Kung dong ah… Nk Khanno

Kung dong ah… Nk Khanno

Nikhat university sangnaupang pawlkhat munkhat ah hong kimu uhi. Khat veivei nui ngeingai zel, khatvei ciang lah dai khipkhep…… Kimlepam a mi pawlkhat te’n, “Hihte en huai si e, ei zong hibang in lawmlegual tawh holim khawm nuam tak hang..” a ci tawh…, “Hih sangnaupangte gei neh keivou, a mau banghih cih kithei lo.” a ci tawh… thu tuamtuam om mah leh tua sangnaupangte in a mau ngei bang in om lel uhi.

Kei zong hihte’n bang thu gen hi peuhmah ding hiam ci –in, ka va ngaih leh…….
“Ka neu lai sang kakah cil in ka nu kiangah, “Nu aw, kei tan sawm bek ong nuam” ka ci hi. Kum te hong beibei in kei zong tan sawm ka tung ta hi. Laite zong hoihtak sinthei in siate leh nulepa te’n zong hong muang mahmah uhi. Tan sawm laivuanpi ding zong hong nai ta aa, kei zong ka kilimgin mahmah hi. Tua laitak in khuasung ah natgualpi khat hong tung hi. Ka lawmte zong a banban in hong puk deudeu uhi.

Lamet lohpi pi kei zong tua natgualpi hang in ka pukta hi. Border pan in inn ka ciah hi. Zatang tawh dam ziau lel ding ka kisak leh, inn pan zato ka tung pah mawk hi. Khua phawk mello, ahih hangin ka lungsim tawngah ka phawk kiukiau khat in ‘zanitak aa border ah – tunitak ciang zato ah, zani aa lai simsim – tuni thawlpi kikhaikhai, khatvei aa ka nu nuih mai – tu ni ciang khitui tawh kidim. Aw kei si ziau leng vai siang zaw cih sim.

Hi bang ngaihsutna te kawmkal ah “Nu kei tan sawm ong nuam” cih kammal ka bilkha ah ka za ciaiciai hi. Aw kei tan sawm a tung hi pan, tan sawm ong pa hi nai lo pi ingh e. Tan sawm bel ong hamtang ding e ci’n keilekei tha ka kipia kik hi. Nitam sim pian sung zato kalup khit ciangin, ka tuak theita hi. Damkang pi mahin sang laite zui kik, sin khak lohte kan kik cihtawh tan sawm laihuanpi phi ding ka kipan kik hi.

Laihuanpi hong tun taktak ciang in ka nu in, “Boih aw, tu kum tawl nga phot ve” hong cih ciangin ka nu deihna in bang cih ka thei hi. Ka nu hong khual na zong ka phawk hi. Ahih hang kei pen tan sawm ong ding pa, mite zong kum khat aa ong zo, kei bangcia ong zolo ding. “Nu aw, kei tan sawm ong ding pa hi’ng” ci’n ka nu mai ah ka khuk din suk hi. Ka nu’n khitui luang sa in thu hong ngetsak a, tan sawm laihuanpi phi ding in kapai hi” ci’n tangvalno kum 17 gual khat in gen hi.

Tua khit ciangin…….
“Ka neulai ka ngimna lian ahih manin, lai zong ka hanciam pah hi. Tan khat ta kahtoh sim a zah khat ta ka hanciamna ka khan hi. Tan sawm ka tun petpet ciangin ni dang aa ka hanciamna zah sang a zah sawm in ka hanciam hi. Bang hang hiam cih leh hih tan sawm a kici mualpi pen gualzo tak a kheng zo leng ka ngimna, ka ut na tung ding ka hipan hi.

Laisimna ah nopsa in, tha ka ngah mahmah laitak “Na pa zato lum” cih thu kaza hi. Dam kik ding hi cih upna tawh ka sanglai sung ah ka lungsim ka kip sak hi. Tua zawh a sawt lo-in inn ah hong ciah in, ci’n hong kivai khak. Border ah khuan ngen, inn ka ciah leh lamet loh teng na piang…..ka pa’n hong nusia ta…

Aw mikim in a tuahkhakding thu a hih hang ken tuak baih sese sing e.. Pa aw nang hong nusia biah si cia. Pa aw ka moh lei na ding sum hong pia ve, ka khedap lei na’ng, ka naumilim ding, ka muk sanza ding te tu’n kuan hong lei sak ding, pa aw na za maw ka pau te?…. maw pa?…

Ni dang aa tagah te hehpih huai si ka cih… tu’n kei zong tagah khat ka hi ta ve maw…Ahih hangin ka pa hong thokik ding hi cih ka um hi. Ka pa a ihmu a hih lam ka thei hi. Ni dang aa a thahat ka pa tu’n mite bawl mite koih bang in om ta maw..

Ka pa han khuk sung kisial in hong kivui taktak ciang ka pa hong tholo hi. Ahih hang ni khat ni ciang thokik ding a hih lam ka thei hi.

Khitui naptui tawh hanmual pan inn lam ka zuat lai tak in “phengphelep.. phengphelep..” ci’n vasa ham ciaiciai khat ka za hi. Aw khua khal hun tung ta ai ve maw.. aw phengphelep khuan sim leh tan sawm lai huan…..

Handal ni sanglai sin kik ding in border saung lam ka zuan kik hi. Laisim ding kithawi ciang ka mitkha ah ka pa mu zel. Khitui tak datdat sa mahin lai kasim aa, ka laibu bang kawt zezen hi. Khat veivei ciang ki-ip zolo laisim laitak kap khia kha zel. Zan lup hun hong tung, lupna tung ah zong kap veve lai. Kei le kei kaplo ding ka kicih hang ka khitui hong luang mawk hi ven. Ken zong bang cih thei nawn mawk ding.

Ahih hang ka lungsim khauh sak in hih bang tawh ka ngimna mangsak lo e, kung ka tun dong ka tai ding hi. Tua hi leh vantung aa om ka pa in zong hong lungdampih ding hi cih ngaihsutna tawh tan sawm laihuanpi phi na ding sang inn lam ka zuan hi..” ci’n khitui nul kawm in nungakno khat in ama thute hong gen leuleu hi.

Hih bang dan aa khat le khat thu kigen, ki kum khawm liailiai, a ki –it nate uh thupi thei si e. Aw a vekpi vua mithupi ding vive ai ve maw. Abraham Lincoln, Colonel Sandler, Madam Curie, Thomas Edison… cihte hong suak kik a hi tam? Aw hih bangmi tangthu sung bek ah om ding kasak hi ven, tun ken ka mit tawh a mukha ka hi ve. Haksatna om lo hilo, haksatna aki zo thei ai ve maw.

Haksatna te in i nuntakna a hoih zawk na ding hi a, a siat zawk na ding hi lo hi. (Mikang paunak). Siamsin Small Group a sanggamte zahtaknalianpi tawh, Nk Khanno