Palestinian puteek kum 81 aphakhin khat pilna lunggulh mahmah ahih manin High School laivuan kik cih Reuters pan kiza hi. Tua puteekpa minpen Abdel-Qader Abu Ajameyah kici a, lai hahkat mahmah in, lametna lianpi tawh High School laivuan kipankik cihi.
Amahpen Israeli-occupied West Bank, Hebron ah anzuak “Food Salesman” asemngei khat hi a, ahi zongin tu’n Pension lakhin hi.
Nungkum inzong kumpi laivuan “National Test” tawh High School Exam atu hi a, ahi zongin kia citciat hi. Ahi zongin lungkiatding in ngaihsunlo in, tukum ciangin khatvei High School Exam atukik ahihi.
Amahpen tazong akigawm in 14 anei hi a, tuzong akigawm in 36 neikhin hi. Atute pawlkhat in apu uhtawh kimawlding zolzol uh a, tuabang kawmkal ah nikhat in nai 5 sungta bang lai simden cihi.
Pilna pen ka lunggulh mahmah khat hi. Teeklua, kumtamlua cihbang paulap in pilsinna pen khaktan theilo hi. Pilsintheih nadingin kum ciangtan omlo hi ciphinphen in hanciam mahmah hi.
Ka khanggui sungah pilna pen athupisak khanggui ahihding limhoih alakkhat kahihding ka lunggulh mahmah hi. Pilsinna pen khawlloding hi’ng ci’n genkhia hi.
Abdel-Qader Abu Ajameyah pen nungdiak in Stroke ngahvat ahih manin laipen hoihtak gelhtheinawnlo citciat hi. Tua ahih manin laivuanna dotna tepen kamtawh dawngkik in, agei ah numei khatin gelhkhiatsak cihi.
Palestinian Central Bureau of Statistics te pulakkhiatna ah Palestinians sungah laitheilo pen kum 15 tungsiah lakah 3.3% bek om cibilbel hi. Arab gamkhempeuh lakah Palestinians pen laitheilo atawmpen khat ahihi.
Abdel-Qader Abu Ajameyah pen ama lunggulh ahi laisinna tawh kisai in innkuanpih te’nzong panpih mahmah uhhi. Adiakdiak in atute’n a nawngkai sakloh nadingin lai asim laitak in azi in atute kepsakden hi.
Related: Kawlte’ Makaih kipawlnate’ kikhen nate pan Zomite pilna ding
Atapa kum 43 aphakhin khatin agenkhiatna ah kanu in kapa pen kum 18 aphapan High School sangnaupang khatbang in ngaihsun in laisimna, sangkahna te ah panpih mahmah hi ci’n genkhia hi. Kapa in pilna alunggulh pen ka innkuan un kaki pakpih mahmah uh cihi.
Laivuanna Reslut pen July khasung in kitheiding ci a, aki theihkalding pen a innkuanpih te’n ngaklah mahmah uhhi. ZD Sawltak #zomidaily
Comment piaknop aomleh...