Lawki sungpan ih khankhiatpih ngeina hoihlote

Lawki sungpan ih khankhiatpih ngeina hoihlote

1. NUMEITE THUSIM LOH LUATNA

Khuasung pawlsung hoih nadingin innkuan hoih kisam masa pen a, innkuan hoih a pian theih nadingin nupa hoih kisam masa pen leuleu hi. Khanglui ngeina ah numeite kithupi sim lo, kisim mawh lua ahih manin ih suplawhna tam mahmah hi. Hih paunakte’n bang gen hiam!

Sialpi’ ki tumin kilam ngeilo, Akpi khuang in thusia ko

Nidangin zolai tan li ciang kisim a tanli a zote zolai sang zo kici hi. Numei aadingin tan li ciang pen pha zo kici-in a ban kizom sak nawn lo hi. Tua manin nupil kinei lo pah hi. Nute tawh kithuahkhopna tam zaw ahih manin papil neite sa’ngin nupil neite a khangto tam zaw hi.

Ih pate pen kumpi sik ciangkhut tawh thukhenna tokhom tunga tu bangin kimu hi. Tapkual tunga nu le sanggamteng ciamnuih gena nuikhawm ziahziah kimlai pen ih pa hong ciah vat leh kidai pah lian zen hi.

Annek khop ciangin a sem a bawl pen ih nu, tutna zangh ngam lo-in niksing khat tawh tucil a, cikuang zasankuang ban ngam lo hi. Anthuk amah hi-a kuang sawm kuang kem zong amahmah hi zel hi.

Zingsang akkhuan hun pen nupite thawh hun kici-a zingsang a thawh phetin an bel suang to pah, an su, tui tawi, vokan huan, innphiat cihte pen zingan nek ma-a ih nu nasep hi den hi. Ih pa pen a zingvak nading om a hih kei buang leh an nek kuan ciang bekin hong tho hiathiat hi.

Lokuan teh lah sunsiah pua ih nu hi-a ciah teh zong sing a khop tak pua-in ih pa in hei liangvat in a nung zui hi. Inn tun teh ih pa dawn dingin zubel thun sak a,pa zudawn kal-in kisil hi. Ih pa zia enkawm in an hong thuk leuleu a, gim khin tawl khit ta leh a ngeina mah bangin tucil sa in anne hi. Ih pa tawh an ki-uum khawm ahih manin kuamah kipau ngam lo-a ih kamhai ging bek kiza hi.

Nitak an nek khit teh ih nu mahin vaimim bawk kikhakte khia-in thonga tua kawmin zingan ding huankawm hi. Gim in tawl ta leh adangte lup main lum masa ngeilo hi. Ih innsung takpi ah ih nu pen sila bangin laukawm kidawmkawm sa in hong om mawk teh a dang khempeuh in zong lungmuanna kingah zo lo-a linna le lauhna sung pan ih khangkhia hi. Pawlkhatte bang a gol zawh dongin tua lauhna lungsim in a nuntakna hawl-a mi khempeuh ama sa’ng a hat zaw a siam zaw ding bangin mu denin gual phalah in a gentheih lawh tampi tak ih om hi.

Mo ding zi ding a kizon ciangin zong sila zon bang phial in nasep hat a thanuam kizonga a lokuanna dongah ki-en sim hi. Numei khat mi zi mi mo dingin hong pai ciang, suahtak lohna innsung pan hong paikhiat bang mahin tua bang lian innsung khat mahah hong lut a,linna lauhna lungsim tawh nuntakna thak hong kipan ta hi. Ih nu pen tek hong suak ta-a kei hun ding hi ta cih lungsim tawh hong kipat mawk teh ama gentheih mahbangin a mo hong gentheih ta hi.

Zan lup ciang nangawnin lupna tungah kiho lo ding cih hi pah mawka nupa lumkhawm takpi kiho vetlo-in lupna kigawi ging bek kiza hi. Pasalte’n zong a zite lungsim thangahna dante ngaihsut in nei lo pah uha a mau thangah dan ciang bekin zite luppih ziau lel uha nupa lumkhawm takpi pen damiah taih tawh kibang zen hi! Zingsang simin a zi pen lungsim galdona tawh thokhia denin nupa kithuahkhopna pen lupna tung bek hi sawnsawn ahih manin kimaingap loh ban ah a kigen hun ding om theilo hi. Tua bang nupa sung pan innkuan hoih hong bangci pian tam maw!!!.

