Malaysia, KL Sentral leh Setapak kikal RM950 angen Taxi Driver khat kiman

Malaysia, KL Sentral leh Setapak kikal RM950 angen Taxi Driver khat kiman

Malaysia, Kuala Lumpur khuasung ah athumanlo in agamtat, Passenger te tungpanin sum uangtak in angen Tax Driver khat kiman cih NST pan kiza hi. Hih Taxi tungah atuangpen Bangladesh gammi 2 hi a, KL Sentral panin Setapak apai uh ahihi.

KL Sentral panin Setapak pen gamla hetlo, 10 km khawngbek hi a, ahi zongin Taxi asaap RM950 tak tungsak cimawk hi.

Land Public Transport Commission (Spad) te’n agenkhiatna ah Special Force te’n amanlang in tua Taxi Driver pen kankhiapah uh a, ki mankhia theita cihi. Police Report akibawl khitciang in palik te’n kanpah uh a, Thursday (October 05) ni in aki mankhiathei ahihi.

Athumanlo Taxi Driver pen kum 30 gualpawl hi a, ami leh Taxi kimankhawm in, thusitna kineiding cihi. Tuaban ah Taxi Operator tezong thudotna kineiding cihi.

Tulaitak tua Taxi Driver papen kikemcip photin “Section 75 of the Land Public Transport Act 2010” thukhun tawh thu kibawlding a, amawhna kiciantak in akimuhleh RM50,000 ki liausakthei a, thongzong kum 3 ciangbang kiatheiding cihi. Thong leh liausum anih inzong ki piasak theiding hi.

Police Report akibawlna ah hih Bangladesh gammi 2 tepen Kuala Terengganu panin Kuala Lumpur zuanin Bus tawh apai uh cihi. Kuala Lumpur, KL Sentral panin Taxi kawm uh a, Setapak zuanin atuang uh ahihi. Taxi atuanna kikal agamlatna pen 10 km khawngbek himahleh Taxi Driver pa’n RM950 tak tungsak cimawk hi.

Taxi atuanma in mikhat ciangin RM50 ta ci’n aki thukimsa uh himahleh aphual atun ciangin RM950 tak angen sukziau cimawk hi. Apai nading uh Setapak atun ciangin sum tampi anget ciangin ki kamnialpian uh a, ahi zongin Taxi Driver pa’n a mawtaw sungah singkhuah leh siktawn khawng misatnading kengmawk ahih manin, Bangladesh gammi 2 te’nzong nialnial nawnlo in angetzah apiakkha uh cimawk hi.

More: Grab Taxi hawl pasal khatin Passenger numeikhat buan, palik te’n mankhiapah

Taxi hawl te miginalo tampitak ommawk hi, ahih theihleh GrabCar, GrabTaxi leh Uber temah zat huaizaw hi. Tuatezong muanhuaipen cih hituankei, buanna tampimah kizaza khin veve. Ahi zongin Taxi mawkmawk te sangin muanhuaizaw khading hi. Banglokhat ihtuahkhak lehzong Booking ihbawlna panin Taxi Plate Number ompah ahih manin, kankik baihzawtuam dinghi. Sawltak #zomidaily