Lai Siangtho letkhiatna thu ~ Rev. Pau Lian Mang

Lai Siangtho letkhiatna thu ~ Rev. Pau Lian Mang

Lai Siangtho letkhiatna vai kikupna ah letkhiatbu a tuamtuam hong omna thu leh Tedim kam tawh letkhiatbu neihna thu, ci-in thuguipi nih i sut ding hi.

1. Lai Siangtho Letkhiatbu Tuamtuam Hong Omna Thu

Lai Siangtho i cih pen Pasian’ hong kilaakna thu mihingte’ ciaptehna hi. A cingzaw deuh in gen lehang, Lai Siangtho i cih pen Pasian’ hong theihsaknop thute, a diakdiakin hong itna thu, vanpi leipi leh mihing nuntakna’ adinga itna tawh hong khunsaksa hong geelsaksa thute hong lahkhiat teng mihingte’ lampan Kha Siangtho’ humopna tawh ciaptehna ahi hi.

Kha Siangtho’ humopna tawh ciamteh cih ciangin kha kam kha pau kizang cihna hilo hi. Kha Siangtho in mihingte’ lungsim sung hong luahin Pasian’ deihna hong theisak a, tua hong theihsak thute mihingte’ zatsa kampau kammalte mah tawh a kigenkhia kik ahi hi.

Mihing’ kampau cihna ah zong kampau khempeuh hi pah lo-in Pasian’ hong kilaakna ah a phungpi, a thupipen ahi Jesuh Khrih mihing hong pian nadinga Pasian’ sehsa Jew minam, tua mite’ zat Hebrew kam tawh ki ciamteh hi. Tua pen Hebrew Lai Siangtho kici a, en Thuciam Lui i cih pen hi. Hebrew Lai Siangtho limtak teltheih nadingin Talmud, Midrash cih bangin genbehna laibu pawlkhat kibawl hi. Tuate ah Hebrew kam veve awsuah awkaih a tuamtuamte zong zang lel uhhi.

Pasian’ hong kilaakna a phungpi ahi Topa Jesuh hong khan ciangin Thuciam Thak hong piang hi. Tua hunin leitung ah Greek kam ki tamzat pen ahih manin Jesuh leh sawltakpite-a kipan thu-um masate a tamzaw Hebrew kam zang Jew mi vive ahih uh hangin Thuciam Thak pen Greek kam tawh kigelh hi.
Tua mah bangin Lai Siangtho bup zong kitangsapna zui-in letkhiatbu tuamtuam kibawlbeh hi. Letkhiatbu cihna ah kam tuamtuam tawh letkhiatna leh thuluanzia (version) a tuamtuamin letkhiatna, ci-in nampi nihin kikhen thei hi.

(a) Kam tuamtuam tawh letkhiatna

Jew mite tangtawng pan leitung mun citeng ah kithehthang uh a, khang tampi a sawt ciangin a minam kam uh thei nawnlo, ahihkeileh deihzah tel zo nawnlo uhhi. Tua hangin Hebrew Lai Siangtho pen amau’ tel kim ahi Greek kam tawh letkhia uhhi. Septuagint kici hi. Jew mipil 72 (beh 12 pan taangmi 6 ta) in a sepkhop uh ahih manin Greek kamin sawmsagih a cihna min a kivawh, kici hi. Topa Jesuh’ suah ma kum 250 kiim pan a kipat uh hi a, Topa Jesuh’ hunin kizosiang khin, kilimzat mahmah ta, ci hi.

Hih Septuagint pen Hebrew kam a theilo Christiante in zong phattuampih mahmah uhhi. Thuciam Thak ci leng lah vekpi’ theih Greek tawh kigelhsa, tu-in Thuciam Lui zong Greek tawh om ta ahih manin Lai Siangtho bup nuamtak a sim thei ta hi pah uhhi.

