Kuate’n bang mu uh? ~ Bob Tuangpi

Kuate’n bang mu uh? ~ Bob Tuangpi

Nidang pekpek pan tualsuak minamte’ ading gamvai ah satanh kimtak leh bittak ngahkik nading cih tawh a omsa mualmi thautawi kipawlna thupitak om dimdem hi. Tuate ban ah tutung gambuaina khit thatang leh thatang mah kivattuahlo aa gamsung buaina venglo ding ci-in khutsunga om bangbang tawh akidiankhiat zawdeuhna munte pen Kayah State mun pawlkhat, Chin State mun pawlkhat, Sagaing/ Upper Chindwin leh Magway sung Yaw minamte’ teenna kuam teng hipha deuh hi.

Tualo zanggam sung/ Pyima ah bel Yangon kiim teng leh Mandalay kuam teng ah khutbawl tawm apuakkham theite kitamh zeuhzeuh cih loh buang, tualo mundang Khamh leh Zangsung bel adai dide cih ding hi.

Tunai ciangin mualmi thautawi gina leh mualmite in ih aangtang pih zahkhop dia aphungcing thautawi kipawlna honkhat akipan leitung gamlian nitumna, nisuahna, asak akhang leh gamveng thahate kipawlnate in gamsung makai tuamtuamte’ tung ahanthotna leh deihsakna kammalte uh ih khilkhiat (Analysis) ciang’n hiamtawi-in gamhtatna/ ngongtatna pen gamhtatna/ ngongtatna mah tawh kithukkikna in hamphatna sangin supna baina tamzaw hi, cih vive limgen uh a,tua in Democracy ki-ukna ah mualsuahpih ngei khollo ahihna limgen pha mahmah uhhi.

Tutung gambuaina vai ah mipi in galkap ukna himhim deihlohna leh mipitha lahkhiatna (People’s power) nasiatak leh kiciantak nam tuamtuam tawh gambuppi leh leitungbup theihpih zah dong apulaak khit nungsang ah hiam pen hiam mah tawh thukkik-in thagum/ thaumuuk pen thaugumhatna/ thaumuuk mah tawh dokik kul hi, cih ngaihsutna hong uang mahmah hi.

Tua bang khit teh luangkhamin gamsung adiangte leh amun aphual zawdeuhte ih ettak teh alungngaihuai leh khasiathuai simsim thu leh la tampi hong piangin luang leh ban tampi bei-in sisan luanna tampi omkhinzo hi.

Cimai leeng, tua akhauhpaina mun zawdeuhte ih et tak teh gambup pilna lam ah aniam penna mun zawdeuhte (Tan -10 aung, Degree ngah cihte) nuntakna khuasakna dinmun khantoh tehna (Development Index/ Indicator) ah atualniam zawdeuh munte leh gamsung gamvai luanzia leh tangthu sungthu tatak teltak atelcian atawmna munte na hiphadeuh se citciat hi, kici thei ding hi. (Theih ding :Ukna tuhkhia galkap adokik munte cihna, Kawl galkapte bel genkul vetlo leitungtheih akihhuai tualthat ngongtatate hikhin)

Suahtakna ngah zawh kipan tuni dong gamsung ah gamvai paizia hualpi nih tawh kipai den-in khamh leh zang gamvai dinmun ah hamphatna leh kipiakkhiatna kikim ngeilo ahihi. Abeisa kum (70) val pan ento leeng tutung gamsung buaina nung dongah atawntung gamsung buaina leh tualgal hangin athuak den pen khamh gam/mualmi te munnleh mual leh mipi teng mah hizaw hi.

Tutung buaina hangin zongh khuazangbup kihaltum, galtai, neek leh dawn kisam leh agikial dangtaak adongtuak phadeuh ( Internally Displaced Persons/ IDP) atam penna munte enleeng mualmite’gam khamhtung gamte hiphadiak zel se hi. Zanggam/ Kawlmite atamzaw ateenna munte ah tunitan galtai, khuazangbup kihaltum leh dongtuak amitamna leh mungolna/ leitanggolna zui-in tuat leeng acih tham peuhmah ahihet kei hi.

Mihingte pen ih muh kibangin ih muhna/ muhzia kikhai kik a, ih mit kibanglo cih in zongh thugen veve ding a, ih muhna tungtawn ih dinmun leh thu ngaihsutna kilamdang tekin ih ngaihsutna tungtawn ki gamtangkhia tek ahih mah bang kuamah kikhutme kawk theih a om tuan peuh mah kei hi.

More: Khinkhai huai thu ~ Bob Tuangpi

Ahizongin apiangthu khat tungtang ah ih thukkikna (Response) zui-in asia apha, agah ahih leh ei bek hilo kiim leh paam,khua leh tui tualsung minam in nekik/atkikna hong om ding a (Outcome) ih lutung ah hong tuciat ding ahihi. Tua hi-in kua te’n bang genin, kuate koilam khuadak-in,bang hang kuate dai khipkhep mawk uh hiam cih bel amau bang mu uh ahitam cih tung ah kinga zaw ngel ding hi. Bob Tuangpi (08092021)