Kipahtawi huai mah ee ~ Pau Khat Suan

Kipahtawi huai mah ee ~ Pau Khat Suan

Ahih hang – – – – – Sangkah khempeuh sang tungphet lai zo hipah lo a, lo kho khempeuh in an hau pah zenzen lo hi. Ommuan, khuadak hiiheei a kipahtawi ding a thatang ut pawlkhat in, damlai a kipahtawi ding lim gen mahmah uh a, luvom simna dan bang keek a miteng a ban pahtawi ponghelte lah amah kipahtawi ding a ut teng hizel kawikawi hi.

Amah a pahtawi kik ding a a lam-et bangmah-lo teng pahtawi hanciam mahmah bilbel uh a, a pahtawi huai taktakte kipahtawi takpi leh amah kikheng peelmawh ding cih thei uh ahihman in tuate pahtawi nuam hetlo, kimuhmawh bawl citciat uh hi.

Pahtawi huaite pahtawi takpi a, pahtawi huai lopi pahtawi tantan pong hetloh i zattheih a, a pahtawi huai takpi leh takpi lo i khentheih ding kisam leh thupi hi.

Pahtawi genloh, a khaam huai lua mahmah khawng kimaitang-phat a, ki-pumpahtawi gawp pong in i minam sung nak suksiat mahmah hi. Pilna, thu ngaihsut theihna, ciim takpina, thukhualna, thupha bawlna… cihte sang in a-hihna khempeuh a pum-pahtawi pong ding mi kisam zaw lel ahih man in, hih a deihhuai taktakte man neinawnlo sak a, khangthakte’ pilna lunggulhna a kipan ahoih apha thupi ngaihsutna kiamsak in, sawtsawt leh mihai, ngongtat, angsung thei minam suak ding hihang.

Etlawm tak a Pahtawi ngah ding i ut takpi leh pahtawi tak cing takpi ding hanciam zaw lehang a, a hi veivei leh ciamnuihna ciangkhop a kipahtawi bel ngaihsun pha lehang… khantoh gimnam zaw in um ing.

Tuni in Kua pen Bangci bang in kipahtawi … cih thupi kasa hetkei a, ahi zong in mailam saupi a ong piang ding agah tawh ka etkhop ciang, mihai pahtawina in haina thupi a sa, mihaite’ lalna gam ong suaksak ding cih kimukhol thei ahihman in lungzin huai leh lam-et bei ka sa mahmah hi.

More: Kua tawh kiho nawn ding? ~ Pau Khat Suan

Innsung a kipahtawi, ei’ huang sung ciang a kipahtawi leh khuapi kulhpi kongkhak a kipahtawi.. cihte khensiam lehang maw.. Pau Khat Suan