Korea Gam le Mi te: Zomi khat ii muhna pan (4) ~ Cope Suan Pau

Korea Gam le Mi te: Zomi khat ii muhna pan (4) ~ Cope Suan Pau

Khuahun le Mi te Lungsim
Khuahun in mi te lungsim sai mah mah gi ge hi. Korea gam pen leidawk peninsula khat hi a, akim ah tuipi in tuam ahihman khuahun kilaih mun mahmah hi. Gtn: Zan thapai guak zu napi zingsang ciang ni tang seisai pah hi. Tua mah bangin mi te lungsim zongh kikhel mun mah mah cih pen Zomi te le “wei-guk” akici gamdang mi khempeuh muhna hi a, Korea-mi te’n zongh thukim ve ve uh hi. Tua ahihman in Korea gam sungah paunak khat om a: “tu ni tak a sum 1,000 hong kipia pen lapah in la, zing sang ciang a hong piak ding kamciam 100,000 pen lam en kei in” cih ahi hi. Korea te tawh kithuah ngei te’n thei ding hi.

Japan te khutsungah kum 35 bang om ngei uh a, genthei mah mah uh hi. Hibanga inn pam te khutnuaiah om cih pen ih thadahna le ginatlohna hang hi ci in ngaihsun uh a, mun khempeuh ah Japan te dem bawl uh hi. Japan imperialist te ukna nuaiah Korea-mi te in amin, alai, angeina te le Korean identity mansuah dektak uh hi. Tua dingmah in Japan te in hanciam uh hi. Korea-mi te icon ahi taaksing kawi limliam te nangawn phuk gai in, gam lak ah Japan taak ci pawi zen uh hi. Tua zah in Japan imperial te in Korea-mi le gam pen Japan mi le gam suah dingin hanciam uh hi.

Minam le Identification

Japan gam le mi te zongh tua bangmah a Japanized hih tuak mawk hi. A masa in minam tuamtuam hih tuak uh hi. Zomi le minam neu tuamtuam te zongh Kawlmi te in hong Burmanize nuam mah mah uh a, tu laitak Myanmarification abawl bawl laitak ahi hi. Zomi te ngeina, biakna le identity ih mansuah lo ding thupi mah mah ding hi. Tuni Zomi te mahbangin Korea te zongh tuma kum 50 lai pek pan US, Canada le UK gam te na tung khin uh a, tuni in a identity ding uh lung mang san uh hi.

Kua te kici ding? Korean American maw? Korean Canadian khawng, Korean British cih khawng, Ko-lish khawng om thei ding maw? Zo-american cih khawng, Zo-lish khawng ee, om thei diam? Zo-canadian? Zo-swedish, Zo-Norwegian, etc. Ahih kei le Asian-American khawng, Asian-European khawng tawh lungkim ding maw? Ngaihsuthuai hi. Gam le lei in mi valh tum thei lo a, mi in mi mah valhtum bek hi. Sim leitungah nisim in minam atul sim in mang lel uh hi. Zomi te zong Kawlgam bek hi loin, gamdang mun tuamtuamah ih mangthang ding lauhuai mah mah hi.

Christianity le National Movement

Tua hang a, Korea-mi te in Japanese imperialism pen do cihtakin do uh a, ih gensa mah bangin Christian te in mipi tawh kipawlin national movement ah nakpitak in kihel uh hi. Korea-mi te pen Hana-nim Pasian in Korea-mi a hong bawl sa, asisan tawh hong tan sa te hi h’ang a, Japan mi suak ding te hi lo hi hang, cih lungsim le upna nei uh hi.

