Leitung ah a cidamhuai pen dinmun

Leitung ah a cidamhuai pen dinmun

Hauhna pen nanga’dingin nalianpi na septheihna pen, na lungdam na pen, na cidamtheihna pen leh leitungah hong lungdamsak pen zongh hi thei hi. Na theih ding thukhat ah: na siampenna tawh na gualzawhna in sumbek hong hausak lo dingaa lungdamna zongh hongpia ding hi.

Natna khempeuh ii 30% bang lungsim damlohna pan hong kipan hi cih i thei hi. Tua a hihleh lungsim ngaihsutna in pumpi tungah a lamdangtak in na a seplam ngaihsut hun mahmah ta hi. Dr. John A. Schindler in cidamna ding thusim taktakpen a lungdam, a hoihlam a lungngai leh mailam bek a ngaihsun lungsim neihna hi ci hi.

Na sunglam hong cidam ding aa lutang nat leh zatui tuamtuam zatna te pan in na suakta ding hi. Nasep tampi tawlloh kawmsa in na zo ziahziah thei ding hi. Tawl luat omselo aa nasep dan pen khat zawh ciangkhat kiciantak in sem in zawhna a hihi. A sawtlo in nasep tawh buai nawnlo in na hunawngte ah na utna munah nuamsa tak in na vak khia hialhial thei ding hi.

Pumpi leh sunglampilna

Nupi khat thu hong kuppih dingin hong pai hi. Ka pasal tawh ki thutuak thei ngiat kei ungh ci hi. Inn sungah zatding sum kicing zolo ahihman hi ci hi. A ta te hangin sum kisapna tampi om hi. Hih leitungah a kaamsia pen in a ki ngaihsun nupi a hihi. Khantoh theih nading omlo ban ah khantoh nading theihna leh pilna a sin hun ding zongh nei thei lo hi. Tua bangteng hong gen khitciangin na haksatna pan na suahtak na dingpen na sunglam ah om hi ka ci hi. Hih laibu sungah ka at thute mahbangin nai khat val sung ka kiho uh hi.

Kha 6 a cin khit ciangin tua nupi nu hongpai kik hi. A pasal tawh a kilem dan uh pen lamdang in a zatding sum a kicingin nei bek hilo in a tate zongh kepkep kullo in lungdamna tawh a kidimna thu hong gen kik hi.

Tua nupi nu ii a sep thusim pen: a deih leh a piannop banglian in a lungsim mittawh teltak in a muh dingin bawl hi. Tua lim a sungtawng dong a tunciang in lim hi nawnlo in nakhat hongsuak ta hi. Tua lim a taktak hong suak nadingin sepna zongh kisam hi.

A deihna teltak in a theih khit ciangin ka sem thei ding hi ci in upna tawh a sep man in nalianpi sem zo hi. Nupa ki thutuahna pen tehpih omlo hauhna nam khat a hihi. Hih bang a lamdang, akikhel ngeilo ngeina leh na sunglam vangliatna tawh na deih na ngah theihna ding i gegen ding hi.

Na gualzawhna bangtawh teh na hiam?

Lai simtheilo lai at theilo nasem mi khat thu a hihi. Hih mipa in kum 60 a phakdong thatangsan in na a sem a hihi. A tha zongh kiamsemsem ta hi. Ni khatni ciangin a kum kituatna a manloh lam hoihtak in hong kilak tel aa a ki ngaihsutna sangin kum 10 a moi zaw na hi gige hi. Tua nipan kipan tua mipa hong moisuah zawpah hi.

A gamtatna hong kilamdang aa a mahmah a moizaw in hong kingaihsun pah hi. Ni dang aa ‘tawlsing’ ci aa a septe khawlse lo tawlse lo in ni thapai semsuak zo ta hi. Hong hatkik in hong kilamdang mahmah hi. Hih mipa tungah nalamdang a pianghilo hi. Tuabang a hihna pen kum 60 ka phakciangin midangte mahbangin tawlding, hatlo ding cihthu a sunglam (sunglam mi) ah a koihkhitsa thu a hihman a hihi.

Kum 30 pha khin na pi aa a neulai mahbangin a mit thahatlai mitam pi na muding hi. A kum ki kim aa mit thahat lai te in a mauleh a mau moi kisa lai hi. Khangno kisa lai aa kawngnat ding leh sam kan ding ngaihsut in a neih ngei loh man a hihi. Tua mahbangin mi pawlkhat te in kisap khat a nei, a cidam pha nawnlo in ki ngaihsun uh hi.

