Malaysia, Kota Damansara aom Jewellery Shop ah damiah lut, RM720,000 puakhia

Malaysia, Kota Damansara aom Jewellery Shop ah damiah lut, RM720,000 puakhia

Malaysia, Giant Kota Damansara Shopping Complex sung aom suangmanpha zuakna “Jewellery Shop” khatpan in damiah mi 3 lut in, RM720,000 manneiding suangmanpha puakhia uh cih NST pan kiza hi.

Tua Jewellery Shop sungah damiah ataihte pen pasal 3 hi uh a, tuate lakah khatpa in Pistol thau “Revolver” khat tawi cihi.

Tua pasal 3 tepen amai uh Mask tawh tuamcip in, Shopping Mall sungah zingsanglam 11:47am hunpawl in alut uh ahihi. Jewellery Shop sungah suangmanpha akikoihna Tray 8 sungpan in adeihteng uh aluah khiatkhit uhciangin Perodua Myvi mawtaw khattawh taikhia vingveng uhhi.

Hih Shopping Mall sungaom Outlet pen abeisa kha 4 sungin 2 veitak hihbangin damiah alutna hita kici hi.

Hihvai tawh kisai in palik thunei ahi District police chief Assistant Commissioner Mohd Zani Che Din in agenna ah damiah tepen Malaysian Local gammi te hiding ci a, 3.8mm Revolver thaukhat tawi uh cihi.

Jewellery Shop sungah damaih alut laitak un damiah khatpa in Security Guard khatpa pen Pistol tawh ngimpah a, tua Security Guard pa ii athautawi Pump Gun zong suhsak hi.

Tualaitak in damiah mi 2 te Jewellery Shop sungah lut uh a, Jewellery Trays sungah vanmanpha akikoihteng lautkhia mengmeng uhhi.

Video: Masked men escape with jewellery worth RM720,000 in Kota Damansara heist

Damiah te’n amuhteng lakah adeihteng aluahkhiat khituh ciangin Jewellery Shop panin taikhia uh a, Security Guard pa ii thaupen Shopping Complex apualam aom Parking Lot ah paihsak uh cihi.

Tua damiah te taikhiatna mawtaw Car Registration Number pen VA 8247 kici a, ahi zongin tuapen atuh hi ci’n palik thuneipa’n genkhia hi.

Hih damiah te lutlaitak amukha Witness khat ii genna ah amai Mask tawh atuamcip pasal 3 Shopping Mall sungah honglut in, Jewellery Shop lamzuan in lutpheisuak uhhi. Amukha te kipatau, kilauthawng mahmah in, vanlei vanzuak “Shoppers leh Supermartket Workers” te ki awng in kitai ngeingai cihi.

More: Kuala Lumpur khuasung aom vanmanpha zuakna Jewellery Shop ah suntangpi in damiah lut

Damiah khatpa in Security Guard pa ii athau suhsak in, tuaban ah Security Guard papen khuplupsak cihi. Tuaciangin Witness pa’n lauthawng pipi in amanlang in Police te ka zasak hi ci’n genkhia hi. Malaysia gamsung ah hihbangdan Jewellery Shop sungah damiah alutpen kinawhzak simsim in, akiman cihlah kizakik melmello hi. Sawltak #zomidaily