Launa le lungmuanna ~ Lian Tuang

Launa le lungmuanna ~ Lian Tuang

Kawlpi Micro zumpi ah ka duty laitak 2007 kum September kha a ka thuahkhak thu khat ahi hi. Kawlpi micro pen telephone kizopna zumpi ahi hi. Tedim, Hakha, Falam, Tamu, kawlpi leh Myanma gamsung gampua kizopna phone khempeuh a kilen ahi hi.

Tedim Phone line kisai

2007 kum September ni khat khuahun hoihlo ahih manin Falam le Tedim Micro zumte in set khak uh hi. Zingsang nai 10: 00 am pan akikhak pen sun 12:00 pm ciang kihong kik pan hi. Falam le Hakha line pen kingah kik pah a, Tedim phone line pen ong kingah thei nawnlo hi. Zum le zum kihona ( order wire )bek kingah in phone line ngah thei mahmah lo hi.

Tedim phone line pen Thuamvum mualdawnah micro Tower khat ki koih a tua tungtawnin Tedim phone line a kizangthei ahi hi. Kawlpi zum, thuamvum zum le Tedim zum ka vek un ka bawlbawl uh hangin nitak khuamial dong Tedim phone line ka ngah zo mahmah kei uh hi.

Set a kisiatna pen Thuamvum pan hi cih a kitel ciangin a bawl dingin ka siate in nang va paito mai in zumpihte khatpeuhpeuh tonpih in ong ci ngiau hi. Tua hun pen nitak nai 8:30 pm hi ta hi. Guah zu gelhgelh hi.

Ka thangpai lua

Ka lawmte a om sunsun lah zu kham khin lailai hi. Tua bek hi loin “Tedim phone line kibawl ding aih teh ka duh bangbang nong nekpih masak loh phamawh ding hi” ong ci pah malam uh ahih manin ka thangpai pong in keikia bek nai 9:00 pm in thuamvum pai ding ka paikhia vingveng hi.

Khuadamlua

Guah tam pian ahih manin tuipuan ka silh hangin tawlkhat sungin ka kawtkim veve hi. Theizang le kawlpi kikal ah mawtaw tawh khat vei bekbek ka kituah hi. Apai suk a paito om mahmah lo hi. Theizang ka tun ciangin ka khuadam lua mahmah ta ahih manin ansaite ah tawmvei mei awi ning ka cih leh inn na kikhak gai khin ta hi.

Khuadamlua ka khut kongkaw dekdek ahih manin cycle engine ah ka khut ka hai zelzel hi. Tua bangteng tawh 11:00pm in Taingen khua ka tungto hi. Taingen Exchange zum ah dutyte pong in minute 15 khawng ka khawl hi. Ka khuadamlua mahmah in khualumna ding khat peuhpeuh ong vaihawmsak un, ci kawm in ka puanteng suahkhia in a tui ka suksuk hi. Lenggah tui thawlnih ong pia uh a, thawlkhat ka sang hi.

Bangmah kimu lo

Lenggah tui kampi nih khawng ka dawn pah a, ka puanteng silhkik in ka pai kik pah hi. Guah zu ngelhngelh ahih manin Taingen khuakhung ka tun ma in a kipumsil mah bangin ka kawtkim dikdek leuleu hi. Taingen khuakhung panin guah tam nawn loin phin seuhseuh ta hi.

Ahi zongin huih vot lua mahmah leuleu hi. Tua kawm kal ah meipi kiphut ahih manin bangmah kimu thei mahmah loin damdam in ka kin litlit hi. Khuadak leng mial lua mahmah ahih manin mitsi leng khua a vakzaw ding tawh kibang liang hi.

Ka dipkua lua

Thuklai lamka ka tun ciangin meisah lua in nihvei khawng lam ka pial dektak hi. A nih veina ciangin bang hang hiam cih theiloin ka dekmul ong tho in lau cihtakin ka lau hi. Lehtai dingin ka kitawi hi. Khe tawh tai ding ka cih leh bangmah kimu thei nawnlo ahih manin ka cycle mah ka len tentan hi.

