Kipumkhat nading thungaihsutna pan

Kipumkhat nading thungaihsutna pan (Our Language and Ethnic Identity: From Unity Perspective)

Thumapui – Minam khat ih hihna hong langsak thubulpi (identifying factor) pen sisan hi a, a hong kipumkhatsak thubulpi (unifying factor) pen ih kampau leh ih lai hi ci leng kikhial lo ding hi. En pak lehang sangam unau pipi nangawn pau a kibat kei ngei ngei leh ih kikholhdan hong nop pha khol lo pah hi. Ahi zongin pau kibatlohna bek siksanin sisan a kibang gige ih mipihte huatbawlna le pusehna lungsim (exclusivism) ih neih het lo ding zong a kisam thu khat ahi hi.

Bang hang hiam ih cih leh ih leitung nuntakna ah thu haksa khat peuh tuak kha lehang i sisan kibatpihte mah in vaisuk vaito hong hawmsakin hong huh hong panpih bek zel uh hi. Tua ahih manin ih pu ih pate in sisan in thu gen hi ci-in thuciin (axiom) khat a na neih uh pen a man thu ahi hi.

Leitungah miphazah awn (7500) val bang omin pau nam (7,105) bang om hi kici hi (2017 kum Bible Society of Myanmar Annual Report pan). 1966 kum a kibawl kampau ciamtehna laibu (ethnologue) in leitung buppi ah ei Tedim mi pen (344,100) pha hi cih na ciamteh ahih manin Kawlgam minam phazah tawh ki-etkak lehang a citawm mahmah (very small minority) “Ciimnuai” innkuan khat bek ih hi lel uh a, tulaitak Rakhine gam panin Bangladesh gamah a galtai Rohinga minamte sangin ih citawm zaw pek uh hi.

Tua hi a, lai leh pau leh ngeinakip nei kei kha leng minam dangte’ vuknelhna (assimiliation) thuakin Kawlgam tangthu sungah minam lian mahmah khat hi ngei napi tuhun ih tangthu sungah a minam hihna uh (national identity) a mansuah Pyu minamte ih bang kha theih mai ding uh hi.

Tua ahih manin a beisa kum (100) hun a lai (script) a hong na bawlsak sangmang Joseph Herbert Cope tungah lungdam ih koko ding uh hi mai hi. Tu-in ama’ hong na bawlsak ih Zolai tungtawnin ih pau, ih lai leh ih minam hihna koici kep leng hoih ding cih tawh kisai-in ka ngaihsut thu pawlkhat a nuai a bangin kong kuppih nuam hi.

A. Sangmang Cope leh ih Zolai

Tedim gamah AD. (1900) kimin Pu Pau Cin Hau in laimal (1500) a pha “Zo Tual Lai” (Laipian Script) na bawl khin zo a, Cope sangmang pa in a hong na bawlsak Rome laimal a kizang Zolai (Romanized Script) hong pian khit a kipanin Laipian lai pen damdamin hong kiam hiaihiai a, tu-in amau’ biakna sung bekah kizang lai bek kici hi. Laigelh dan (art of writing) tawh kisai ih theih tawpin kan leng Egypt mite in BC (1800) kim pawlin na zang khin uh a, tua pen lim laimal (hieroglyph) ahi hi.

Babylon, Sumaria-te le adang minam pawlkhatte (tanglai Persia minam, Assyria minam te ) in BC (4000) hun pawlin buan tung le suangpek tung peuh ah cuneiform a kici laigelh dan tawh na gelh thei khin uh hi kici hi. Greek mite pen BC 1000 kim pawl lailu (alphabet) tawh laigelh dan a zang masa pente hi uh a, amau’ laigelh dan pen Italy le Europe gam nitumna lam dongah kizelh suak hi. Rome mite in tua Greek laimal mah puahpha uh a, tua panin a kicing zaw deuh Rome laimal (Roman Script) hong piangkhia-in tua laimal tawh Cope in ih Zolai a hong na bawlsak ahi hi.

Cope in ih Zolai a hong bawlsak laitakin ih Zo tangthu kimkhat guang nuam ahih manin Tedim gam sunga a teng beh bul (chief clans) sagihte ahi Sizang,Sukte, Saizang,Tedim, Thado, Zo leh Guite beh sung panin Zo tangthu a theih mi pawlkhat na dong ngiat a, a bawl na hi tuak hi.

Zo khang tangthu a theih a kidong mite lakah Pu Tuang Za Go (Manlun beh, Lomzang khua) zong khatin na kihel kha ahih manin Zo Laibu a kibawl masate sungah (a diakdiakin Neino tangthu sungah) “Neino, Neino, nang ba bangza na khawng tai” a kici laigualte banah adang Zopau tam khop khat na kiguang thei kha bilbel hi. Hih ih Zolai Simbu pen kumpi sangte ah (1924) panin (1971) dong na kizang a, ahih hangin 1971 kumin (first revision) a kibawl ciangin tua Zolai Simbu sungah Zo awkaih (Zo accent) tawh a kigielh laigual khempeuh a vekpi-in Tedim awkaih (Tedim accent) tawh kilaih mang khin hi.

A taktakin ci lehang a tunga Tedim lai (Tedim dialect) cih pen a om masa (a piang masa) hi lo zaw a, a tunga ih gensa ahi beh bul sagih teng munkhatah (Ciimnuai, Geltui, etc;) sawtveipi a na tenkhop khit uh ciangin “Tedim Pautaang” (Koine Tedim or Tedim Common Language) khat a hong piangkhia dan na hi tuak zaw hi.

