Kuala Lumpur khuapisung aom Bank ah damiah lutin, RM17,000 puakhia

Kuala Lumpur khuapisung aom Bank ah damiah lutin, RM17,000 puakhia

Malaysia, Kuala Lumpur khuapi sungah thautawi damiah khatin Bank sungah amahguak in damiah taih a, huntomcik sungin sum RM17,500 puakhia vingvengziau cih theStar pan kiza hi.

Zanni Friday ni in Jalan Genting Kelang aom Bank khatah damiah alut ahihi. Nitaklam 3:56pm hunpawl in tua damiah papen thaukhat tawikawm in, Bank sungah lutin damiah ataih ahihi.

Bank sungah damiah taihin alut hunsungpen manlang luamahmah, Second 24 sung bekbek sawt ahih manin, Bank sungah nasem pawlkhat leh Security Guard te nangawn in theiman loliangding uh cihi.

Hihvai tawh kisai in Wangsa Maju OCPD Supt Mohamad Roy Suhaimi Sarif in agenkhiatna ah Bank sungah damiah alutpen khatbek hi a, ahi zongin apualam ah alawmte khatin Motorcycle khattawh Ready sa in nangak gige cihi.

Bank pen nitaklam akikhak madiak in damiah ataihvat ahih manin, damiah ataih hunsungzong manlang mahmah a, kuamah mitampi in damiah akitaih ahihlam theipaklo uh cihi.

Tua damaih pa in Motorcycle lukhu “Helmet” khat khusa in amaizong Mask tawh tuamkawm a, akhutsung ahzong thautawh akibangkhat tawikawm cihi.

Bank sungah Counter mun awng khatah lutsuk a, Bank nasem te kiangah kuamah gamtang khavet kei un ci’n agenkhit ciangin Drawer sungpanin sum aomteng luatkhia mengmeng in taikhia vingveng hi ci’n thunei te’n genkhia hi.

Tuabangin damiah alut laitak in Security Guard zong mi 2 aom cihi. Tuate lakah khatpa pen thautawilo in Bank ii amailam ah aom laitak ahihi. Adang khatzawpa pen thautawikawmsa “Armed” Security Guard hi a, ahi zongin tua damiah alutlamzong theikhaman loding in ki ummawh cihi.

Damiah alut hun laitak in aomkha Customer mi 2 te ahi zongin, Bank sungah nasem te ahi zongin kuamah aliam omlo hi.

More: Temtawi pasal khatguak in UOB Bank damiah taihin RM46,000 puakhia

Damiah ataihpa pen manlang mahmah in, ahi zongin khuttuam “Gloves” bulhkhalo ahih manin, Police te’n akhutma “Fingerprint” pen sumkoihna Drawer tungpanin lakhiathei uh cihi. Police te’n CCTV Footage tezong kaikhawm in, hoihtak in akansan laitak uh ahihi. Hih Bank sungah damiah alutna pen asunglam nasemte khatpeuhtawh kipawlhiam cihzong Police te’n kansan cih kiza hi. Sawltak #zomidaily