Kilehlenglah nai tuanlo tawlkhat pai laileng Akluai tungzo ding kaihteh ci in tuak bangbang a tuak hi ning cih kawmin damdam in ka kipan leuleu hi. Nai khat khawng ka paikhit ciangin Akluai pam kultal lampi beina lui gei ka tung phei ta hi. Tua lai ka tun ciangin ka mai mahmah lam nihna khawng khatah a tang lela nih ka mu hi.

Cimawh ta

Kei zong cycle khawlsak in a mei tawh kap in ka enen hi. A tang lela pen khat veivei ciang phia zelzel hi. Meikai lua ahih manin ka tel zo mahmah kei hi. Ka dikkua in ka lu ong khang hanhan hi. Lehtai ding lah ngapnawn mahmah lo ka hih manin lamsak maw lamkhang khat zawzaw ah tai ding bek ka ngaihsun ta hi.

Tua bangin suttai ding maw totai ding maw ka cih hangin khuamial lua in bang mahmah kimu theilo ahih manin cycle gei ah tawlkhat ka ding dide hi. Ka lawmte tonpih loin keibek ka pai vatvat se zong ka kisik mahmah hi. Tua laiah khauvak dong ngak ding cih lah zingsang nai 2:00am hi pan ahih manin ka cihna ding mahmah ka thei nawn kei hi.

Sih leh sih

A tang lela pen enen leng khat veivei gol semsem khat veivei neu semsem in phia zelzel hi. Hih bangin khuavak ngakleng khuadamsa in kisi mai ding aihteh sih ding veve ka mai phul phei mai ning ci in ka khensat hi. Cycle tung kahto in damdam in ka hawl phei leh tua a tang lela pen a gei mahmah ka tun ciangin ka tel muh pan hi. Sialtal khat na hi tazen hi.

Cycle zong khawlsak man nawn loin ka tuakziau a, ka tha neihzah in ka awng gawp hi. Ka awm sung ka lungsim sunga om zah in minute 5 sungbang awnggawp in ka kapgawp hi. Ka tha bei dikdek ahih manin sialtal gei ah khephah zeizai in ka tu suk hi. Tawlpi khat sung tuabangin ka tu cip hi.

Launa pan lungmuanna

Tua khit ciangin damdam in khua ka phawkkik a, thukhat ka ngaihsun kha hi. Gamsa le Sialte nangawn lau het loin hih bangin om hithiat thei ahihleh kei zong bang hangin sidek in lau laizang ding ka hiam ci in kei le kei ka kidong kikkik hi.

Hih sialtal lungmuang takin a om hithiat sak Pa in keimah ong Kempa ka Pasian mah hi lo hiam. Amah in leitung vantung khempeuh uk a, a mial penpen na mun zong a uk Pa hi lo hiam. Topa aw hih lai ah keikia kisa in ka laulua hi ci in a gingkhia in thu ka ngen valval hi. Tua ciangin ka launa teng ong bei hanhan hi.

Sialtal tungah zong lungdam ka ko phapha hi. Nuam taktak ing lawm aw, lungmuang taka na om hithiat ka muhteh ka launa teng beimang ta hi. Tua hi kei leh ka lauluat manin ka phulna ding thei loin a silum dektak ka hi ci in 4 vei 5 vei bang ka gengen hi.

Maban zom to

Tua khit ciangin cycle phong kik in damdam in ka pai leuleu hi. Tua a kipan bangmah ka launawn mahmah kei hi. Thuamvum mualdawn pen 3:30 am in ka tung hi. Tua lai ah ka zumpihte khat le palikte nih na om uh hi. Ka khua a dam mahmah lam ka kiphawk kik panpan hi.

Ka puanteng kawt sitset ahih manin suahkhia in meiset tunggah ka pho hi. Ka sep ding teng ka sem pah samsam hi. 5:00am in ka zo hiau hi. Ka puan teng silh kik in Tedim ka pai suak a, 7:30 am in inn ka tung hi. Lian Tuang