut nailote nahi uh zongin agam agam leh amun amun ah Zomi Innkuan phut tekin tua Zomi Innkuan kipawlna mahtawh naom na gam uh Kumpite tungah theihpihna (Registration) nana bawl tek dinguh kong thum nuamlai hi.

Banghanghiam cih leh 2014 March kha sungin Tedim Khuapi ah a kibawl A (2) veina GZA Makai kikhopna ah i Zogam leh i khuapite mahmah puah cih taka, puah ding lungkim diamna kinei hi. Ahizongin ei tha ei ngal bek leh ei sum ei paai bek tawh kipuah zolo ding ahih manin agamgam aom Zomi Innkuan khempeuh in naom nana uh kumpite kiang panin huhna hong zom ding uh leh nong ngahkhiat ding uh i lamen hi.

Tua dingin zong Zomi Innkuan kipawlna pen kumpite theihpihna (Registration) nana bawl tek dinguh a lunggulh i hihi. I gam i lei-ah tua bang a, gamsung puah nading kipawlna zong atuamtuam om a, ahizongin sum le paai mah kisam zel hihang. Gentehna in Environment Conservation and Community Development Society (ECODS) cih bang zong om a, i gamsung singkung lopa, zusa vasate leh ganhingte kepcing nading nasepna ahihi. Khantohna ding a, kisam bulpi (Infrastructure) te septoh nading ngimna amun mun ah kinei tek hi. A zenzen in hihbang nasepna leh khantoh nading nasepna acing zaw a, natheih nop uh leh [email protected] ah ki contact thei ding hi.

Tu-a kei kong hanthot nopna pen amun mun ah kipawlna neih ding leh kumpi theihpihna (Registration) nana neih dinguh lunggulh huai asa kahihi. Kum 2010 kumin Europe gam teng khual kavazin a, i sanggam Hakha, Falam te-in tua bang kipawlna nanei dimdiam uha, aom nagam uha kumpite theihpihna zong nangah khin uh hi. Tuapan in Zogam puah leh zuunna ding huhna (Grant) zong tampipi mah nangah uhhi. Agam kumpite in i gam thu acingin theinuam uh ahih manin kei hong sam uha, kahih theihtawp in ahoih lamlam in kagen sak hi. Eizong tua bangte kisam hihang. Pivangtak in nahong semin i gam i lei puahding zuunding in mapang khawm dih ni, ci’n kong zawn ngeu ngau hi.

II. GLOBAL ZOMI IDOL NEIHNA DING

Kum 2011 December kha-in Kalay Myo akibawl amasa pen GZA Makaite kikhopna ah GZA Music Committee te nasep ding a, akithukimpihsa ahi Global Zomi Idol neihna ding vaitawh kisai-in Yangon aom ZOMUS Central Committee te makaihna tawh sepkhiat kisawm a, 2015 kum Zomi Namni (February 20) ni bangin Leitung bup Zomi Idol telna neih kisawm hi. Tua ahih manin leitung bup gam tuamtuam leh mun tuamtuam aom Zomi Khempeuh aw, na munmun uhah hih nasepna nana dawntuah nadingun Center (6) in khen kisawm a, USA Center, Australia Center, Europe Center, Singapore + Malaysia Center, India Center leh Myanmar Center te hiding a, Center (6) kigawm in Top (10) telkhia in Final kidemna pen Tulsa, USA ah neih dingin kigel phot hi. Minam picing leh minam khangto i suah nadingin la leh music nasep theihna pen genkullo-a i theihsa ahihi.

Tua ahih manin amunmun ah lawpna tawh nana dawn tuah nadingun kong hanthawn phapha nuam hi. Hih thutawh kisai-in acing zaw a, theihna dingin Central ZOMUS & GZA Music Committee Rev. Suan Khan Lian @ Lianpi kiangah nadawp le uhcin lungdam takin hong kithukpah ding hi. Contact Email: [email protected] ahihi. Hanciam tekin la tawh i minam zuunin lamto dih ni.

III. MAI GZA MAKAITE ATHUMVEINA KHAWMPI DING

Tukum March kha akibawl Tedim khawmpi ah maikum ciangin GZA Makai khawmpi Lamka (Churachanpur), India ah neih dingin kigel phot a, apian zawh nadingin makai lampan in kong hanciam ding uh hi. Thu hong ngetsak tek un.

I biak tung Pasian in Zomi khempeuh thupha hongpia hen la, i vaitek ah mavan daupaina hongpia in khutkhat tawi khekhat khai bangin i minam puahkhawm zuunkhawm dihni, ci’n Topa mintawh kong zawn phapha hi. Itna leh zahtakna tawh, Rev. Dr. S. Pau Khan En (GZA Makaipi) July 17 2014