Tua a theih ciangin Japan te in Shinto shrine milim biak ding thupia a, abia lo peuhmah bawlsia uh hi. Christian biakna makai a tul sim in thongkia, bawlsiat le thah thuak uh hi. Japan te Shinto shrine peuhmah mai ah kun nuam lo uh hi. Japan te in “hi pen biakna hi lo a, ngeina bek mah hi. Ko ngeina n’ong zuih ding uh cihna bek hi, amai ah kun pen biakna hi lo hi” acih uh hang, lawm te ut deksuai lo hi. Upna khauh mah mah a, sihpih ngam hi lian hi. Tu ni Zomi Christian upna hong kisit leh ih thuak zo na diam?

Korea-mi pastor minthang khat thong sung a om laitak, azi kiangah Japan thukan te va hawh a, “na pasal hong ciah kik ta ding hi, amah’n tu ni in Japan Shinto Shrine milim mai ah kun ta hi,” a cih le: lawm nu’n adawngkikna ah, “Ka pasal in Shinto milim mai ah kun ahih le, tu ni mah mah in ka ‘ma’ ding hi. Ka pasal in no Shinto milim mai khawng ah kun ngei lo ding hi” ci hi.

Hibangin Japan te’ bawlsiatna thuak ahihhang Korea-mi te in Japan-mi te mudah tuan lo lel uh hi. Dem bawl bek uh a, mun khempeuhah Japan te sang asiam zawkna ding, apil zawkna ding, hanciam uh hi. Japan-mi te in maitang 2 nei uh a, Korea-mi te in maitang 1 bek ka nei uh ci hi. Cihnopna ah Japan-mi te in alungsim uh sel a, ko ka sel kei uh cihna hi.

Alamdang Korea-mi Lungsim

Korea-mi te in heh le zongh amai ah lakpah, lungdam le zongh kilangh sak pah hi. Lungtom thei mah mah uh a, ahizongin a den mah ciang, lungkim kik pah leu leu hi. Ki hehsuah le zongh kitawng ngawp in aden lam ciang kilem kik pah hi. Zomi te dan a sun tha pai [khang tawn tung phial maw?] heh cih bang om lo hi. Ki nuak in inn lam kiten cih khawng nei lo dan hi. Bek le phung vai khawng tawh abuai ngei lo minam te ahi hi. Hanguk ahih nak le man pah lel hi. Zomi te dan a, Ciim Nuai pan a tuan khia, tunsung khat pan piang… cih cih le, tua mi te, tua lam te,.. cih cih thuah lo uh hi.

Korea khuahun le mi te lungsim pen ki lumlet meng meng hi. Zingsang a meeting a vaihawm thukimna khat pen alem kei le, aden ciang laih kik ziau a, tua mah tawh na deihtak sem in khangto veve mawk uh hi. Zomi te dan a, khat vei thu kimsa, khang tawntung mang ding cih thu te nei lo uh hi. Ka party le ka pawlpi bel ka sih pih ding hi, laih ngei lo ding, cih dan hi lo zaw in, koi party le pawlpi ah lut leng kei ading le gam a ding khangtona om ding hiam? cih lam ngaihsutna nei zaw uh hi.

A upna bulpi akhel lo uh hang, nisim kalsuanna le nasepna vai khat pepeuh ah lungsim man lang mah mah uh a, phat tuam zawk nading khat amuh le thu khel meng meng thei uh hi. Zomi te tawh kibang loh na tua hi. Zomi te zongh akulna te munah akisam bangin flexible zaw deuh thei le’ng ahoih zaw tam??

Na khempeuh ahun zui in laih meng meng ding dan in ngaihsun uh hi. Leitungah cell phone bawl minthang pen hi a, kha 6 sim in generation thak khat ta bawl uh hi. Naupang no pan kipan pi teek pu teek in hand phone tawi kim ciat uh a, Korea kam in “hen-da-phon” ci uh hi. Tua “hen-da-phon” khat na tawi kei le nang pen Korea gamsung ah mihing sazian lut tatak lo hi teh. A ngaihsun thei zaw deuh te in subway le bus sung khawng ah apau uh ciang kam humsa in dam pau uh a, pu teek pi teek pawl bel aih le awng bua bua lai uh hi. Subway sungah mi khempeuh phial in a hen-da-phon uh tawh kimawl ciat uh hi. Zomi Korea tung masa pawl zongh hen-da-phon zatnuam salua kha uh ahihmanin beng ngong pian tam uh hi.

