Malaysia, Klang Valley kuamsung ah maikal ni 3 sung tui hoihtak pailoding

Malaysia, Klang Valley kuamsung ah maikal ni 3 sung tui hoihtak pailoding

Malaysia, Klang Valley kuamsungteng ah maikalsung ni 3 sungbang tuisik hoihtak pailoding cih theStar pan kiza hi. Tuabang in tui hoihtak apailohding pen Tuesday (Mar 6) panin Friday (Mar 9) dong ahihi. (Theihding: Klang Valley cihpen Kuala Lumpur leh Selangor kuamsungteng akigenna hiphadiak a, Klang veng cihnabek hilo hi)

Hihbangin tuisik hoihtak apailohding ahangpen tuisik asiansakna Water Treatment Plant ah puahphatding akisam Emergency Repair Works pawlkhat om ahih manin, tui hoihtak apailoding ci uhhi.

Tuivai thunei ahi Syabas (Syarikat Bekalan Air Selangor Sdn Bhd) te’n agenna ah “Sungai Selangor Phase 3 (SSP3) Water Treatment Plant” Operator te’n seploh puahphatloh aphamawh mahmah Critical Equipment Repair Works cihi. Tuahangin Tuesday ni zingsanglam 8am panin 6pm dong, akigawm in nai 10 sungbang puahphatna neiding uh ahih manin, tui hawmkhiatna khakcipding cihi.

Tuahangin Petaling, Klang, Shah Alam, Gombak, Kuala Lumpur, Kuala Langat, Hulu Selangor vengsungteng tuisik hoihtak in apailoding ahihi.

Syabas te’n Tuesday ni in Statement agenkhiatna ah tulaitak hih Water Plant panin nikhat tuisik 800 Million Liter panin 810 Million Litter bang aki hawmkhiaden cihi. Tuisik nisim in aki hawmkhia pen tuazahbang himawk ahih manin, Klang Valley sung aomte aveng, aomna muntawh kizui in tui hoihtak angahkikding ahunpen ki lamdangding ci uhhi.

Petaling Region sung aomte pen Tuesday (Mar 6) 8am panin azingciang nitaklam 9pm hundong tui hoihtak ngahloding uhhi.

Klang leh Shah Alam kuamsung aomte ahihleh Tuesday (Mar 6) zingsang 8am panin Friday (Mar 9) zingsanglam 9am hundong tui hoihtak ngahloding uhhi.

Gombak kuamsung aomte pen Tuesday (Mar 6) 8am hunpan in Thursday (Mar 8) zingsang 12am hundong tui hoihtak ngahloding uhhi.

Kuala Lumpur kuamsung aomtepen Tuesday (Mar 6) panin Thursday (Mar 8) nitak 9pm hundong tui hoihtak ngahloding uhhi.

Kuala Langat kuamsung aomte pen Tuesday (Mar 6) 8am hunpan in Wednesday (Mar 7) nitak 3pm hundong tui hoihtak ngahloding uhhi.

Hulu Selangor kuamsung aomte pen Tuesday (Mar 6) 8am panin Wednesday (Mar 7) nitak 9pm hundong tui hoihtak ngahloding uhhi.

More: Maldives gamah tuisik dawnding omlo in cimawh mahmah

Tua ahih manin, Klang Valley kuamsung aomte hongtungding March 6 ni akipan tui hoihtak painawnloding ahih manin, akigingkholsa in omding thupi mahmahding hi. SYABAS te website pan inzong ahunhun in theihhuai Information te Update bawltotoding uhhi. Sawltak #zomidaily