Christian upna kizel semsem, thu-umte zong minam namkim semsem banah khanghun zong kilaih toto ahih manin Lai Siangtho zong Greek kam bek kicing thei nawnlo hi. Tua hangin a bu bup ahi zo kei zongin a khenkhenin kam tuamtuam tawh kiletkhia toto hi. Tuate lakah Coptic (tanglai Egypt kam), Gothic (tanglai German nisuahlam minamte’ kam), Armenian, Georgian, Ethiopic, Arabic, cihte a min kidawk deuh hi. Latin Vulgate (382 CE) pen a bu bup ahih manin Hebrew/Greek ahilo kam dang tawh Lai Siangtho a kinei masapen suak a, a minthangpen zong hi pah hi.

Minam kampau a tuamtuam tawh Lai Siangtho letkhiatna pen tangtawng pan tuni dong kizom toto hi. Leitung Bup Lai Siangtho Kipawlna (UBS) in a genna ah leitunga om kampau nam 7350 lakah 692 in Lai Siangtho a bupin nei khin, ci hi. 1547 in Thuciam Thak leh 1123 in a tumtawng nono nei khin a, 3988 in bangmah nei nai vet lo, ci hi. Tua hi a, “Mi kim’ ading Lai Siangtho” (the Bible for Everyone) cih pen UBS ii dinpih, khutlet thuciin ahih manin Lai Siangtho letkhiat nasep kizom toto lai ding hi.

Thukhat ah, UBS in tua bang sepna ah paizia sepzia kician nei hi. Mi kim’ ading Lai Siangtho cih ciangin mi kim in Lai Siangtho a simtheih nading, a simkhak nading cih hi a, minam kampau khatpeuh kepcing nading leh laptoh nading hi masa lo hi. Kampau khatlekhat kidemna zong hilo hi.

Tua banah leitung laibu dangte bang hilo ahih manin a zang ding Christian pawlpite ii kitangsapna enkak hi. Kampau kinaina kihalna enkak hi. Mimal phazah en hi. A zang ding pawlpite’ kipawlna pana a kiseh lailet dingte (translator or team of translators) kipsakna nei hi. Tuate Lai Siangtho letkhiatzia thusinna kiciantak pia hi. Tuate’ sepsa teng a enpha dingin Review Committee dingsak hi. Lailette’ thudot dingin Lai Siangtho letkhiatna lam a siam Thudotpi (Consultant) khat sehsak hi. Tua Thudotpi tawh kikumin kisemkhawm hi.

Lai_Siangtho letkhiatna ah hun sawtzah ding zong a kip lian om theilo ahih hangin UBS in a huamin sehna khat nei hi. Lai a nei nailo minam, ahihkeileh lai tawh a kinahvawh mello minam ahihleh Thuciam Lui kum 5, Thuciam Thak kum 4, a kigawm kum 9 kiimin zawh ding kilamen hi. Hih pen nidang lai, van le na leh kizop kikawmna a haksat mahmah lai khawngin a thubaih lo thu hi a, tu-in ahihleh ahithei ding thu hong hita hi. Lai a neisa, Lai Siangtho zong a neisa, thuluanzia (version) a dang khat a kivaihawm ahihleh kum 9 pi sawt kul nawnlo ding a, ci a damleh kum 5 kum 6 sungin kizo thei dingin lamet om hi.

(b) Thuluanzia a tuamtuamin letkhiatna

Lai Siangtho pen kam tuamtuam tawh a kiletkhiat banah kampau kibang veve, thuluanzia (version) tuamtuam tawh zong kiletkhia hi. Gentehna-in Mang kam tawh Lai Siangtho bukhen kimkhat a kiletcil pen 700 CE pawl hihtuak hi. Tua khit, Mang kam tawh a bupin a kiletkhia om toto a, tuate lakah Wycliffe’s Bible (1400 CE kiim), Tyndale’s Bible (AD 1530 CE kiim), King James Version (1611 CE), cihte minthang deuh hi.