A mauleh a mau hoih a kisa zolo mi tampi om hi. ‘Mi honlak ah zum huailel ing, ka thadah’ ci uh hi. Tuapen na sunglam pan in nanglenang hoih kisa nawnlo cihna a hihi. Tua hangin mi dangte lak ah na gamtatdan hoih na sa thei kei aa nangnguak in a om nuamzaw na hihi. A hihhangin na sunglam pan in hihbang pianzia te na ki laih sak nuam hi. Tua hileh nanglenang hoih na kisa thei pah dingaa midangte deih in midangte tawh hunnuam na zanghkhawm thei ding uh hi.

‘Ka khuak hoih kei, mi lak ah maizum den ingh’ kici thei hi. A taktak in na khuak hoihlo cih bangom ngeilo hi. Na sunglam pilna in na suah ni pan kipan tuni dongin na zak, na muh, na sim, leh na theih khak sa thu khempeuh kicing tak in theilai, kemcing lai hi. Na ngaihsut ngei thu khempeuh zong a vek in na sunglam ah om lai hi. Tua hiaa ‘mangngilh ingh’ na cih ciangin na sungah a om nawnlo hilo hi. Na sunglam pilna pan in na pualam pilna (khuakbu pilna) sungah a tungpaklo hi bek hi. Na khuakbu nasepna te a ki khak laitak a hihman bek in a mangngilh na hihi. Na sunglam pilna leh na khuakbu hong kizop hunciangin thakhat in ‘aw thei ta ingh ei’ na ci ziau lel hi.

Na kimuhpih mi khat peuhpeuh a min, a om na, a phone nambat, cih te ciapteh pah lian theih ding thupi hi. Tua in na khuakbu ihmu hong phong dingaa na hong sem ding hi. Na khuakbu a hoihlohna pen na sinloh, na zat loh man hiaa tua na khuakbu hoih nasak lohna in na sunglam pilna nawngkai sak hi. Up lohna hong neisak hi.

Ngaihsutna in vangliatna a neihna lamdang nasa hiam? Gamtatna khempeuh ngaihsutna tawh hong kipan a hihi. Na ngaihsutna khempeuh na sungtawng pan in hong pusuak khia a hihi. A masapen in na deih mahmah nakhat na sunglam thahatna sung a tungding in bawl in. Tua hileh na sunglam pan in na pualam pilna leh na gamtatna sungah a tawntungin hong kilangh ding hi. Tuapen hanciam luat kullo in na ki muanlohna teng hong beisak dingaa na matut nadingin hatna leh tha hong pia ding hi.

Na omna munpan in khanglo in

Na ngeina bang nawnlo in lamtuamtuam pan in na hoihzaw ta dingaa a suakthak na bangliang ding hi. Na sepna peuhah na sunglam pan in lawpna, lungdamna, suahtakna leh no suahna thak na ngah ding hi. Na khat peuhpeuh na hanciam laitak leh a thupi khensatna na bawl laitak in khinkhai theihna leh ki uk zawhna hongpia ding hi. Mi dang tungah haksatna a piangsak nate in nang haksatna hong pia zolo ding hi.

Kei ma tungah hong piangngei thukhat kong gen ding hi. Huhkhat lai, mihingte sunglam aa ki ciangtanna a neilo vangliatna thu ka theihtung lai a hihi. Ka inn sungah sepding pawl khat om hi. A hihhangin ka lungngulh bangin sem theilo ka hihman in seploh in ka koih kik zel hi. Banghanghiam cih ka theitel zo kei hi. Seploh phamawh a hihmanin kasem hi. A hizongin ka deihbangin ka sep ka mankhit ciangin ka lung kim tuanlo hi. A hoihzaw ding a om dan khatin tuat in hoih ka sa thei mahmah kei hi.

A hang ka theih ciangin a ol no khat na hi lel hi. Na khat peuhpeuh ka sep ding ciangin nasem ka kipat ma in ka deihdan teltak leh kiciantak in ka lungsim sungah ka mu sitset phot hi. Tuabang ngaihsutna tawh zan ka lum aa ka lungsim sungah tuabangdan lian in zo leng ka lung a kim mahmah in ka ki bawl masa hi. Tuabang khitciangin na kasem hi. Tua ciangin lungkimlohna leh haksa ka sak tuamtuam teng hong om nawnlo hi.

Nasep ka zawh ciangin zongh lungkim mahmahna leh lungdamna tawh ka om thei ta hi. Tua hiaa tuni in hauhna thu na sungah omsak in. Na sunglam pan in mihau na hihlam ki mu sitset in. Nasep ding lian pen tua a hihi. Na sunglam (sunglam mi, sunglam pilna leh hatna) pan in na hauhna ding hong hilh khit nak leh bangmah in hong khaktan zo nawnlo ding hi. Ih Mutna leh Hauhna