Kuala Lumpur khuasung ah lungphona neidingte kipanpan ta

Kuala Lumpur khuasung ah lungphona neidingte kipanpan ta

Malaysia gamsung ah zingciang Saturday (19 November) ni in lungphona neiding in gammi te ki limgin mahmahta uhhi. Kumpi thunei te’nzong hih khuasung lungphona vai hangin Dataran Merdeka tualpi zuanin apai lampi te khaktanding kipanpanta uhhi.

Kuala Lumpur khuapisung aom lamzikpi 58 tunitak akipan khakcip tading cihzong theStar pan kizata hi. Tua lampi kikhakna hangin asukkhakding khuasung vengte pen anuai abang ahihi.

Brickfields (Little India), Masjid Negara and Muzium Negara; Sogo and Dataran Merdeka; Parliament House and Bank Negara; Pudu Central and Central Market; Putra World Trade Centre and Chow Kit

Khuasung kikawmna lampi te pen zingciang zingsang 7am akipan nitaklam lungphona amansiangdong ki khakcipding cihi.

Zingciangpen kumpi deihlo te leh kumpilam apanpihte Group nihin lungphona akituak in aneiding uh himawk ahih manin, lauhuai khatheiding hi. Puansan silhte pen kumpi adeih Pro-Umno kipawlna te hi uh a, puannaipak asilh tepen kumpi adeihlo Bersih 5.0 Group te hiding uhhi. Hih kipawlna namnih te ii ki ciaptehna ahi puansan (Red Shirt) leh puannaipak (Yellow Shirt) te silhkeileh hongki telkhiallopen dinghi.

Hih kipawlna Group 2 tepen Dataran Merdeka ah hongkituahding uh ahih manin, tua mun ah bangthu piangding cih gentheih omnailo hi. Abeisa in Kuala Lumpur khuasung ah lungphona akineih ciangin kipawlna Group khata in aneizel uh hizaw a, tua nangawn alanglam te’n nawngkaisak theizel uhhi.

Tutung ahihleh deih kibanglo, lungtup ki lehbulh kipawlna Group nihte Dataran Merdeka ah hongki maitang tuahmawk le uh bangthu hongpiang mawkdiam?

Maria Chin hauled up by police on eve of Bersih rally

Puannaipak Group Bersih 5.0 te makaipinu Maria Chin zong tunitak kimankhin cih dendiak mahin kiza hi. Makaipinu aomloh hangin lungphona pen kinei veveding cihzong Bersih 5.0 makai te’n genkhia uhhi. Tualo adang makai akimanman pawlkhat zong omkhin cih kiza hi. ZD Sawltak #zomidaily