Kumthak sungah Topa’ deih nuntak kalsuan pihding thu (10)

Kum khat khit kum khat hong bei toto in, i kum hong tam semsem a, i nuntakna a bei ding hun zong hong nai semsem ta hi. Tua kawmkal-ah Jesu Khris hong paikik ding hun zong hong nai mahmah ta cih i phawk kawmin, i nisim nuntakna-ah i lungsim, i kha leh i pumpi cidam in, a khantohtoh theih nadingin, kumthak sungah Topa’ deih nuntak/kalsuan pih ding thu(10)te tawh i nuntak/kalsuan zawh nading in lungsim takpi tawh thungen in, ki-ap ding hi hang.

1. A beisa hun a i gamtatnate ki-en phakik in, i mawh i khialhna khempeuh pulak in, Pasian kiangah ki hei kik in, mawhmaina ngen ding(Kahla 3:40-41, 1Joh 1:9)

2. A beisa kum/hun sunga, i sup i bainate mangngilh in, siatna, hoihlohna leh a kihhuai na khempeuh paaikhia/nusia ding(Fillippi 3:13-14, Jeim 1:21, Ef 4:22, Ef 1:13)

3.A beisa hun a, mite’ hong simmawh, hong bawlsiatnate khempeuh maaisak in, mangngilh ding(Hebru 10:17, Late 103:12, Mikah 7:19, Isai 38:17, Paunak 28:13)

4. Zingciang ading lunghimawh loin, Pasian’ gam leh ama dikna zong masa den ding(Mate 6:33).

5. A siangtho nuntakna tawh a nungta, a kalsuan dingin khentat ding(Dan 1:8).

6. I khentatna bangin nungta/kalsuan pih nadingin, kisin pah ding(Joh 6:8)

7. Nisim in Topa muan’na tawh thala den in, muhna tawh nungta loin, upna tawh nungta den ding(Neh 8:10, 2Cor 5:7).

8.Nisim thungetna tawh midangte huh tawntung ding(Efesa 6:8).

9.I nisim nuntakna ah Pasian leh ama kammal(Lai Siangtho)thunei pen hi sak den in, thumanna leh cihtakna tawh nungta/kalsuan a, i lungsim khempeuh tawh Topa’ muangin, amah ki makaih sak den ding(Late 119:105, Pau 3:3-8).

10.Nitawpni ciang a, i ngah ding thaman lungngai kawm in, Pasian minthan’ gamzai nading leh midangte phat tuam nadingin lungkia lo takin nahoih tampi sep sawm ding(Gal 6:9, 1Kor 15:58, Job 42:12, 2Kor 4:1 Heb 12:3, Late 126:5, Mang 2:10).

Hih a tung a thu(10)zuih zawh hih zawh,nuntak pih zawh nadingin, Lunggulhna leh deihna takpi tawh thungen in, i ki-ap nak leh, Pasian in i hih zawh nading tha leh vangliatna hong guan ding hi.

*Lai hawmpa in, a laihawmte Lai koihna bung sungah a koih ding ama vaipuak hi-a,lai ngah dingte in, laibung sunga kikoih a lai ngah ding uh la-in, sim a, a sunga om thu te a theih ding uh leh a nuntak pih ding uh amau vaipuak ahi hi.

Mimal kim tungh Topa’n kumthak tawh lungsim kha leh pumpi mahmah hong thaksuaksak khawm ta hen. Amen!

Khazih sungah,
David Tuang