Kuala Lumpur, Jalan Kuching vengsung ah Saturday ni in tui khanggawp
Malaysia, Kuala Lumpur khuasung ah zanni Saturday nitaklam in guahtui malua mahmah ahih manin, lamzikpi pawlkhat tui dimletgawp cih theStar te’n genkhia uhhi.
Jalan Kuching lamzikpi tungah huaisia phadiak in, Saturday nitaklam in tuidimgawp hi. Kuala Lumpur Fire and Rescue Operations Centre chief Zamani Ismail in agenkhiatna ah Jalan Kuching lamzikpi tungah tui aluangawpna ahangpen Sungai Batu luisung ah tui dimlua ahih manin, aletkhia hi ci’n genkhia hi.
Fire and Rescue Operations tezong cimawh dongtuak aomleh ahuhding in kuankhia uh a, ahi zongin guahtuikhang pen nitaklam 6:45pm hunpawlin kiamsuk zawdeuhta ci uhhi.
Guahzuk kipatpen nitaklam 5pm hunpawl akipan nasiatak in guah zugawp ahih manin, Jalan Kuching vengsung ah tui tamphadiak cihi. Ahi zongin adang vengtuamtuam ah tuazah in huaisialo hi ci’n thunei te’n genkhia uhhi.
Jalan Kuching lamzikpi tungah tui adimzihziah laitak Video kizaihkha in, Social Media ah kikhahkhia ahih manin, huntomno sungah ki thehzakpah zihziah hi.
Video: Jalan Kuching hit by flash flood after evening downpour
Video sungah lamzikpi pen mawtaw 4 apaitheiding in “Four-lane Highway” akibawl hi a, alangtuak panin tui dimto zihziah ahih manin, mawtaw zong honkhat khawlcip uhhi.
Driver pawlkhat in tui akiamzawkdeuh hunding ngakin akhawlcip uh ci a, mawtaw pawlkhat inbel tuilak mahah damdam in paisak veve uhhi.
Jalan Kuching lamdungteng, Selayang Market panin khuasung City Center zuatna leh Segambut kuamsungteng ahzong hih tuikhanna hangin mawtaw awkcip, Traffic Jam gawp cihi.
Related: Kuala Lumpur khuasung ah “KTMB Cargo Train” vanpuakna meileng khat tuahsia
City Hall’s Integrated Transportation Information System panin thunei Spokesman khatinzong agenkhiatna ah zanni nitaklam guahtui tamluatna hangin khuasung muntuamtuam ah mawtaw awkcip in nawngkaisak mahmah hi ci’n genkhia hi.
Nitaklam 7pm hunkhitpawl ciangin tuikhangzong kiamzawta in, khuasung mawtaw zong angei bangzawdeuh in awkcip luanawnlo cih kiza hi. Sawltak #zomidaily
Comment piaknop aomleh...