KL khuasung ah Malay gammi te’n lungphona nei

KL khuasung ah Malay gammi te’n lungphona nei

Tuni 02 April sun 3pm hunpawl akipan Malaysia, Kuala Lumpur khuasung aom Dataran Merdeka kicihna munteng ah gammi te’n lungphona nasiatak in nei uhhi. Hih lungphona pen vanman akiam nading leh GST akici Goods and Services Tax te aomloh nading cih hi a, ni satcihtak in salela mahtaleh mi 2000 bang ki kaikhawm uh a, Sogo Shopping Complex lampan in Dataran Merdeka tualpi zuanin khetawh lungphona neiding in kizuisuk ziahziah uhhi.

Lungphona nei mipi te’n Placard tawh laikigelh atuamtuam tawi uh a, Malaysia PM asemlaitak ahi Prime Minister Najib Abdul Razak nangawn akhawl nading in ngetna nei uh cimawk hi.

Hih lungphona ah upmawhloh leh lemet lohpi in nidang in Prime Minister asemngei aminthang mahmah Tun Dr Mahathir Mohamad zong hongki helkha hi.

Amah hongtunciang in hih lungphona makai te’n Stage in azatpak uh mawtaw tungah kahtosak a, thugenna zong neisak uhhi.

Dr Mahathir in thu tomnokhat agenziauna sungah Malaysia gammi te’n laulotak in na lunggulhna uh genkhia un, mi zakding in genkhia un. Tua hileh gamuk makai te’n zapanding uhhi ci’n lungphona ah akihel mipi te thapiakna nei hi.

Hih GST pen nungkum April 01 ni in hongki pankhia hi a, tu’n kumkhat acing hita hi. Hih GST hangin vanman khangtuam ahih manin, ei mizawng gamdang gambel mite genloh, gammi ngiat te inzong zadah mahmah uhhi.

Hih gammi te lungphona hangin khuasung ah palik leh galkap te a mawtaw uhtawh kusak ziahziah in kileh ziahziah uh ahih manin, hihte kawmkal ah Zomi te kimat kihen ih thuakkhak dihdihloh nading in khuasungvak kidawm mahmahding hihang.

Tusung pen Malaysia gamsung ah UN Card atuh vaitawh kumpi te’n nawngkai hongsak kawmkal ah, amau gammi tezong akumpi te tungah lungkimlohna hongkhat nei uh ahih manin, lungphona kizakha kawikawi hi.

Tuaban ah Operasi zong Shopping Mall leh gamdang mite tamphatdiakna munte ah lutkawikawi a, UN Card tawi taleh tawita keileh amuh peuhpeuh uh Lorry mawtawpi sungah guangsuk mengmeng uh a, khumcip pahpahthei uhhi. Tua hi’n khuasungvak kidawm mahmah ni! ZD Sawltak #zomidaily