Myanmar, Kyaiktiyo Pagoda ah kum 4 sung gamdangmi lutman Kyat Thein 29,687 kingah

Myanmar, Kyaiktiyo Pagoda ah kum 4 sung gamdangmi lutman Kyat Thein 29,687 kingah

Myanmar, Mon State sung aom Kyaiktiyo Pagoda kici Buddhist Temple ah gamdangmi te alutman kila ciatciat hi. Tua Kyaiktiyo Pagoda ah gamdangmi te lutman kum 4 sung akidongpen akigawm in Kyat Thein bekbek 29,687 ngah cimawk hi.

Mon State panin Lutdaw akah makaikhat in thudotna tawh kisai in agenkhiat cih DVB tungtawn in kizasawn hi.

2013 November panin 2017 November kikal kum 4 sung sumngahna apulakna ah Kyaiktiyo Pagoda Zone sungah lutman akingah pen Kyat Thein 29,687 tak cihi. Hih sumte pen gamdangmi khualzin te tungpanin lutman akila sumbekbek hi a, State Municipal te makaihna tawh akidong ci a, akingah sumte pen State sumin kikoih cihi.

Gamdangmi te lutman Entrance Fee bekthamlo, Kyaiktiyo Zone sungah kisilbuk, dailenbuk, ansai cihbang in sumzonna atuamtuam Business 94 bang om a, tuate tungpan inzong tukumsung Licence Fee Kyat 22 Thein kingah hi. Tuaban ah zintunbuk Hostel Business akigawm in 8 bang om a, tuate tungpan inzong tukum Licence Fee Kyat 10 Thein kingah cihi.

Kyaiktiyo Pagoda ah Zone lutman abeisa in gamdangmi Foreigner khatciang in Kyat 6000 akila hi a, ahi zongin tukum October 05 ni akipan Kyat 10,000 ah kikhang sakta hi.

Kyaiktiyo Pagoda pen “Golden Rock” ci’nzong gamdangmi te’n theimahmah uh a, Myanmar gamsung aom Pagoda khempeuh lakah aminthang mahmahkhat ahihi. Myanmar gamsung ah Buddhist Pilgrimage te’n apainop diakna Pagoda minthang tepen Shwedagon Pagoda, Mahamuni Pagoda leh Kyaiktiyo Pagoda cihte hiphadiak hi.

Mon State sung aom Kyaiktiyo Pagoda khatpan bekbek inzong sum tampi alut himawk hi. Yangon aom Shwedagon Pagoda ahzong gamdangmi Foreigners te alutman December 01 ni akipan Ks.10,000 ah khangsak tading ci’n nungdiak in thunei te’n genkhia uhhi.

More: Shwedagon Pagoda ah gamdangmi te alutman Ks10,000 ah kikhantoding

Buddhist biakna thuzui pawlkhat inbel Myanmar gamsung aom Pagoda te ah lutman akilak pen diksalo in gencipcip uhhi. Buddhism akhantohding ih lunggulhleh Pagoda minthangte ah gamdangmi te lutman laklakding hilo hi ci’n aphunphun pawlkhat om uhhi. Ei Christian te lah biakinn ah kikhawmding in nekledawn tuamtuam tawh akizolzol pawlkhat omven mate. Zogam khua pawlkhat bangah pawl suakthak aomleh sikkang leisak cihmah bangmah atuamtuam kiza hiauhiau ngeiven maw….. Sawltak #zomidaily