Las Vegas ah thau kikapna piang, mi 1 si in adangkhat liam
US Nevada State sung aom Las Vegas khuasung Bus tungkhat ah thau kikapna piangin mikhat kikaplum a, adangzong khatliam cih Telegraph pan kiza hi. Tua thautawh akap pen pasal khat hi a, dawlnih apha Double Decker Bus tungah Saturday zingsanglam 11am hunpawl in thupiang ahihi.
Double Decker Bus pen Cosmopolitan Hotel-casino geinai aom Las Vegas Boulevard ah akhawl laitak in Bus sungah thautawh kikapna buaina akipan ahihi.
Clark County Assistant Sheriff Tom Roberts in agenkhiatna ah thautawipa pen Bus tungah atuang hi a, Bus tungah atuangte mah akap ahihi. Amahzong Bus tungpan in taikhia manlo in Bus sungah omcip cihi.
Bus tungah akikapkha mi 2 tepen zato ah kipuakpah in, University Medical Center Spokeswoman Danita Cohen in agenkhiatna ah khatpen si in, adang khatpen liam ci’n genkhia hi.
Las Vegas Police officer Larry Hadfield ii genkhiatna ah nitaklam 3:30pm hunpawl ciangin thautawipa in athau khia in bangmah buaibehna omlo in vaisiangthei cihi.
Thautawi pen khatbek hiding in ki ummawh a, Police te’n lampan inzong bangmah thaukapna omlo cihi. Thautawipa ii amin apuam Information pen bangmah ki pulak khiatna omnailo hi.
Hih Bus khawlna panin ageinai aom Bellagio, Paris, Planet Hollywood, Bally cih munte ahzong kuamah pusuakkhia ngamlo in ki bucip cihi.
Nitaklam vai asiankhit 4pm hunpawlciang bekin Las Vegas Boulevard sungteng kihongkik panin khuasung mivak khetawh apai cihtezong ki mukikpan hi. Ahi zongin tua Double-decker Bus pen akhawlna mahah omciplai in thunei te’n sitcianna neikawikawi cih kiza hi.
More: Yahoo azatzat huailai mahhiam? Account Billion khatval kiguksak
Tua Bus pen “Regional Transportation Commission of Southern Nevada” te ii Operate ahihi. ZD Sawltak #zomidaily
Comment piaknop aomleh...