Kipawlna kamkupzia ding ~ Hau Za Cin

Kipawlna kamkupzia ding ~ Hau Za Cin

Kipawlna khempeuh in kamkupna (meetings) a neihloh a phamawh hi. A neihloh a phamawh hi a, a kisam hamtang thu ahi hi. Kipawlna beklo nasepna company leh kumpi in zong thu leh la khat peuh ah kamkupna a neih tawntung a kisam ahi hi. Tua manin bangci kamkup ding cih pen a thupi mahmah khat hong suak hi.

Makaite in kalsuanna thak a om ciang, ahih kei leh maithak a lak nop ciangin thukhentatna khat om masalo in kalsuan theilo hi. Ut banga kalsuan masa in tua khit ciang kamkupna neihpih kikcih bang omlo a, khentatsa kamkuppih cih zong a om theilo hi. A tuacih leh a seppihte lungkimlo dinga, a ma nung thuapte lunghiang ding uh hi.

Muanlohna hong lian dinga, kithutuahlohna hong piang ding hi. Tua manin thu leh la khat peuh ah vaithak tawh kalsuanna, vaithak neihna ding peuhmah ah kikup masak, thukim masak, tua khit ciang kalthak, mathak lak pan ding a hi hi. Tua pen makai khatin a seppihte a thusimna a lahna hi a, a seppihte tawsawnna a ngahna hi a, a seppihte muanna a ngahna ahi hi.

Mimal kalsuanna hilo in pawlpi kalsuanna, kipawlna khat in kalsuanna ahih manin mi khempeuhin, a kuppih thei ciang ding ciangtan omsa teng in limtak, suakta tak, hangsantak in a kuppih masak a kul ahi hi. Tua pen kipawlna a kho nading, a lawhcinna ding, a tup a ngim a tangtunna dingin a kisam ahi hi. Mite in zahtakin etteh ding uh a, thupisa in pawl bawl ding uh hi.

Sep khawm diamdiam theih pen mihing nuntakna leh kipawlna ah a kizahtak penpen khat ahi hi.

Kamkupna gina takin a neilo kipawlna sungah mite alungkim bangin a om uh hangin a sungtawng vuah lungkimlohna, ahih hang lungdam khitlohna om veve hi. Tua pen a lehlam in thuklut thei a, kipawlna kisiatna leh kipawlna pan kikhenna peuh suak thei hi. Thu leh la khatpeuh ah makaite, makaipa, thuneite in amau thu bek viklua, amau thu bek bulphuhlua, amau thu bek ultungsak lua in a om ciang mipi thadah in mipi thanem hi.

Kamkup siamna sungah makaite in a lungkimlohna uh, a lungkimna uh, a kicingin genkhia thei in mipi nautang zakloh in kamkum teng thudik thuman in kihilh uh a, tupna kibang, ngimna kibang neisak hi. Supna liauna khat hileh zong a hi ding bangin kalsuan in a met ding ahih leh zong a met ding bangin hamphatna kingah hi. Naseppihte tawh suakta taka kamkuppih thei makai khat pen a pil, a siam hi a, makai cing ahi hi. Ama thu bek a deih leh ama thu bek tawh a kalsuanpih makai khat pen makai cinglo hizaw hi.

Tua ahih leh makaite kamkup ciang bangci kalsuan ding? Bangteng gen ding? Koi ah kikum ding? Bangtan sausak ding? Bang deihna tawh kamkum ding? Bangci ciamteh ding? Bangci kamkup zo ding?

1. Kamkup a kisapna: Kamkum dingin a kisap khawm ma un a gen ding thute uh limtak a makai diakte in a tel mahmah ding, a huan mahmah ding kisam hi. Kuateng kikum ding, bang kikum ding cihte zong a khentat pah ding uh ahi hi. Mi tampi kisamlo a kizo thei ding ahih leh mi khempeuh, committee sunga mi khempeuh kisamkhawm lo in gensiang theih hi.

Laidal hawm tungtawn in kician lel ding ahih leh zong laidal bek hawm lel ding hi. Phone tawh kikup theih ahih leh mun khat ah kituah sese kullo hi. Tua mah bangin email tawh, sms tawh, etc. Kamkup ding a om ciang a kihel ding khempeuh a kikup ding thu ama in hilhkhol ding, a phual a mun a tun uh ciang kihilh pan cih bang hilo ding hi. Thu theisa in kuan leh kuppih ding thei ding uh a, thu kikup dan nuamzaw hamtang ding hi.

2. Bang gen ding: A kikup ding khempeuh uh kician taka kizaksak khit ciangin mel a muh theih dingin laidal tawh kipiak kholh hamtang ding hi. Kup masak ding leh a nunung ding gualsa in om diudeu ding hi. A kihel ding peuhmah in a kikup ding uh thei masa, sim masa, a kup ding dan zong kigingsa in kuan dinga, thu kikup nuam mahmah ding hi.

