KL Airport sungah suamlupna in akizang guza bangnam te cih kitheita

KL Airport sungah suamlupna in akizang guza bangnam te cih kitheita

Malaysia, Kuala Lumpur Airport sungah aki suamlum ahi North Korea gammi Kim Jong Nam ii asihna athu taktak pen tuni Friday (Feb 24) ni in Malaysia Police te’n genkhiata uhhi. Kim Jong Nam pen February 13 ni in KLIA2 sungah numei nihin amaitang ah gu tatsak kici a, tuatawh asi ahihi.

Asih khitzawh akipan Post-mortem bawlin asihna ahangleh bang guza hangin si cihpen Malaysia kumpi thunei te’n kancianna abawl uh hi a, ahi zongin a Result pen khahkhia theipahlo uhhi. Tuni in tua amai ah aki tatsak guza pen pulakna neitaktakta uh a, “VX nerve agent” akici Chemical Weapon kizang cihi. Tua “VX nerve agent” kici Chemical Weapon pen mihingte bawlkhiat lakah alauhuai penpen guza in akiciamteh ahihi.

United Nations inzong hih “VX nerve agent” kici pen mi alomlom in athatthei alauhuai mahmah Chemical Warfare Agent khatin aciapteh uh ahihi. Inspector General of Malaysia Khalid Abu Bakar in Press Release ah agenkhiatna ah “Centre for Chemical Weapons” te’n hih akizang guza pen akankhiat uh cihi.

Hihbang in kankhiatna abawltheih nading un asipa ii amit leh amaitang panin sathem at khia uh a, tuapan in azonkhiat uh ahihi. Malaysia Chemistry Department panin asipa maitang ah akizutsak guza pen “ethyl S-2-Diisopropylaminoethyl methylphosphonothiolate” ahih keileh “VX nerve agent” ci’n amuhkhiat uh ahihi.

United Nations in hih Chemical Weapon pen “weapon of mass destruction” ci’n aciapteh uh ahi, hih guza pen bangci bangin Malaysia gamsung ah ki ngahtheihiam cihpen Malaysian Police te’n limkan mahmahlai uhhi.

Gampua lampan in hongkipua hiam, ahih keileh Malaysia gamsungpan akibawlhiam cihpen kitheicianlo a, kumpi thunei te’n Kuala Lumpur Airport sungtengzong Radioactive Material khatpeuh aomlai khakding siansuahna neisak uhhi.

Hih “VX nerve agent” pen a gimna omlo, limna neilo “tasteless & odourless” ci a, lauhuai mahmah ahih manin “Chemical Weapons Convention” in akhamcip Chemical khat ahihi.

“VX nerve agent” pen namtuamtuam in kibawlthei a, atui “Liquid” inzong kibawlthei, nuhding in Cream inzong kibawlthei, hoihtawh kaptheih dingin Aerosol inzong kibawlthei cihi.

“U.S. Army’s Edgewood Chemical Biological Center” te genkhiatna ah hih guza Chemical tawh akisawhkha tepen Minute 15 sungin sipah uh cihi. Leitung ah alauhaui penpen guza Toxic in akiciamteh ahihi.

Moment of Kim Jong-Nam attack caught on CCTV, Malaysia

Malaysia Kuala Lumpur Airport sungah aki suamlumpa pen tulaitak North Korea Leader Kim Jong Un ii asanggam khatzong ahihi. Unau sanggamkhat ahih hangin hih asuamlumsak zong Kim Jong Un ii vaihawm hiding cih South Korea leh US Media te’n genkhia uhhi.

Asipa pen amintaktak akitheihna ah Kim Jong Nam himah leh, asihni Macau City zuanding in akithawi laitak KL Airport ah atawi Passport pen atung ah aminpen “Kim Chol” ci’n kigelh hi. Kim Jong Nam ii atapa Kim Han-sol zong Malaysia ah apaluanghawm lading in paiding kicici a, ahi zongin amahzong apa asihkhit ciangin aki suamlupding patau mahmah cih kiza hi.

KL Vanlengtual sungah Vietnamese numei khatleh Indonesian numei khatin Kim Jong Nam ii amai ah guza atatsak uh hi a, tua atatkhitzawh asawtlo in asipah ahihi. Tua guza amai ah atatsak numei nihte zong atatkhitphet un dailenbuk ah akhut uh silpah cihi.

Kim Jong Nam pen KLIA2 Airport panin Putrajaya Hospital ah akipuak laitak in lamkal ah asi hi a, aluanghawm pen Putrajaya Hospital panin General Hospital Kuala Lumpur ah kituah in tudong kikemlai phot hi. ZD Sawltak #zomidaily