Korea Gam le Mi te: Zomi khat ii muhna pan (3) ~ Cope Suan Pau

Korea Gam le Mi te: Zomi khat ii muhna pan (3) ~ Cope Suan Pau

Korea gam le Khangtona :: Korea gam khangto mah mah ci in ih mu zo hi. Bang hang a khangto cih zong, ih thei zo hi. Tu ni Korea gam in akhangtona uh akiamlona dingin hanciam uh a, na khem peuh leitungah akhatna ahi ding ut uh hi. Tua bangmah in akhatna angah uh tam simsim mah om a, gtn: IT pilna, kimawlna, cih te ah leitung top ah om uh hi.

Tua mah tawh kizui in suicide, divorce, etc. te ah zongh leitung ah first ngah kawi kawi hi. Tu laitak in mi 1,000 lak ah 3 pen divorced hi a leitungah asang pen hi. Abeisa kum sawmlom decade sungah divorce rate 250% khang a, honeymoon divorce nangawn tam ta hi.

Suicide rate zongh leitungah akhatna hi a mi 100,000 lak ah 30 phial hi. Ni sim in average mi 28 amau le mau ki thatlum uh a, nung deuh in nikhat thu 36 kithat a, atam pen hi. President te pan kipan, mayer te, min le za nei te, miminthang te , actor, actress te pan kipan kuama theih kholloh te dongin suicide ding baih sak mah mah lel uh hi. Bang hang hi ding hiam??

Korea-mi te in a Pupi uh Tan-gun le Sen te kiang pan angah uh Confucian ngeina sungah innkuan tupisakna ahi family value te hong kiam semsem a, ani ani in Westernized seemseem ahih man hi ci in Zomi khat ii mittang tawh kimu thei hi. Ei Zomi te zongh Western lam tung keei ta ihhihmanin ih pianna Pupi Pu Zo suan te in Western culture ngeina sungah khangto tading ih hih ciang, mailamah Korea-mi te mahbang ih hih ding kimu khol thei hi.

Korea gam le mi te pen “Han-guk” kici uh a, ‘han’ cih ciang ‘khat’ cihnopna hi a, ‘guk’ pen ‘gam’ cihna hi. Minam khat gam cihna hi. Ahizongin tu in minam khat bek hi nawn loin minam tuamtuam te tawh teng khawmta uh a, multi-cultural gam khat hong suak to to ta hi. Tu laitak in Zomi numei Korea-mi asuak 10 naai om khin a, tua lakah Ciimnuai numei 4 kihel khin hi.

Korea te nidang in 80% val pen lokho mi hi a, 20% sang atawmzaw bek mah khuapi sungah om uh hi napi, tu in urbanization hun hong tung mawk a, hun te kilaih in social change nasia mahmah hi. 80% val bang khuapi ah om ta a, lokho le ngabeng mi pen 20% bek hi lai uh hi. Ahizongh in tua 20% lokho le ngabeng te “ZI” ding Korean lianu te kuamah ut nawnlo ahihmanin minamdang te zong ta uh hi.

Tua kawmkal ah Muslim pasal te tampi hong lut uh a, Korean lianu te vi ve tengpih ahihmanin Islam hong khangto mah mah hi. Hih thu hangin kumpi in Muslim biakna limlim gamsung lut ding strict sak mahmah ta uh hi. Tu laitak in Koreami Muslim 50,000 kiim pha ding in ki um mawh a, gamdang mi 100,000 nasem in om uh hi.

Socio-economic Development: Mi te le sumbawl Khangtona

Korea gam pen leitungah export gam 11th na ah om hi. Na khempeuh export quality tawh bawl uh a, van hoih no no tampi bawl uh a, leitung sumbuk ah zuak theina ding kumpi in hanciampih hi. Gam zawng Asia gam te ah factory atam zaw tuah khin uh a, nitha le khasum tawmno tawh alungkim thei lai te nasem in hong cial uh pen meet kisa mah mah uh hi. Tua hangin Seoul khua kim factory te ah Zomi te nasep ding om lo thei zel mawk hi. Ih Kawlgam zongah factory atam zaw Koreami te a ahi hi.

Leisung sumpiang tam om lo a, Coal, iron, lead, zinc, tungsten, gold, graphite, fluorite cih te tawm khawng piang hi. Leitung zongah sing kung lian nei lo uh hi. Taak sing pen agam ii emblem ikon khat in nei uh a, mihau te bek in taaksing tawh inn lam zo uh hi. Taaksing phuk ding le at ding kumpi phalna kisam hi.

