Lai sim hahkat in napil dinghi ~ NK Nang

Lai sim hahkat in napil dinghi ~ NK Nang

Lai sim hahkatna pen lawhcinna bulpi ahihi. A thadah te leh mi thusimlo te in laisim peihlo uhhi. Sangkah lai sangnaupang te bek lai sim dingin ih ci zaw a, sangkah nawnlo te lai sim ding kisam zaw san in tam zaw lai hi.

1) Laisim in! Na nuntakna kilamdang dinghi.​​

Lai Siangtho, thuthak tangkona(newspaper), magazine, a kipan online leh offline in lai sim ding tampi om a, lai na sim nopnak leh lai sim ding tam mahmah hi. Lai na sim na pan thu theihna na ngah ding a, tua in thu ngaihsutna thak hong guan in ih nuntakna kilamdang sak pah hi.

2) Laisim in! Thutheihna leh pilna ahihi.​​

Na theihnop thu te a omna lai zong inla sim in. Lai sungah mi hong hilh ngeiloh leh na zak ngeiloh, na theih ngeilo, na zaksa na telloh thu tampi om dinghi. Na lai sim te in thutheihna leh pilna hong pia dinghi.​​

3) Laisim in! ​​ Mikhialhna te leh hoihlohna te panin ki puahphatna kingah hi.​​

Mi khialna te leh mi hoihlohna te hangin a thuakna te uh na lai sim na pan na kipuahpha thei pah dinghi. Tamveipi tak na hoihlohna hangin na hun zat te lai na sim kipanin a hoih lam in hun na zang pah dinghi.​​

4) Laisim in! Vei tampi nuntakna ahihi.​​

Lai na sim hangin na tuakkhak thu te en kik inla, mailam ah na nuntak pih thu te nakpi takin kisin in hanciam in hai nuntak, khelnuntak, uisan nuntak, guktak nuntak, mithat nuntak, migensiat nuntak, vankham zuak nuntak a kipan a sia a nuntakna te laih inla, a hoih in nungta in. Bangci nuntakna hiam cih lai na simna panun na kiphawk dinghi.​​

5) Lai sim in! Hun manpha ahihi.​​

Tu lai in thu hoih, thucing, thupil a sau pian te kisim peih nawnlo in laibu hileh, phone hileh, computer hileh a tom thei thei, a khel tat thei thei, numei vai ta ta, guta vai, beh leh phung kilem loh vai leh misi vai teng ki en ziauziau hi. Thu hoihlo simna ding leh etna ding bek in hun zat pen pammaih lua hi. A hoih te, a laigil te etna leh ngaihna in zong nei ni. A sau te sim zo leng thu kicing zaw hi.​​

6) Laisim in! Mi tawh kihona ah a kilawm kammal te na om dinghi.​​

Kamsiam leh kamkhum zaknop ih sak mahmah hangin tua bang kammal te a zang mi tam hetlo hihang. Kammal kilawm te tawh kamsiam dakdak khawng kizahpih in kamkha leh kammal zaknoploh te zattang zangin kizangin kingeina seh zaw lai hihang. Kammal kilawm te lai ah sim ding tampi om hi. (English book : How to Win Friends and Influence People by Dale Carnegie).​​

7) Laisim in!​​

Lungsim hoih leh ngaihsutna hoih te in na lianpi sem thei hi cih laisimna pan kingah hi.​​

8) Mipil te lai gelh te sim leng sinna kingah hi. (e.g. Think and Grow Rich by Napoleon Hill)​​ Laisim in! Tulai tak a, na omna leh na dinmun pen nang ut/tel ahihi. ​​

Makai/sia khat na hih leh mipi hong tel/seh hi ding a, tua pen makai/sia na ut/tel hang ahihi. Sih leh sih hau nuam ing ci-in kumpi vankham zuakin thongkia le cin tua pen nang tel ahihi. Vantung gam maw, Hell gam maw na tun leh kuamah kingawh theilo dingin nangtel hi, hong ki ci dinghi. Na tel ahihlam kithei in. (e.g. The Strangest Secret by Earl Nightingale, Choose Yourself by James Altucher)​​

9) Lai sim in! ​​ Na ngah nailohpi(dream) ne kei in.​​

Mikhat in a mangin a gamla mahmah khatah suang manpha tampi mu hi. Tua pen a khanlawh teh a taktak in omlo hi. Tankhat(primary) sintak sa lo, tansawm(high school) zolo pi in PhD bek na ngah nuam hiam? Nasep lut nailo pi in khasum a kisang khol thei diam? Lai ih simloh man leh thu ih theihloh man in tu laitak a, ih omna leh ih nitha hawmthawh in sum neilo in anngawl liangin ki thadah suah thei hihang. Lungsim man lo leh ngaihsutna manlo te pan na lai sim in hong suakta sak dinghi. ​​ (e,g. The Alchemist by Paulo Coelho)​​

10) Lai sim in!​​ Na ngetna kithusimlo, siamna lah nei lo takpi leh lawhcin nei thei mahmah lo te a dingin lungsim khauh, kuhkal na tawh na sem teitei in gualzawhna ngah ve ve hi, cih zong mi lawhcing te tangthu sim ding tampi om hi. (e.g. How to Fail at Almost Everything and Still Win Big by Scott Adams)​​

11) Lai​​ sim in! Na lungsim leh na cidamna kem(control) in. Cidamna ding thalakna(exercise) tuamtuam te leh lungsim hatna ding tawh kisai lai te zong sim in. (e.g. Gorilla Mindset by Mike Cernovich) Sum bei ding kita kei inla laibu, audio leh video te lei in. Sum bei lo in zong online ​​ leh offline ah sim ding tampi om hi.​​

Lai sim hun sung pen hun man pha mahmah sung hipah hi. Na hun awng sung in cim liang kuai liang in om kei inla, ni khat in a tawm pen minute 30 sungbek sim lecin zong kum khat in nai 178 sung lai na sim dinghi. Lai simsim le cin na pil sem sem ding a, na pilna hangin nuam na sa ding hi (Paunak 2:10). NK Nang