Lainatna anei mipawl ~ Cing Van Kim

Lainatna anei mipawl ~ Lia Cing Van Kim

“Zato ah a lum tampi om mah taleh, ko bel cidam, Topa’n hong kem” cih teci panna te ki za ngei ciat hi. Topa’ tung lungdam kohna hi a, hoih mahmah hi.

2020 sung mi tampi in nat le satna tuak bek thamlo, pawl khat in hong sihsan uh hi. Natna ngah lakah zong keimahmah ka kihel kha hi. (Tun bel dam kik khin ing.)

Natna i thuak laitakin, mi khatpeuh in “Ko bel negative ung, Topa’n ong kem” ci-in teci a pangpang laitak “Ko bel na tuak mawk ung e” cih khuankhuan pen na nuam hiau lo hi. A thuak kha te in, “Ei e leh? Topa’n hong kem lo/ hong donlo maw? Siatna khatpeuh bawl hanga daan tat na maw?” cih bang danin Topa’ tungah muanmawhna (doubt) hong lut sak thei gige hi.

Tua banah natna a thuakte in mawhsakna (Victim blaming) zong tampi mah thuak kha thei uh hi. “A tua cih man hi, tua ahih loh man hi, tua ci kei leh tuadan thuak kha hetlo ding hiven” cih bang dan nangawn in a hang khatpeuh ki tang ngawh sak thei peuhmah hi. A hang kithei-in a thuak uh zong om thei mah a, “Nung ciang a vek pi’n i tel ding hi,” cih la i awih hun zong om thei hi.

Tua ahih manin Topa’ tung lungdam koh teci pang ding mah hi napi, teci panna te ah a ngai ding mipi (Audience) pen khinkhai huai masa ka sa mahmah hi. En Topa’ tung lungdam i kohna lian pen mah a dang khat adingin a lawhsapna pen mun uh na hi thei gige a, thanem sak thei zaw sop lai hi.

A thuak te in “Manta khalgah ka nek man hiam, nahtang tolawk ka nek man hiam?” ci-in amau le amau zong kisuang (Guilty) mahmah a, lungsim liamna (Trauma) a tuah laitak a hang zonsak a, i ngawh sak teh “Liamna mun ciangkang tawh holh” bangin thuak lah thei gige uh hi. Tua bang a tuak mite itna tawh a baan (reach) le a don (care) ding pen i mawhpuak na hi thei zaw lai hi.

Topa’ tung lungdam koh pen (a tam zaw) “Personal matter” mimal in Topa tungah private a lungdam koh ding cih ka sang a, a diakin Pasian’ hong piak thupha tawh kisai mipi mai ah teci i pan teh, khinkhai huai ka cih nopna hizaw hi.

More: Gal nihkawm pan tamlawhna ~ Lia Cing Van Kim

Thu a khen sak, mawh paih sak cihte sangin amau te kisapna le lawhsapna te ah a huh a panpih, tha a pia siam, “Lai natna a nei mipawl – society” i neih ding lunggulh huai mahmah hi. Lia Cing Van Kim