Tua kampau pen Cope in “Kamhau pau” (Kamhau dialect) na ci a, tua pau tawh Zolai Simbu a na bawl ahi hi. Greek galkapmang pa Alexander the Great hunin zong “Ionic”(Greek nisuahna lam mite’ kampau) le “Attic” (Athen mite’ kampau) nam nih kigawm Greek pautaang” Koine Greek” or ”common language” a kici kampau khat a na piankhiat dan le Briton, Jutes, Danes, Angles, Sexons le Normans minam guk kigawmin “English” lai leh kampau a na piankhiat dan tawh kibang dingin ka ummawh hi.

Cope hun ciang ciang pen ih minam min “Zomi” a om nai lo dan na hi tuak hi. Na om hileh Cope in Kamhau dialect a na zat theih nang thu om ka sa kei hi. Zo tawh kisai lai kigelh sunte ih bat khopkhop en leng Zo a kici kammal pen tangtawng pekin na om a, ahih hangin tulai mi pawlkhat’ pomdan leh sandan tawh kibang kei deuh leh kilawm ka sa hi; ahang pen tua hun lai-in Zomi a kici kammal in Chin Hills sung banah India le Bangladesh gam sunga a teng singtang mi (hilly people) khempeuh a huap a kizang dan ahi hi.

B. Ih pau leh ih minam min

A tunga i gensa bangin ih pau, ih minam min le ih beh min cihte pen olno tak a hong piang vat hi lo mawk a, kum sawtveipi tak munkhatah ih tenkhop ih giahkhop ciang bek a hong piang hi pan bek ahih manin i pau le ih minam min a manthan lo nadingin ih kepcing ding le ih zun i puah den ding kisam ding hi. Tangtawng pek (from time immemorial) a i zat sa ih kampau, ih lai, ih minam min leh ih tang ngeina cihte pen ei ut thu a kimawk laih ziauziau thei hi lo hi.

Gentehna-in ei le ei “Zomi” tawh ih kilawh hangin Khamtung gam sunga a teng ih sanggam adangte in “Tedim mite” mah hong ci lel uh a, tua mah bangin amau le amau “Laimi” cih tawh a kilawh phial uh hangin eite in “Pawite” ih ci ziau lel uh hi. Tua tawh kizomin eimau sungah “Zomi” “Laimi” leh “Cho” cih bangin ih kilawh sam hangin, ih ut a ih ut kei zongin kumpite hong theihna pen Chin hi phot tadih hi.

A hih hangin 1953 kumin khamtung gambuppi tuiphum kipawlna min pen Rev Hau Go maikaihna tawh Chin Baptist Convention na kizang loin “Zomi Baptist Convention” na hisak uh hi. Tua hi napi-in ei Zomi deih teng mah in a hanghang tawh ih taisan zel uh a, a sawt loin i lawmte in Chin Baptist Convention tawh hong na laihsak ziau ta hi. Kei theihna ah Sia Hau Go in Zomi cih kammal a na phuah lai-in Zomi pen Chin tawh a kikim ahi hi (Chin tanga na kizang ahi hi).

Hih bang kawmkal panin ei Tedim kampaute in Zomi bup (the whole Chin) tanga kizang “Zomi” min pen eimau’ aituom min dinga ih zat pen ngaihsut huoi-in ka um pong hi. Ih gensa bangin Zomi pen Rev Hau Go le makai luite in Chin tanga a na zat uh min hi a, tua ahih manin ei Tedimte bek in eimau’ min dinga ih zat pak ding pen a hi nai kei kha tam a ci nuam ka hi hi.

A tunga ih gen thu tawh kisai-in Sia Khai Suan Mang in zong kum (2007) a kihawm khia “Ciimnuai Khuavak, No 10, laimai 76 ah “Zomi a kizat ciangin tulai taka Chin tawh a kibangin a kingaihsun ahi hi.(Gentehna-Zomi Baptist Convention). Tua hinapi-in eimau mah in Zomi kammal ih deihna ih neusek kikkik a,Tedim kampau teng bek Zomi ih suah ta hi (Gentehna: ZCLS, ZOMUS, ZOLUS).

Ih Zomi pihte in zong hong zat pih hi kei, eimau bek kici lel ni ih cih leh Ciimnuai tangin Zomi cih zat theih hi, ci-in ka ngaihsun hi. Tua ahih kei buang leh ih kammal zat Zomi pen toi ka sa lua hi,” ci-in a na gelh bangin Zomi pen ei Tedim kampaute bek’ min suah pak nai loin Zo minambup (Falam, Hakha,Tedim, Mindat, Matupi, Kanpalet, Paletwa, etc;) te min (national name) suah phot lehang ih makai lui ahi Sia Hau Go leh a lawmte’ nasepna a kipsak ih suak kha kei zaw tam a ci ka hi hi.

Tua banah eimau’ phuahsa Zo gambuppi min pen ei Tedim kampau teng (Tedim speaking group) in eimau’ min suaksak mawk leng thukhual vai pha lo mawk ding hi. Tua sangin ih kumpi leh mi tampite in hong theih pih ahi ih Tedim min mah angtan pih phot a, a picin semsem nadingin ih puah ih zun toto dingin hoih ka sa hi. Kei mimal khat’ muhna ah kamphen kul lo teng pen Tedim cih min in hong gawmtuah theih penin zong ka um hi.

Thukhupna – A tunga ka thugen sungah mimal, minam, beh le phung a sukha lo dingin kipumkhatna ding (for the sake of unity) ngimna bek tawh a hong kuppih a kineih ka hih manin kammal zatkhialhna le na san zawh loh uh a om khak leh nong maisak nadingun zong kong thum hi. Pasian in ih minam hong tawisangin thupha bukim hong pia tahen. Sia Mang Do Thang