Tuhun ciangin Mang kam thuluan letkhiatbu nam tampi om khin cih i theih tek ahi hi. Tua hi a, thuluan letkhiatbu nam khat a neih khit nung-uah kicing ta, phazo ta ci lo-in thuluanzia a kibanglo letkhiatbu a tuamtuam neihbeh ding hanciam uh ahihna teltak kimu thei hi.

Tua ahihleh bang hangin thuluan letkhiatbu a tuamtuam bawlbeh kul se hiam?

Lai Siangtho cih pen thuthuk thugil, thu tangzaipi khat hi a, letkhiatbu nam khat bek tawh a kitel sinsen, a kituak linlianin lahkhiat kim ding thubaih lo hi. Kammal a kituak lianlian ding hanciam lua lehang laigualte maan mahmah ding hi napi a gennop kitel nawnlo thei hi. A gennop thu a kitel ding thupisak lua-in kammal/laigual puah gawp, zem gawp lehang lah a thupiang masa bulpi taktak bang hiam cih kitel nawnlo thei zel ding hi. Tua thu hangin thuluan letkhiatbu a thakthak bawlbehloh hong phamawh hi. Mailam hun ah zong a hoih nono kibawl toto lai ding hi.

Tuabanah Lai Siangtho i cih himhim zong a kigelhcil lai-in tu hun danin laibu a kisuah ziauziau zo pah hilo hi. Tungmanpek, singpek, savunpek tung khawngah khut tawh a kigelh masa hi a, khat a siat ma-in a dang khat a kiteikik toto, tua pen khang tampi sung, mun tampi ah kisem ahih manin a thu a kibang veve, a luanzia a nam tuamtuam hong om toto ahi hi. Tua hi a, Lai Siangtho a pianna Hebrew leh Greek khutgelh laite mahmah zong thuluanzia a namnamin om ahih manin letkhiatna ah zong thuluanzia tuamtuam a om ding mah ahi hi.

Lai Siangtho letkhiatzia a tuamtuamte a huampi-in en lehang nam nih kisuah thei hi. Khatna ah thupiangte leh kammalte ahi bang lianin, ahihkeileh a kinaitheipenin letkhiat nam (literal, word-to-word) hi a, nihna ah Lai Siangtho a khiatna laigil a kipelhloh ding bulphuhin kammalte leh laigualte a telbaih dinga kilemtuah nam (dynamic, easy-to-understand) ahi hi. A nam nihin a hoih tuak, a kul tuak hi a, a langkhat ah a nam nih mahin thanemna, paubanna nei tuak veve hi. Lai Siangtho letkhiatbute i et ciangin khat lamah lekzaw ahih hangin a nam nih mahin a zatkhopna mun zong tampi om cih kimu thei hi.

Mang kam Letkhiatbu a masapen ci-a kiciamteh Wycliffe Lai Siangtho pen John Wycliffe (c. 1330–84) ii hanciamna tungtawn hi a, a lawmte leh a sangnaupangte in 1383 kumin nam khat, 1388 kumin a nam dang khat, suahkhia uhhi. A khatna pen kammal a tu lianlian nam hi a, a nihna ah khangmite’ teltheih ding tualsung kamzat tampi kihel ci hi. Mang kam tuaktuak, a min nangawn a kibang kimlai mah nam nih a bawl uh pen kisam a sak man uh ahi hi.

Wycliffe zom ah letkhiatbu a minthang Tyndale Lai Siangtho zong khangmite’ zat kammal tuamtuamte suaktatak zang, kici hi.

