Huih hatlua ahih manin Kuala Lumpur sung aom sanginn atungkhuh lengkhia

Huih hatlua ahih manin Kuala Lumpur sung aom sanginn atungkhuh lengkhia

Malaysia, Kuala Lumpur sung aom “Sekolah Kebangsaan Danau Kota 1” kici sanginnkhat zanni in huihpi leh guahpi kithuah in khauhlua mahmah ahih manin, inntungkhuh pawlkhat mutkhiatsak cih NST pan kiza hi.

Tua sanginn pen dawl 3-storey building hi a, inntungkhuh alenkhiat khitciangin sanginn khatlekhat kikal aom Courtyard sungah tusuk in zaansuk zihziah hi.

Zanni nitaklam 3pm hunpawl in thupiang hi a, aki patauh mahmah hangin kuamah asi aliam omsamlo hi.

Sangnaupang te genna ah sanginn athuhkhuh lengkhia in, Courtyard sungah akiatsuk ciangin kilauthawng mahmah a, sangnaupang pawlkhat kapgawp, kugawp uhhi ci’n genkhia hi.

Sangnaupang numei khatin inntungkhuh alengkhia kamuh ciangin kalaulua a, ka sangsianu ka pomcipgawp hi ci’n genkhia hi.

Hihbangin sanginn athuhkhuh alenkhiatgawp ciangin sangnaupang te ii anu apa te WhatsApp tungtawn in kizasak a, na tate uh hongdawn un ci’n zaksakna kineipah hi.

Year One akah sangnaupang khat ii anu te’n agenna ah sanginn ah atapa adawnding in katun ciangin katapa pen lauthawng lualai Traumatized gawp in, kapkaplai hi ci’n genkhia hi.

Huihpi in anawkgawp khitciangin sangnaupang khempeuh School Hall ah Assembly bawlin kigualsak a, innpanin anu apa te’n adawnkhiat matengin bitna aomzawk nadingin sangsia te’n ompih uhhi.

More: Malaysia: Huihpi leh guahpi kithuah in Kelana Jaya LRT Station atungkhuh teng mutkhia

Kuala Lumpur Fire and Rescue Department panin Director Khirudin Drahman in agenna ah hih huihpimut tuahsiatna aom ciangin Setapak leh Wangsa Maju Fire Station panin Firefight akigawm in mi 17 in delhpah uh a, siansuahna leh etcianna kinei hi ci’n genkhia hi. Malaysia gamsungzong khuahun “Weather” pen abeisa kumte sangin siazaw deuhdeuhtawh kibang hi. Sawltak #zomidaily