Bangladesh Factory meikang hangin mi 23 si, 70 val liam

Bangladesh Factory meikang hangin mi 23 si, 70 val liam

Bangladesh gamsung aom Packaging Factory khat meikang in mi 23 si a, adangzong mi 70 bang liamgawp cih zanni Saturday (September 10) ni in AFP in genkhia hi. Factory sung aom Boiler puakkhapna panin meikang akipan ahihi.

Tongi State-run Hospital pan Siavuan khat ii genkhiatna ah asipen 15 panin hongki behlap toto hi ci’n AFP te kiangah genkhia hi. Aliam atamzaw pen akangdeu hi uh a, ahuaisialua mahmahte pen Dhaka aom Hospital te ah kipuaksuak hi cihi.

Hih Factory pen Tongi khuasung aom hi a, hih khuapen Industrial Town akicih mahbang in setzung Factory tampi aomna ahihi. Factory pen dawl 4 apha hi a, Boiler Room apuakkhap meikat kipat laitak in Factory sungah mi 100 khawng aomding in ki ummawh hi.

Mei aki phelhkhit hangin Police te’n innsung ah a awkcip khawng aomlai khakding ka lunghimawh mahmah uh ci’n genkhiahi.

Factory ii adawlnuaipen Ground Floor ah Chemical honkhat kihoih ahih manin, tuatenghang inzong hih meikang pen ahuaisiasak tuam hiding in ki ummawh hi.

Hih Factory pen Plastic Packaging tuamtuam apawlna hi a, tuate pen Potato Chips leh Mosquito Coils cihbangdan te tuamna khawngin kizang hi.

Bangladesh gampen nasep nitha sumtawmcik tawh kicialthei ahih manin leitung gamtuamtuam panin Factory tampi kikoih a, Brand minthang tuamtuam tepen hihgampan akibawl ahihi.

2012 kum inzong Bangladesh gamsungmah aom Garment Factory dawl 9 aphakhat nasiatak in meikang a, nasem mi 111 in sihlawh uhhi.

Tuazawh asawtlo kha 6 khitciang in Bangladesh gamsung mahah Clothing Factory khat meikang leuleu a, mi 1138 takin sihlawhmawk uhhi. ZD Sawltak #zomidaily