Mang kam letkhiatbu a minthang mahmah King James Lai Siangtho a kiletkhiat lai-in endikte’ lunghihmawh deuh thu nih om ci hi. Khatna ah Hebrew ahi-a Greek ahi zongin Lai Siangtho sunga kammal/laigualte a kitel sinsen lo om thei a, tua laigual ii a khiatna khensat ding a haksat hun om thei hi. Tua bang hun ciangin a pang ah koi hizaw ding cih genbehna pia uhhi. Nihna ah Lai Siangtho’ gennop thu a kitelzawk nadingin Hebrew/Greek kammal khat bek zong Mangkamin mal tampi suah uhhi.

Gentehna-in Thuciam Thak sungah sawmnih-le- sagih vei a kizang “katargeo” cih kammal khat bekbek pen “abolish, cease, cumber, deliver, destroy, do away, become (make) of no (none, without) effect, fail, loose, bring (come) to naught, put away (down), vanish away, make void” cih bangin kammal nam sawm-le-giat tawh letkhia uh, kici hi. Hih zong letkhiazia nam khat mah hi pah hi.

Letkhiatzia nam tuamtuamte a hoihzaw leh a siazaw cih om tuanlo hi. Ei’ kisapdan zui- in zatsiam ding hi bek hi. A tunga i gen Mang kam letkhiatbute mahmah zong amau’ khanghun lai-a amau’ kitangsap thu tungtawnin amau tawh kituakpen khat a zat uh ahi hi. Tua hi a, letkhiatzia a nam i teelna ah “kuate’ sim dinga kibawl” (who are the targeted people?) cih dung zui-in a tawmpenin a nuai-a thu nih ngaihsutkak ding ahi hi:

(1) Hih Lai Siangtho a sim ding minamte sungah thu-um mi tamzaw maw, tawmzaw?

Thu_um mi a tamzawkleh Lai Siangtho zong amau’ teltheih dingin kibawl thei ziau a, thu-um mi a tawmzawk zenzen leh amau’ mipih thu-umlo mi a tamzawte’ telpih dingin bawlhuai cihna hi. Judson topa Kawl kam Lai Siangtho letkhiat ding a kipat lai-in thu-um mi om nailo, a omleh zong tawm mahmah lai ahih manin a tamzaw ahi thu-umlo mite’ teltheih dingin Pali kammal tampi zang hi. Tu ma kum 200 lai-a a sep hi a, tua hun-a kipan tu ciangdong mah a khengkhia zo ding om lo hi. Thukhat ah, tu hun ciangin Kawlte nangawn Pali thanem ta uh ahih manin Kawl kam veve mah letkhiatbu a dang hong piangkhia ahi hi.

(2) Hih Lai Siangtho a sim ding mite, pau le lai lamah bangci ciang tung ta uh hiam?

Pau le lai a khangtosa mite’ sim dinga i bawl ahihleh tua mite thu-um thak ahi phial uh zongin Lai Siangtho thuktak zaitak a theih nading uh ahih nakleh kammalte leh laigualte a haksat hangin phamawh lo hi. Tel pah kei ta le-uh a pilsa uh ahih manin lungngai khinkhai-in damdamin tel veve ding uhhi. Pau le lai a khangto nailo mite’ sim ding ahihleh kammal zatdan leh laigual kilamziate a theih-ol theithei ahih ding thupi hi. Tua mah bangin minam khat sung veve khangham, khangno, naupang ci-in kum le gual zui ahi zongin, gamsung leh gampua cih bangin omna mun zui ahi zongin letkhiatbu a tuamtuam kibawl thei hi.

Cope topa Tedim Lai Siangtho lethiat a kipatcil lai-in i minam nuntakzia niam mahmah a, bangmah kinei lo hi. Pu Pau Cin Hau’ hong phuatsak lai om khin ahih hangin Cope topa in Lai Siangtho letkhiat nading taktakin cing sa zolo hileh kilawm hi. Tua hangin amahmah in Lai hong phuatsak hi. Lai hong hilh hi. Sim ding laibu hong bawlsak hi. Na khempeuh a patna pan a pat ahi hi. Hi napi, Lai Siangtho hong letkhiatsak ciangin kammal a tu lianlian nam na zang hi. Lai a siam nailo minam i hih hangin Cope topa in i pu i pate’ tel dingin Lai Siangtho na bawl thei ahih manin Cope topa’ lai siamna leh letkhiatzia a nam a teelsiamna kilang mahmah hi. Tu-in ama’ hong phuatsak lai leh ama’ hong letkhiatsak Lai Siangtho tungtawnin i minam in khuavak mu-in pilna siamna a nei tampi i om ta hi. Lai nasepna, laibu bawlin simna cihte zong tampi khangto ta hi.