Wednesday Demonstration le Halmoni Pi Tek Te Activity

Japan galsung Zomi te gal ih tai mah bangin Korea-mi te zong galtai le bawlsiat thuak na tam ve ve uh hi. Japan galkap te in galsung agalkap te sexual service pia dingin comfort woman ci in Korea nungakno te tampi manin zangh uh a, tu in halmoni kici pitek suak khin na pi tu dong mah lungkim loin nilai nisim [every Wednesday] in Japan Embassy maiah ‘demo’ lungkimlohna lak uh hi. 1992 kum January 8 ni a kipan tu dong Japan kum pi lam pan thumna kamkhat apulak khiat ding bebek ngak uh hi.

Nung January 13 ni in kum 6 sung khuadam pen hun hi a, temperature minus 12 degree Celsius sungah pitek kum 80 tungsiah vi ve makai in a 900 veina demonstration nei uh hi. Kil Won-ok ki ci pipi in “Japan kumpi in thumbawl ding kilawm hi!” cih slogan tawh makai a, lei tung gam tuam tuam pan numei organization te zongh kihel in US, Ausie, le Japan pan zongh in panpih uh hi. 1940 kum in kum 12 a pha pan Pi Kil pen, Sen gam ah kipuak in, kum 6 sung 1945 gal bei hun Korea gam suahtak dong mah comfort woman va seem hi.

Pi Kil in a genna ah, “Thumaanna ‘justice’ pen hong kilang veve dingin ka um hi” ci hi. “Bawlsiat thuak mi te thusimlohna le hibanga mawhmah ung ci a thuum ding a ut lo kumpi te’ mawhna zongh kimaisak lo ding hi” ci in Pi Kil in gen lai hi. Atawpna ah Pi in : “ A zumhuai pen ko mau hi lo zaw in Japan kumpi le Korea kumpi hi zaw hi” ci in khauhtakin pulak hi. Japan kumpi in official takin thuumna aneih noplona le Korean kumpi in zongh khutzep sa in a et mawkna te pen Pi Kil in na salua hi.

Tua ni in mi 200 val kihel a, atam pen hun hi. Pi Kang Il-chul, kum 82 in, “Japan kumpi in thuuma hong neih mateng, ka si nai kei ding hi” ci hi. Pi Kang in acihna pan, “ko teng ka sih khit ma un Japan kumpi in thuumna hong neih ding kilawm hi” ci hi. 1993 kum in Korea kumpi in register abawl lai in comfort women pipi te mi 234 pha lai uh a, tu in 87 bek mah hing lai uh hi. Pi te 147 in mual hong liam san khin uh hi. 1993 masiah pen Japan kumpi in Japan galkap te kihel kei ci in nial uh hi. Tu dong official thuumna nei nai lo uh hi.

K, Korea-mi, Zu ne mi

Zomi te tawh ih kibang mahmah na khat pen ZU duh mah mah uh hi. Numei pasal, nungak tangval zu nekim thei uh hi. Tua manin missionary te hong tung ciangin Christian te zu neek ding kham a, Zomi te zu neek ding hong kikham mah tawh kibang linlian hi. Zu neek ding hong kikham lo hi le, Zogam ah nidang pek in Christian ki suak gai thei ding a, Laipian Pau Cin Hau pawl zongh Christian hong suak khin kha ding uh hi. Ahihhang zu duh lua te Christian sung hi ta le, koikoi ah hi ta le zu kidek pen ahoih pen ahi hi.

Korea ah zu thawl khat pen tui thawl khat sang man ol zaw a, lam kiu khempeuh ah ki lei thei meng meng mawk ahihmanin Zomi Korea tung te in diksa mah mah mawk uh hi. Zu kidek zo lo a, Zomi te asi nangawn ki om a, zato lum in kidek zongh om hi.