Zogam ah taaksing tawh innlam ding tuhun ciangin maizumhuai ih sa tamawk a, kikhial mahmah gige hi. Zogam taaksing te pan taaknai le sing deih phatak kingah thei a, laidal bang bol zo le’ng leitung a laidal hoih pen te ban ding hi. Guitar kuang bawl na ding taak sing hoih pen a, Zomi te apple puakna singkuang te tawh Yangon ah Guitar Myotaw te in guitar bawl mengmeng uh a, hauh lawh khin uh hi.

Hibang a hong khangto uh pen ih theisa mah bangin 1960s pan 1990s sung kum 30 galkap uk hun sung teng ahizaw hi. Ih gensa mahbangin galkap dictator te in agam uh khangto sak mah mah uh hi. Kawlgam tawh kilehbulh lian hi. Zogam Chin State zongh ah zongh galkap te mah in gam makai seem tawntunga, bangmah khangtona om lo hi. Korea te galkap uk sung 1988 in Olympic pawipi innteek seem uh a, civilian kumpi hun 2002 in World Cup innteek seem zo cih mawk pen, leitung G8 khawng, G20 khawng ah akihel zawh ding mah hi mawk hi.

Electricity le Energetic Power: Mei tha le Energy tha

Electric mei nasiatak in zangh thei mawk uh a, koi pan ngah mawk hiam ci in kakan hi. Gambup mi 52 million ading electric power 53.7 mega KW nei mawk uh a, 1 mKW/1million cih ding hi mawk hi. Koi pan hi zahzah power ngah thei mawk hiam?

Gunpi khat bek mah nei mawk uh a, hydro power pen 2% bekmah; Combustion 61%; le Nuclear 37% ahi hi. Oil them zongh piang lo in gamdang pan import bekmah zangh uh hi. Ahihhang gas meitui le oil patrol pen deihzah in supply zo mah mah uh a, Kawlgam le Zogam khawngah ‘datsi’ le ‘gas’ man ham, ngah zo lo, cih khawng om dek lo hi.

Inn ah anhuanna zongh innkuan khat in gas khakhat in $ 11 bang tawh an kihuan thei mahmah lel hi. Imported ahihmanin $ man kiam le khang zui hi. Tulaitak $1=Won 1,180 kim bang hi a, Kawlgam ah $ man ol zaw hi (1,000Ks nuai kia ). Electric tawh zongh deih bang in an kihuan ngam lel hi.

Politico-Religious Movement: Gamvai le Biakna Kalsuanzia

Gam vai le biakna peuhmah hel khak vetloh ding hi, ci in leitung khempeuh phial ah mi te in ih gen thei zel hi. Tua ahih le gamvai “naing-ngan-zi” le biakna kihel lo gam koi lai ah om hiam? Communist gam te ah maw? Tua gam te ah a upna ideology pen biakna sangin akhauhzaw upna te ahi hi.

America gam ah Christian ahi lo khat in president suak thei dingin na um hiam? Tu laitak Korea president pa zongh pawlpi upa khat hi. Korea te in tu dong president 10 nei khin uh a, amasa pen le tulaitak a president uh Christian Conservative mahmah uh hi. Tua bang ahihtheina bang hang hiam?

1919 Independent Movement le Christian te Din’ Mun

Korea gam ah March ni 1 ni pen gazetted holiday hi. 1919 March ni 1 ni in Seoul khuapi laizang Palace ah kumpi pa sihna paulamin gammi khempeuh 20 million kikhawm uh a, Independent proclaim uh hi. Japan imperial te ukna nuai pan lungkim loin suaktakna tangko uh a, letmat thu ngiat uh hi.

Tua laitakah makai 33 te in sign a thu na ah 16 te in Christian pawlpi makai te ahi uh hi. Tua hun sungin Christian te tam nai lo in gambup ah 1% bek hi pan a, population pen 20 million khawng hi. Biakna maikai a tul sim in thong kia a, kithatna le bawlsiatna tampi thuak uh hi. Tua hun lai pan kipan zingsang thunget kipan uh a, Buddhist te ngeina tradition pen azuih uh ci hi. Mitampi Christian hong suak uh a, pentecostal movement vi ve tawh kalsuan uh hi.

Zomi biakna makai te gam le minam suaktakna, le khantohna lamah koi ciang panmun le din’mun ih neih ding ih phal ding hiam? Kawlgam le Zogam democracy movement ah Christian te le pawlpi makai te’ din’mun role bang ci ih ngaihsun hiam?