2. Lai Siangtho (Tedim Kam) Neihna Thu

Leitung ah Lai Siangtho a bupin a nei khinte lakah ei Zomite zong kihel i hih manin Pasian’ thupha lianpi ahi hi. Sangmang Cope topa’ hanciamna tawh 1932 kumin Thuciam Thak i nei hi. Rev. Kam Khaw Thang in TBA vaihawmna tawh 1960 beikuan lam pan Thuciam Lui letkhiat kipan a, 1974 kumin zo hi. Tua Thuciam Lui leh a omsa Thuciam Thak (Cope Topa’ letkhiat) gawmin a kibubawl pen 1977 kumin a laibu kingah ahih manin tua kum pen Lai Siangtho bup i neih masak kum hong suak hi.

Nasep kizomto suakin Rev. Kam Khaw Thang mah in Thuciam Thak letkhia leuleu a, 1982 kumin zo-in 1983 kumin a laibu hong suakkhia hi. Tua hi a, tua kumin tualsung mite’ letkhiat Lai Siangtho bup a kinei ta ahi hi. Tua nungah TBA in Zomi Christian Literature Society (ZCLS) tungah Lai Siangtho nasepna maban ap hi. ZCLS in zong Lai Siangtho enphatna nei toto-in a hun zui-in hong bubawl zelzel hi. Tu-in zong khanghun paizia en kawmin khangthakte’ phattuam ding deihsakna tawh Lai Siangtho a thak khat letkhiat ding geelna nei a, 2018 April panin letkhiat nasep maban thak khat a kipan ahi hi.

Lai_Siangtho (Tedim kam) vai genna ah a tunga nambat khatna-a i gen, kam tuamtuam tawh letkhiatna leh thuluanzia a tuamtuamin letkhiatna, cih letkhiatna nam nih mah bulphuhin i genbeh ding hi.

(a) Tedim kam kipsakna

I minam sung Lai Siangtho letkhiatbu i neih masak pen ah Tedim kam a kizatna pen a nuai-a thute tawh kizom hi.

Cope topa in Tedim gam (tu hun Tedim leh Tonzang gamte) ah lai (script/writing) hong phuatsak ding ciangin bang kam bulphuh ding cih ngaihsut masakin nei hi. Sihzang kam kitamzatpen kici ahih manin Sihzanng kam sin pah hi. Zolai a gelh masakte zong Sihzang kam tawh gelh hi. Ahih hangin Sihzang kam kithei kim lo ahihlam a theih ciangin Tedim kam sin leuleu a, laibu pawlkhat zong Tedim kam tawh gelh hi.

Lai a kip khat a om ding deih ahih manin 1913 kumin Kamhau Ukpi Pu Hau Cin Khup’ kiangah, “Na zat ding uh lai kong bawlsak ding hi. Tua ahih manin bang kampau zang leng hoih na sapen hiam?” ci-in dong hi. Teizang kam a zang Pu Hau Cin Khup in, “Mipite’ deihpenpen hilo dia” ci-in dawng hi. (Cope Topa’ Tangthu, laimai 73 pan).