Bang bang hi in koikoi ah ih om zongh in Zomi te ZU NEEK VET LO DING mah hong thupi pen veve ding hi. Zu in khangno te tampitak nuntakna kisiasak khin cih pen ih mu khin hi. Zomi te pen zu ne dingin ahoih te hi lo hi h’ang. Ahoih bek cih thei lo mawk hi h’ang. Tua manin missionary sangmang te in zu hong kham na hi hi.

“Zu pen mihai te neek ding hi lo hi” – Cope topa

Khat vei Zomi pawlpi upa khat Cope sangmangpa kiang nitak ahawh le lawmpa zu san hai sungah na koih kiukeu hih tuak, tua le ei a pa’n “Cope topa, zu neak ding lah n’ong kham a, nang lah na ne mawk a, abang ci?” acih le, lawmpa’n adawngkikna ah: “Zu pen mihai te neek ding hilo hi, mipil te neek ding bek hi!” ci ci hiau…

Tua mah hi mawk hi. Zomi te’n zu ih neak leh hai-neek mawk hi h’ang. Korea-mi te mahtawh kibang hi h’ang. Neek vet lo ding thupi zaw ding hi. Zomi bawhlung siam WC khawng asui thei ding phial tampitak om khin a, zu vi ve tawh kisia uh hi. Korea-mi te zu ne vive ahihmanin kumpi in law khat nei vet uh a, zu pen a khauh lo [zu hang khauh lo, adau ih ci diam?] nam khat bek mah bawl sak a, tua pen “Soju” ci in kawl kai tawh kibawl hi. Numei pasal, nasem le sumhau te, manager te pan kipan president dong in tua “Soju” dawn ciat uh hi. Christian te kihel lo! Korea Christian te in zu ‘tang’ uh hi.

Missionary te hong pantahna zong ngaihsuthuai zel hi. Zomi te missionary te in hong pantahna uh ah zu hong kham na pi un, zunam vi ve tawh hong pantah mawk uh hi. Cihnopna ah zu bawl nading singgah nam te vi ve khamtung Zogam ah hong introduce uh hi. En ve! Zogam a lenggah te zu lenggah, meitei te zu meitei vi ve hi ven. Sangmang te hong puak vi ve hi zen hi ei.

Mi’ bawl bang a ‘ci [salt] tawh diah ding in alim seseuh khawng in kibawl thei lo a, tuisuak lel hi. Zu bawl na’ng bek a hoih pawl hi se lai hi. Bang cih mawk ding? Ih mei te le ih lenggui te laih ding ih hih kei leh? Korea ah lenggah nam khat te in “mu” nei lo in lim mah mah hi. Korea te in lenggui pen Zomi te bangin zaam sak lo a, a hiang 2 bek kasak ziau in kum sim Spring hun ciang pruning bawl in ahiang dep tan ziauziau uh hi. Leitung mun tuamtuam zongah tua dan mah kizangh hi. Zomi te in ih lokhawh dan, an ciing dan pan kipan ih khel ding tampi om hi. Zogam ah an teh singgah limtak in bawl thei le hang, ki zawng lo ding hi a, migam khawngah va ‘peem’ se zong kul lo ding hi.

An Neek Tui Dawn le Naseemdan

An neek tui dawn lam pen pawl khat sim loh Zomi te tawh kinai mah mah hi. Gtn: aksa tangcim, uisa tui huan, vok nakguh le an kam tui huan, cih pian khawng te Zomi te gawl tawh kituak mawh lo hi. Vok nakguh le alu tui huan pen “Kham Ja Thang” ki ci a, Zomi te’n ciamteh thei pen in zongh diksa pen uh hi.