3. Bangtan kam kum ding: Hun pen kihawmthawh ciat hi. Kamkupna ah a kisam bangin hun kizeek tawmtawm thei a, tua bang ciangin upmawh sangin sauzaw hamtang hi. Tua bang ciangin mite thadah thei hi. Kamkup kik ciang hun sawtlua ding cih kihta khol in kihello thei uh hi. Tua manin kamkup ding a hun ciangtan ding, a kipat hun ding lian in kipatpih ding, ahih theih leh a tawp hun lian mah in tawp sawm ding hi.

Tua hileh mite lungdam in nuamsa uh a, kamkupna pen vangik bangin ngaihsunlo thei uh hi. Hun saulua leh mite thadah bek hilo in thanuam taka kamkup om nawnlo in a suak bangbang in suakta hen ciin zulhtat gawp, hihsuk gawp theih a, “Ciah kuan bal em,” acih uh bang thei hi.

4. Tup leh ngim bang: Kamkupna khat peuhpeuh ah kamkup ding kigual suk khin napi a kup ding pen kikumloin thudang pi ah luttoh gawp theih hi. Kamkup ding pen banghiam cih a tup leh a ngim ah lut kik sawm hamtang ding hi. Kinialna, deihdan kibatlohna hangin a thulu pan thudang khawngah a lut ciang zong a deihna mah ah lutkik ding hanciam ding hi. Tua ahih kei leh pawlkhat thanem in lungkimlo, thadah thei hi. Thadahna, thanemna a om ciang thu pen deihbangin tang zolo, hoih zolo, siangtho zolo hamtang hi. Tua manin makai pen in i tup i ngim bang hiam cih tel in lampial khak leh zong a tup leh ngim mahah a zol kik ding a ngeina hi.

5. Koi mun ah kam kum ding: Kamkupna ding mun pen a thupi mahmah khat hi. Makaipite inn ah kamkum leng a makai dang pawlkhat thadah thei hi. A gennop uh gen ngamlo, maitang zahtak cih om thei hi. Mi khempeuh adingin a suakta thei pen mun, neutral venue, ah hi thei hamtang leh deihhuai hi. Lungsim siangtho tak kisam ahih manin gamdaihna mun, khuavak limtak a kingahna mun, tutna nuam leh siangtho a kicinna mun hi hamtang leh hoih hi. Gamlum leh mun siangtho lo ah kim leh pam in lungsim ngaihsutna nawngkaisak thei hi.

6. Kam kupte ciamteh ding: Kam kupna sungah thukimna khempeuh sepsuah ding ahih manin a banban in limtak in ciamteh suk diudeu ding ahi hi. A banban in sep suah ding ahih manin a kisemta hiam, bangciang kitung ta hiam cih theihna dingin laidal tungah hoihtak gelh in a kihelte leh a kisaipih khempeuh tungah hawmkhiat kik ding ahi hi. Mipi theih ding a om leh pulak a, zaksak, laidal hawm ding ahi hi. Laitui laidal ah a kigelh kei leh kimangngilh a, kiciamteh khin zolo hi.

Kua in bang sem ding, kuain koi ah ma la ding cihte ki enkik theilo hi. I tunna ciang theihna ban ah kamkupna neih kik cianga matutsa leh maban etkik na dingin zong a kisam ahi hi. Tua manin kamkupna thukimna leh thukhentatte limtak ciamteh ding ahi hi. Sep zawhloh, sep lah a omleh zong kamkup kik ciangin in thukim taka sep theihloh ahihna genkhawm in thuzukkik, dokkik ding ahi hi. Thukhentatna khempeuh lah zahtak a, sep hamtang sawm ding ahi hi. Seploh ding pi lah huaihama thukhenna bawlbawl ding zong hilo hi.

7. Kamkup ciang tawpna bawl dan ding: Kamkupna a kineih limlim ciangin a tawpna ah kamkupna makai pen in hoihtak in tawpna a bawl ding ahi hi. Thukhenna thupi diakte genkik in, thapiak ding a om leh thapiakna, thuhilh ding a om leh kithuhilhna hun in limtak a zat ding ahi hi. Kamkupna ngimna leh deihna a tangtung maw tunglo cih zong a seppihte kiangah a pulak ding ahi hi.

Thukhupna bawl siam leh siamloh ah kamkupna a nopna leh noplohna kinga mahmah hi. Van thak, vai thak tawh kitawp hamtang ahih manin makai pen in naseppihte a thapiaksiam zong kisam mahmah hi. Banghang hiam cih leh mi pawlkhat in a sep ding masuan a ngaihsut ciang thanem khol khin thei hi. Tuate thapiak, motivate, encourage kisam hi. A lomthaw luate zong taihilh pianpian a kul leh hih bang hun pen hun hoih ahi hi.

Thukhupna: Hun leh sum, tha leh ngal tampi bei kamkupna ah mite hong pai uh ahih manin a kimeetpih khollo kamkupna pen mi khempeuh in suphuai sa ding uh hi. Tua manin a tunga thute lungngai kawm in kamkupna ding vai khatpeuh ah pilvang takin gel khol, kiging khol in kalsuan ding ahi hi. Kimu pak in thukikupna bawl saisai cih khawng zatloh ding hizaw. A ni a kha mah tawh kalsuan in gel khol, ngim khol in kikup tangtang ding ahi hi. Nuam deuhdeuh ei Zomi! Hau Za Cin (Phuitong Liim)