Tua tawh kizui-in Cope topa in 1919 kumin Tedim gam leilulam ukpi siahkai khempeuh leh upa pawlkhat banah Sihzang kual, Gungal kual, Tonzang kual leh Guite kual sungpan khua khat panin mi khatta kaikhawmin Tedim khua ah thu kikupna khat bawlpih hi. Kikupna mun pen tu hun Tedim vuandok zum (General Administration Department) mai, pangpi kung (tu-in kiphuk khin) nuai, kici hi.

Tua kikupna ah Cope topa in Sihzang kam tawh kigelh, siktawlai tawh kikhen, laidalpi dal 20 bang a pha, “Hat Lian Bu” (Jack the Giant Killer) kici tangthu khat simkhia hi. Kuamah in a telloh ciangin Cope topa in, “Tua ahihleh bang kampau tawh lai bawl ding i hi hiam?” ci- in dong hi. Tua ciangin kikupna ah a kihelte in a nuai-a bangin ngaihsutna pulak tek uhhi:

(1) Guite kual taangmite’ thusunna: Paihte kam a zang, Tuimui hausa Pu Mang Za Thang in, “Paihte kam tawh bawl lehang kuamah in thei lo ding hi. Tedim khuapi- a kizang kampau tawh bawl lehang kitelkimpen ding hi” ci hi. Paihte kam a zang, Haiciin hausa Pu Tual Pum in thukimpih pah hi.

(2) Thahdo kual taangmite’ thusunna: Thahdo kam a zang, Hiangzang hausa Pu Zam Khaw Thawng in, “Ko Thahdo kam tawh omleh kuamah’n thei lo ding hi. Tedim khuapi-a kizang kampau-in omleh hoihpen ding hi” ci hi. Thahdo kam a zang, Hangken hausa Pu Kam Pum in thukimpih pah hi.

(3) Zo kual taangmite’ thusunna: Zo kam a zang, Salzang hausa Pu Zaang Khaw Lian

in zong, “Ko Zote’ kam kuamah’n tel lo ding hi. Tedim khua-a kizang kampau mah hileh kitelkimpen ding hi” ci a, Zo kam a zang Phaitu hausapa Pu Khan Thang in thukimpih leuleu hi.

Tu-a bangin hausa lian 6te’ genna leh upa a pai khempeuhte’ thukimpihna a om ciangin Cope topa in mipite’ ngaihsutna dong hi. Mipi lungkim ahih manin Cope topa in Tedim gamsung laigelhna ah zattang dingin Tedim khuapi-a kizang Tedim kam kipsak hi. Tua kum October kha-a kipan Tedim kam tawh “Tedim Thu Kizakna Lai” (The Chin Hills News) suaksak a, biakna laite leh laisimbu a bawl khempeuh zong Tedim kam vive tawh bawl hi. Tuate lakah Lai Siangtho zong a kihel pah ahi hi.

Tua_hun a Tedim gam i cih pen zai mahmah hi. Tonzang gam leh Cikha dong huam hi. A nungciangin Tonzang in township (1965?) hong ngah a, township nih a nei i hih manin i minam bup lungdamna ahi hi. Cikha leh Khaikam in zong town ngah uh ahih manin i gam sung khantoh gimnam mahmah hi.

Nidanga Tedim gam a kici, hih township 2 leh town 2 a omna gam sungah hun khat lai- in kampau khat tawh Lai Siangtho a simkhawmte, sangte ah kampau khat a sinkhawmte i hi hi. Tua hangin zong hih khua leh gam teng i gen ciangin khatveivei Tedim gam kici ziauziau kha thei hi. Tua pen kumpi’ hong piak thak township leh town-te thusimlohna hi peuhmah lo-in hun khat lai-in gam khat hi lua i hih manin i lungsim sungah kituam ngaihsut thei mahmahlo i hih man hi. Thukhat ah, tua banga i lawh teh Tedim bek thupisak (ki-Tedim-sak) ci-in a sangkhial zong om thei ding ahih manin khang thak gamvai kipuakzia zui-in min thakte tawh lawh theih ding zong a thupi khat hi veve hi.