Korea Christian mipi le makai te in minam le gam suaktakna dingin nasiatak in revolution na seem uh a, National Movement le Christian Movement pen kikhen thei lo hi. Japanese Imperialism do na, Japan gal do na WW II, Communist te do na Korean gal 1950-53; dictatorship deihlo a do na te [1970s-1980s] ah Minjung theology ci in [Mipi theology] bawl ngiat uh a, galkap mang dictatorship hun beisak zo uh hi.

Korea-mi te in Christianity pen Democracy hi ci in um uh a, tua a ding in si ngam uh hi. Zomi te in Christianity le Democracy ih koici muh hiam? “Kawlgam ah bel ‘talsan’ te le ‘ui tal’ te hong ki vat vat phot le uh aih ve” cih piandan abei sa hun in Zonet sung khawngah ih sim kha hi. Biakna le gamvai [naing ngan zi] peuhmah ki paikan sak kei ni ih ci zaw hiam??

Korea pawlpi le Zomi pawlpi kilamdangna pawl khat en dih ni.

Korea pawlpi te in tanglai pawlpi temah bangin pawlpi upa thupisak mah mah uh a, Elder le Deacon nei tuak uh hi. Elder te in thu nei sak a, deacon te ahih le thunei loin pawlpi huh [sawltak] ahi hi. Prebyterian influence hang hituan loin, Methodist, Baptist, Full Gospel [Assembly of God], avek in tradition khat sungah kalsuan uh hi.

Biakpiakdan kibang khin uh hi. Zomi te in biakpiakna ih bawl ciangin Chairman khat ih om hamtang a, Korea pawlpi te ah Chairman seem kamu nai kei hi. Zomi te kikhopna ah Chairman in hun uk a, khat veivei Chairman UK om thei lai hi. Korea pawlpi te pen Moksa-nim acih uh Senior Pastor in hun khempeuh UK lian hi.

Nipi ni zing kikhop pen agam bup uniform uh a, 11:00A.M. in kipan in, kipatna thunget, lasak khit phet Apostle’s Creed pen thupisak mah mah uh hi [Presbyterian le Methodist te in]. Tua khit choir sa in sermon muak pah a, mipi te cimmanlo in siapa Pasian Kammal lungpiltakin ngai pah uh hi.

Biakinn sungah mikim in Lai Siangtho bu amai ah lemsa in koih lian uh a, siapa thugen lungluttakin ngai uh hi. Zomi te bangin akihuau susup khawng, akikhoih sesup cihbang om se lo uh a, hun man ciang Lai Siangtho bu khupkik pan uh hi. Sermon man ciang Siapa mahin thuzaksakna manlangtak nei sem sem in thuphapiakna tawh tawp mengmeng hi.

Zinglam kikhophun 12:00A.M dong nai 1 sung bang bek sawt sakin tua khit teh an ne khawm hamtang uh hi. Korea gamah biakinn ih lam leh ann buk gol khat kisam masa hi. An neek khawm pen thupi sa mah mah uh hi.

Tetti pang nuam aom le minute 2 sung bek tomkimtakin gen a, mipi in “Amen, Hallelujah!!” pia hi. Zomi tetti pang te dan a nai khat bang gen in, Lai Siangtho bu lem in sim masa a, thuhilh hunzangh ding bang khat kithawi a, paina ciahna, mi tawh kiho na, zunthak, ekthak..etc. nangawn gen cih bang om lo hi. A buaina thu le pasian hotkhiatna tomkim tak in pulak khia lian a mipi in tha kingah mah mah hi. Zomi te zongh kikhel ta le’ng hoih ding hi!

Lai Siangtho le labu kithuah vive zangh uh a, gambup in pawlpi tuamtuam akibangin zangh khin uh hi. Tua pawl te labu, ei labu cih bang om se lo hi. Lai Siangtho version khat, labu version khat zangh lian a, Zomi te dan in pawlpi khat Lai Siangtho dang khat, labu version tuam khat cihbang hi lo hi.

Pawlpi member lutna bel ahihle Zomi te dan mah in ‘ko pawl’ cih pen nei mah mah uh hi. Ahihhang mun khat ah lungkimlona nei le pau lo ham lo in taisan ek thei hi. Zomi te dan in pawlpi sung ah “phun niloh” cih om lo hi. Pawlpi cih pen mission na sepna ding ci lian uh a, leitungah mission tam thei thei akhah zawh nading hanciamna le kidemna nei uh hi. Pawlpi tuamtuam kipawlin zongh mission khah uh hi. Zomi te dan a “hih pawlpi beel leng abelh tak diam? Ka sih ni in hong uap, hong vui zo na diam? cih te pawl tawh pawl lut lo se uh hi.

