Kumthak ah Zomi hihna kemto zelding ~ Hau Za Cin

Kumthak ah Zomi hihna kemto zelding ~ Hau Za Cin

Zomi khempeuh kumthak thupha puak in na khut taklam uh kong len hi. Zogam ah kilemna, daihna, nopsakna, bitna, kilawmtatna, pankhawmna, thuakhatna, thuakzawhna te a kicingin hong omdenta hen. Hihteng khempeuh a om theihna dingin suahtakna leh mawhpuakna a omloh pelmawh hi.

Zomite in a tawntungin kuhkalna leh hanciamna, thanuamna, cihtakna, lawpna, midang deidanlohna, biakna suahtakna, numei pasal liangko kikimna, thudik thumaanna, leh suakta tak a sum leh pai zonna te a neih den ding a thupi mahmah ahi hi.

Zogam a leisung sumpiang tampi om thei ding hinapi bangmah a kisep nai loh hangin a thaltang dimin a pua phitphet galhangpa bangin mual leh guam sungah sum leh pai tampi kiphum a tuate a zeek ding, a zang ding Zomite mah ihi hi. Tua ahih manin thanuamna leh kuhkalna, hanciamna leh khawllo a phut teiteina lungtang i pu i pa pan i neihsa a kembit dingte i hi hi. I gam pan a piang tam nailo a, i gam pan summuhna dingin i suak theih van kihau nailo hi.

Ahi zongin sum leh pai tawh a kilei theilo mihing cihtakna leh hanciamnate Zomi te lungsim leh pumpi, nuntakna ah a bei ngei kei hi. Zomite hanciamna hangin Zogam khangto in Zomi te kilamsang a, nuntak khuasak hong nuamto hanhan hi. Sanginn hoih leh lampi hoih tampi i nei nai kei a i lamzawhna dingin a hanciam dingte i hi hi. Khua leh tui kizem nailo, kipuah nailo in kizuun nailo a, numei leh naupangte suakta tak in gamtang in kizem in gamtang thei pah tadinghi cih ka lamen hi.

Zogam leh Zomi bucing lo a, hoihna leh siamna, theihna leh pilna a kicingin neih ding hanciam in miksi antom mah bangin pusuak in sungtum a, sak leh khang zongin diangsuk diangto hi. A bit nailo inn kehte huk kul a, a tawvang tuibel te huk kul in buan tawm hi. Pitek putek te in inngak simloh sep ding nei nailo uh ahih manin a inngak kawm un a hih theih ding uh nasep a gina limtak kibawlsak lai ding hi.

Pitek te in a nungak lai vua a sep nop mahmah uh a sep theihloh te uh a septheih, a sin theih nading uh hanciam in a nuntak lai un a ciamkha man dingin mainawt a kul hita hi. Zomi khempeuh in a tawm pen kum 10 sung pilna leh theihna sinin a nuntakna innpi lam dinga, tua khit ciangin a sangzaw pilna a zon beh utlo te in nadang a ut bangbang sem in a deih bangbang bawlta leh deih huai hi.

Zomite in Zogam zun bek hilo in a pu a pa khanga nuntakzia hoih – cihtakna, muanhuaina, hanciamna, thudikna, itna, migitna cihte a kepcing nadingin mihing kilamtohna a gina bawl mahmah ding ahi hi. Pilna sin zawh dan kibanglo, siamna sin zawh dan kibanglo, neih leh lam kepzawh zah kibanglo ahih manin a sang tungzote sangpi ah kahto henla, a dangte in a nuai pan tawsawn in a sangzaw ah laamto ding hi hang. A khangto minam leh mimal in a gualzawh ciangin uanglua lo a, kiniamkhiat in a lawhcinna kiphatsakpihlo hi.

A guallelte zong neumuh cihtham salo cih bangin omlo a, mite tungah kihisak in kam kilawmlo pau nuam uh hi. A guallel khat in zong a guallehna zumpih in kuncip lo a, a gualzo te pahtawi in domsang a, a gualzawhna dingin amah zong hanciam kik den hi. Khatvei a guallelh mana kineu ngaihsut in midangte tung et hipah tuanlo in leitungah a guallel om dinga, a gualzo zong om ding hi cih telsiam ding uh hi. Tua hileh eima nuntakna ciang tek ah lungnopna leh lungkimna, suahtakna leh lungdamna om hi.

Leitung nate thupi bawl luatna leh mite tawh kitawikhai khak ding a hoihlo ahi hi. Leitung nate a thupisak kha in ama neihsa mite neihsa tawh tehkak dinga mite sangin a tamzaw a neih kei leh a khasia ding hi. Ahi zongin leitung pen neih leh lam bek hilo cih dinmun pan a ettheih ciangin van leh nate bek hilo in mihing hihna bekbek zong a manpha ahihna a tel ding hi. Sum leh pai hauhna sangin nuntakna gina leh nuntak kilawm a nuntakna enghuaizaw, paktathuaizaw in hampha zaw tawh kibang hi. Leitung pen sumzuakna phualpi banga na khempeuh sum leh pai tawh kiciangtan banga muh khakloh ding a hoih mahmah ahi hi.

Tua ahih manin Zomi khempeuh in kumthak ciangin Zomi i hihna hong kipsak – cihtakna, kuhkalna, lungduaina, migitna, ngeina kepna, hanciamna, kilemna, sum leh pai ah cihtakna leh muanhuaina cihte a tawntungin eima mimal nuntakna leh mipi nuntakna ah a kepcing, a zat, a zeek den ding ahoih ahi hi.

Topa in Zomi khempeuh kumthak sungah lungdamna leh lungnopna kicing tawh hong kalsuanpihta hen. Hau Za Cin