2. PASAL U PEN THUPIT BAWLLUATNA

Pasal u pen innluah ding ahih zah khatin ih nu le pa’n zong thupit bawl pen pahin hong sap dan nangawn minpi le minno tawh sap dan hong nei se in, an lim tui lim kipia deuh se hi. Tua in sanggam dangte tawh kikal-ah kithutuahna le kimaingapna (intimate relationship) bei saka ih pate ih kihtak banglian in ih upa kikihta kimaingap lo mawk hi.

Hici bang innsungah zi le ta nei ih om teh sanggam pasalte’n a maingap pen leh a kiho theih pen a zite uh hong hi pah lian ahih manin innsung lungsim galdonate hong kipan ta hi. Numei pawl khat pen a kilangh in gilo paha pawl khat bel gul bangin ngiankawi tawh a lutang ahi a pasal pen a deihdeihna lamah hei ziauziau thei hi. Zi nei nailo pasal nei nailo sanggam dangte’n innsung nop sa zo nawn lo-in pianna nu le pa nangawn tawh ki-etkhialhna dong piang thei mawk hi. Ih vawh bang in a met apung tawh ki-at kik ding ahih manin innkuan’ lutang pasalte pilvan huai mahmah hi.

U leh nau sung nopna dahnate ah a thuzui bekin ih kipha ta a itna tatak tawh kizopna pen hong thuklut zo nawn lo thei hi.

3. LUNGDAM KIKOH DING HAKSA SAKLUATNA

Na khempeuh a dik lama gen ding haksa ih sapha diaka a dik lo lam gen pen ki-ol ngaihsut ziauziau hi. Ih pute anlim huan ni va tuakin anne hong sawl teh duh lua kisa in duh keng ih ci tantan se-a ne nai lo pi’n an ne khin ta ung ih ci tuan se hi. Tua manin ih lungdamna munte ah zong lungdam ih cih ding haksa ih sa paha lungdam keng cih ding lah hilo ahih manin ih dai om zaw tham hi. Innsung diakdiak bangah khat le khat lungdam kikoh ding pen a hi thei vet lo, kamsiat huai dan phialin kimu hiam, kizang ngei vet lo hi.

USA ah pau a kitam zat penpen in “Thank you” le “You welcome” cih a hi hi. Thank you cih nading munah ih cih keikhak leh bel mi banglo in hong kimu pah ding hi-a mi khat in ih lungdam nading na khat hong sep sak leh lungdamna lai (Thank you card) khak kul pah lian hi.

4. KHAT LE KHAT KIPAHTAWINA TAWMNEIH LUA

Na khat pepeuh ih gualzawhnate ah pahtawina tawm zat lua ih hih manin a sem a bawl mite aadingin thangahna bangmah om zo lo hi. Ih ginat lohna te bek ih kigengen a ih hih theih om sunsunte ah kitheih mawh bawlin ih kipahtawi siam loh manin ih lungsima om zah nangawn ih sep thadah pah liana tua in ih zawh zah ding hong zo sak lo ih siam zah ding hong siam sak lo-in ih lawhsap den hi.

Nasem ka ciah simin ka tate nih ka khedap mawza ka suahsak masa den hi. Kithadah sak man, gim le tawl man cih hi lo zaw-in ka tate tawh kizopna ka thupit sak nopna hi zaw hi. Hong suah sak simin “lungdam” “thanuam si u cia” ci’n ka pahtawi na in thanuam sak semsem in ka lungsim hong zongin ka deih ka sap a thei ciangciang uh hong sep hong bawl hong lak sak nuam mahmah uh hi.

Ih nu ih pate’n hong sawl khat a hun lamin mu, sem la thei pak kei leeng hong tawnggawp hong phuisam gawp ek’ thei mawk uha ih sep sak theih hunhun ah lah hong pahtawi tuan lo uh hi. Nu le pa in na khat pepeuh hong sawlkhak ding kilau denin a mau tawh kithuahkhop ding ki-ut lo-in inn a om sa’ngin mi inn peuh nuam kisa zaw thei mawk hi.

Gam khangtote ah laipilte bekin khasum hoih a sang hi tuan lo hi. Nu le pa le siate in naupangte ukna siamna (talent) zui in hilh in pantah uh hi. A hahkatna zui-in pahtawi uha tua in a lawpna uh khang sak semsem hi. Music uk te’n nuntakpih in, kimawl uk te’n zong nuntakpiha laipil te’n zong nuntakpih hi lel hi. Ngaihsutna lungsim cing zolote nangawn pahtawi dan a siamna uh tawh a mau nuntakna khop ding nasep guan zo uh hi.

Sanggam aw, na nuntakna, na innsung nuntakna a kikhel nadingin nang mahmah na kisam-a na lungsimah na ngaihsutna bangin na nuntakna hong kilamdang dinga tua in na innsung nuntakna hong lamdang sak ding hi. Tuangpi