Kum 100 cinna Zomi Nam Ni ~ Hau Za Cin

Kum 100 cinna Zomi Nam Ni ~ Hau Za Cin

Sun ni lah sa, khua-ul lah tam, mipi lah kileh naunau ahih manin ka ihmut hong suakpian a, ka lusuk pak leh ana mengme suak kha hingel ding hiveng, ka phawk kik ciang ni tum dingin mualdawn ah na kisung ziziai a, vasa giak ding singkung tungah na ham lialua uh hi. Ka mang sungah bangteng mu ka hiam cih ka tel nawnloh hangin a kician mahmah khat “Kum 100 cinna Zomi Nam Ni” cih bel ka mitkha bawl theih ziziai lai hi.

Mun tuamtuam ah pawi kibawl ngengngang in mipi in khutbeng zuahzuah a, pakkual kilawm nono tawh pahtawina kibawl in letsong hoih nono kihawm ziahziah hi. Minam puan lahna leh lia leh taang kizepdante in lungsim hong lawng in mittai sak mahmah a, hun khempeuh zawh ciang nek leh dawn omlai dingte kiphawk manlo hi. Lasate lah siam in gam leh nam itna, minam ngaihna leh hong bawl PA phawkna hunte nuam mahmah a, hibang hiden leh maw kici ciat hi.

Gam leh nam ading a hun khempeuh pia nasemte, sum leh pai tawh a huhte, a pil a siamna bek hilo a neih leh lam nangawn itlo a piate ban ah, khat bekbek a neih a nuntakna nangawn a piate pahtawina leh minam taanga lungdamkohna hunte in mipi lungsim zo in mite thalawpsak mahmah hi.

Ahi zongin a lamdang mahmah khat om a, a gendan ding omlo hi; lamdang hilel hi.

Kum 50 cinna Zomi Nam Ni, Diamond Jubilee Zomi Nam Ni cihte kizang khin hi. Tua hun khempeuh ah minam ni a zang khawmte in minam khat ka hi uh hi cithei nailo uh hi. Ngeina khat ka nei uh zong ci thei nailo uh hi. Amau a bawlpa a sapna uh zong min tuamtuam hi a, amau mun leh kuam tekah amau khuata pau ciat, khuata lungsim ciat tawh hun beisak lai uh hi. A golzaw, a lianzaw, a phungcingzaw a kigawmkhop ding pen a hithei nailo tawh kibang hi. Ahisak theilo hilo in a hi nailo hizaw mai kha ding hi.

Banghanga hih minam ni a zangkhawm zaizaite a hun a tun ciang minam khat ihi cilo a amau ut dan tek tawh ‘long’ (bell) ki-oksak in amau min ciat nei uh a, amau khuata lungsim ciat tawh kalsuansuan lai mawk uh cih khawng ka ngaihsut laitak in, pawi bawlna inntual ah pawi zawh lungdamna ciin thaupi kilawn damdam a, ginglua mahmah ahih manin ka ihmutna pan hong phawng vat in ka lu ka khaitoh leh lawmte in TV ah SIAN ANGLAI AH video na en in a volume na gingsaklua uh na himaimah hi.

Thoto in ka lusukna pan ka khuadaka, ka mitsi kawm ciciai in ka ngaihsutna ka zom kik hi. Banghanga ka mang sungah Zomi Nam Ni mangmat ka hiam cih khawng, banghanga minam khat gualnopna khawng mu ziziai ka hiam cih khawng ka ngaihsun hi. Banghanga pawlkhat in ko Tedim hi ung, ko Tonzang hi ung, ko Lamka hi ung, ko tuate hi ung, no tuate hi uhteh kici uh hiam cih khawng lamdang sa kawmkawm in ka suut neuhneuh hi.

Banghanga minam khat kici, minam ni khat zangkhawm te in ngeina, lai, pau, cihte khat zangkhawmlo lailai hiam… banghanga Mikangte long okok lai hiam, banghanga Kawlte long okok lai hiam, banghanga Bengali te long okok lai i hihiam…. banghang, banghang, banghang…

Kum 100 cinna Zomi Nam Ni ah tua bang ahi lai diam, ahih kei leh i minam min tua hi i ci ta diam, i ngeina tua hi i ci ta diam, i pau, i lai, i biakna ithuai hi, kem ni, pumkhat suak, khutkhat tawi, khe khat khai in kalsuan ta ni i cita diam…. cih khawng hong ngaihsun sak toto hi.
Hau Za Cin (Phuitong Liim)