A_langkhat leuleu ah, hun khat lai-in “Tedim” cih pen khua min bek hilo a, tua min tawh i minam leh i gam hong kilo ahihlam khang thakte in i theih i phawk ding kisam hi. Zomite minam khat, gam khat-a hong kiciaptehcilna min pen “Tedim” hi. Tua hi a, tu hunin i kilawhna i gam minte a tuamtuam hi phial taleh minam khat, gam khat i hihna thute mangngilh lo-in i kipumkhatna i khahsuah loh ding i lunggulhpipen ahi hi.

(b) Thuluan letkhiatbu a thak

Lai letkhiatna ah “ahi bang liana lakna” (literal) leh “a kituak dinga lepna” (dynamic) ci-in nampi nih om cih i gen khin hi. A nam nihin hoih tuak ahihna leh a zat-huaina mun tek om ahihlam zong i gen khin hi. Lai Siangtho letkhiatna ah nam khat bek a tuamin zang cihdan tam lo-in nam nih gawmin khatzawzaw lamah lek deuh cihdanin kizang a, khatlekhat a lekzawkna zah kikim lo, cih ciang bek ahi hi.

Tu-a i neih, tu laitak-a i zat Tedim kam Lai Siangtho pen a nihna nam tawh kigelh ahi hi. Thuciam Lui 1974 kumin kizo hi a, Thuciam Thak 1982 kumin kizo hi. A simdan nuamin a khiatna zong kitel mahmah a, i minam bupin i phattuampih Lai Siangtho letkhiatbu a hoih mahmah khat ahi hi.

Tua ahih manin hih bang Lai Siangtho hoih hong pia i biak Pasian’ min i phat hi. Tua banah 1960 kumbei lama kipan nasep hong kipan, i pa ahi Rev. Dr. Kam Khaw Thang tungah ahi zongin, Lai Siangtho nasepna ah inntek a sem masa TBA tungah ahi zongin, a nung lam ciang inntek maban hong lato ZCLS tungah ahi zongin nakpi-in i lungdam hi.

Lai Siangtho a hoih mahmah khat hong pia khin Pasian in hoihna kicing i muh semsem nadingin hong makaih leuleu hi. Tu-a i neih pen “a kituak dinga kilem nam” (dynamic) ahih manin “ahi bang liana kila nam” (liternal) zong i neih lai ding kisam cih makaite na phawksak hi. Tua hangin ZCLS in inntek semsuakin UBS leh BSM’ vaihawmpihna tawh Lai Siangtho letkhiatbu a thak khat a kisep laitak ahi hi.

Hih letkhiatbu a thak hong kizawh ciangin i minam sungah Lai Siangtho letkhiatbu a nam nihin a nei i hiding a, a mannei theipenin i zat ding ahi hi. A kituak dinga kilemsa i deih ciangin a lui i en ding a, ahi bang liana lak ding i kisap ciangin a thak i sim ding hi. Innkuan tek leh pawlpi tek ah a nam nihin i koih ding a, a nihin simkhawm enkakin tha i la ding hi. Biakinn sung leh mipilak simkhiatna ah a lui mah zang phot ni i cihleh zatding hi pah a, a thak zong zat zelzelhuai sam ee i cihleh zong ahithei thu mah ahi hi.

Thusun Tomlahna

• Lai Siangtho Letkhiatna Thu
• 1. Lai Siangtho Letkhiatbu Tuamtuam Hong Omna Thu
• (a) Kam tuamtuam tawh letkhiatna
• (b) Thuluanzia a tuamtuamin letkhiatna
• 2. Tedim Kam tawh Lai Siangtho Neihna Thu
• (a) Tedim kam kipsakna
• (b) Thuluan letkhiatbu a thak

Rev. Pau Lian Mang, D.Theol (Bible Translator, Zomi Christian Literature Society Myanmar) May 27, 2020 Wednesday Tedim