Zingsang thunget hanciam mah mah uh a, pawlpi gol pen khat ahi Myung-sung pawlpi ah zingsang 5:00a.m. thungenmi nisim in 7,000 bang pha den hi.

Korea mi le Zomi Kibangna le kilamdangna

Mualtungmi tuaktuak ih hi hi. Zogamah mual le guam bek om a, zangtam om lo hi. Korea-gam pen mual 70% hi a, zangtam 30% om ahihmanin zanglo kho in an ahau uh hi. Zomi te’n nidanglai lokhawh dan mah nuamsa in ih om laitak, Koreami te in lokhawhdan laih khin uh a, set vi ve zangh ta uh hi. Buh lei set tawh kho in, setmah tawh lei cil a, set tawh buh suan, set mah tawh buh at a, motor tungah buh gawipah in, an lak le zuak thuah pah uh hi.

Europe alpine zone te mahbangin khua hun 4 nei uh a, autum le winter phalbi hun kha 6 sung lokho thei lo, an cing thei lo uh hi. Tua santak ah Zomi te ih hampha zaw leuleu hi. Phalbi sungin Zogam ah an tek, neektheih tuamtuam ih hau mah mah hi. Phalbi kha 6 sung an piang vetlo ahihmanin tuksunga an tek nam khempeuh pen athuk in bawl a, Kimchi bebek in lelteh in ne uh hi.

Kimchi pen aduh lua uh hi masa lo a, an nek ding om lo ahihmanin sawt kimangthei ding ngaihsutna tawh a bawl uh hi zaw hi. Aneek neek uh ciang, limsa in kimchi lo tawh an ne thei nawnlo ta leuleu uh hi: Kimchi culture. Kimchi pen natna dal zo mah mah ci uh hi. Nidangin SARS natna hong lang laibang Kimchi ne peuh le’ng lau om lo ci uh hi.

Zogam ah zong Gatam ih neek pen Koreami te Kimchi mah bang ahi hi. Kawlgam ah “phak” natna tam mah mah na pi, Zogam ah 1% bekmah om hi. Tua pen Gatam ih neek hang hi dingin ki um hi. Gatam sungah sulpher tam mahmah a, [sulpher been hipah malam] neu lai a ih zatang neek theih ‘triple-sulphur’ khawng te sang khauh zaw le kilawm hi: ‘tetra-sulphur’ khawng ahiphial tam?

Zomi te mah bangin ‘Chu-soek’ anlak khuado pawi nei uh a, ni 3 sung gambup nasep khawl uh hi. Tua khit pen lo kho nawn vet lo in alo uh phalbi sung khempeuh sing kung lopa tawh sikhawm mai ta hi. March kha bei Spring kipathun ciang alo te uh puah kik pan a, April kha le May kha sungin an kung tuam tuam suan uh hi. Buh pen May kha bei lam in suan pan uh hi.

Zogam mual te pen kamsiatna tawh lei le suangteep vi ve hi mawk a, bangmahin kimang lo banah, min-cim baih a motor lampi kisia pah pah hi. Korea gam mual te suang mual vi ve hi a, suante gol in sak thei mah mah hi. Mual niam vi ve hi a, mual khat kheng leng zanglei om in khua le lo hoih thei mah mah hi. Mual pan suang te mine tawh kapkham in adeihdeih un zangh thei uh hi. Cement suang te vi ve hi a, lam bawl na, innlamna, phung ciangna, etc. atuamtuam in hoihtak le manphatak in zangh thei uh hi.

Khuata fork village te ah pai leeng, Zomi te om na hi le kilawm hi. Um keu mah zangh uh hi. Tu in zongh fibre tawh kibawl um keu te kizangh a, Zomi te mahbangin an a neek ciang keu pi tawh hawp ziahziah in dik hihit lai hi. Alungsim puakzia uh zong, khamtungmi lungsim lian hi a, Zomi te tawh kibatna om hi.

Akilamdangna khat ah Zomi te in lungkim lo in phun niloh in, nuak lai hi hang; Koreami te tuabang om lo hi. Asep khat peuh lawptak le nakpi tak, manlangtak in seem buatbuat uh a, bel sep mah mah lai uh hi. Manlangtak le beltak, hoihtakin seem uh hi. Pu te muhlohkaal in gel ding, seem lo ding cih lungsim nei vetlo uh hi. Zingciang ni aom nawnlo ding bangkhat in tuni in naseem uh hi. A kisap le sun le zan in seem uh a, 24hrs tatak mah aseem zongh om hi. [aban zom lai ding…] Cope Suan Pau