A lo ah va hawh le h’ang buh lei pen lei niam sak in tui lakah zang lo ko uh a, a gei ah lei sang sak in huan bawl uh hi. Huan sungah mehteh mehgah nam kim ciing uhhi. Lo golpipi akhawh uh sangin lo neu khat sung ah na tampi kizing takin ciing uh hi. Alu, an kam, lothang san le kang, be ik, mai, manta le zasan te lim ciing pen uh hi.

An lak khit asawt loin phalbi tung pah ahihmanin anteh, tangmai, carrot cih te pawl khem peuh pen athuk in Kimchi bawl meng meng uh a, thambel sungah um uh hi. Tua pen maikum an lakkik dong an meh ding ahi hi. Korea-mi te in nisim in sa vi ve a ne ding sa kei un, Zomi te mah bangin sa vi ve ne zo sam lo uh hi.

Sea food khawng man ham thei mahmah mawk a, ne zo den lo uh hi. Ngasa khut pek cia khat ciang $15 bang man pah a, octopus a golpian an kuang khat cia te zongh tua zah mah man pah hi. Toktol, tengkol, kep, le tui sung piang nektheih nek mawh ne uh hi. Bawng sa man ham lua in, bawng guh man pha sak mah mah hi. Bawng khe guh khat in $ 40-60 bang man hi. Ih gam a bawng khe guh teng export thei zen le’ng ut huai hi.

Meh ding om kei le buhsih le kimchi tawh deih phatak zialsuk uh a, puak giapgiap ih ne uh a, “tu ni meh lim kei mawk ei” ci ngei lo uh hi. Meh lim ni in “lim lua si!” ci ngeingai na pi un, meh limlo ni in “meh lim kei” ci nuam vet lo se uh a, alim mah mah dan in ne ve ve se uh hi. Meh limloh manin naseem thadah tuan lo mawk uh a, Zomi te in lamdang sa uh hi.

Nasep pen hanciam thei mahmah uh a, nikhat in nai 9 pan 12 sung bang seem hamtang uh hi. Zum nasep hun te zongh 9:00A.M. pan 6:00P.M hi a, over time seem thei lai uh hi. Zan nai 9:00P.M.; 10:00P.M. khawng a zum tuak pan khawng tam mah mah hi. Ih gensa mah bangin “pal-li, pal-li!” tawh manlang takin nasem uh a, bel mah mah lai uh hi. Lungtang phasak ngiat uh hi.

Vietnam Gallai Sum Thalawhna

Korea gam ah US dan mah in tangval khem peuh kum 2 ½ sung galkap tum sak hi. Vietnam gal hun sung Pak Chung-hee in galkap te Vietnam ah volunteer in democracy ading gal sim sak a, American te panpih hi. American kumpi in galkap khat ciang khakhat in sumtang $ 800.00 ta pia hi. Tua lakpan alang $400.00 pen kumpi in cut a, gampuahna in zangh hi. Kawl mang te bangin Pak Chung-hee in ne tum lo hi. Alang pen kumpi bank ah khol sak a, gal pan hong ciah ciang alom in pia hi.

Tua bangin galdona pan sum thalawh lai uh hi. Kawlgam hutna in si le nai keh le luang ai tah sa a galsim Zomi galhang te tampi ih sih hun in ei zongh Vietnam gal khawng va do pih zaw thei le hang Zomi te hauh lawh ding hi ta’ng ci in ka ngaihsun kha hi. Tu hun in Vietnam gal ciah papi tampi in factory le company nei uh a, Zomi te in pu in man uh hi. Atung a Japan gal ciah Pipi te ahih le bel nilai nisial in Japan Embassy mai mah ah Wednesday Demonstration awng awng phot lai leh kilawm hi. Japan kumpi in lah thuum ding ngaihsun tuak nai lo a, Korea kumpi in zongh bangmah genna nei tuan lo bang khat hi hi. Tua te tawh tehna in Zogam a Pipi te bel ahampha cih ding hi kik bilbel uh hi. [aban zom lai ding…] Cope Suan Pau