Khualzin gamvak nasep na (Tourism) ~ Dal Sian Mung

Khualzin gamvak nasep na (Tourism) ~ Dal Sian Mung

Thupatna: Mihing te in van thak,nathak munuam, theinuam hi hangh.I tun ngeinai loh I muh ngeinai loh na munte tungnuam,munuam ciat hi hangh.Tua man in khualzin khia in pilna tampi I ngah hi.Ikhualzin na pan I tuah thu,I muh thute hang in pilna muhna tampi i mu,i thei khia hi.Tourism nasepna pen mikangte in smokeless industry or invisible export ci in thupit ngaih sut mahmah uh hi. Tourism nasepna pan in gam sung income sum muhna tampitak khangto sak hi.

Kawlgam in zong Tourism Industry akhan toh na ding le Tourist te zol na in “Visit Myanmar Year 1996” ci-in gamdang tourists tampite zol na in nasia tak in hong bawl uh hi. Tourism Industry pan in sum tampi meet sawm uh hi.Khualzin gamvak na in nuntak khuasak hun hongcimtaksak I lungzin nate mai mangsak in ngaih sut na thakthak hong muhsak ban ah i lung hong kim sak in I nuntak na ading in lungsimtha tampi hong guan hi. Zomi te le Zogam ading in zong Tourism nasep na in I khantoh na ding I azung khat hong suak ding hi.

Bang hun in ki pan

13th century lai pek a kipan in khualzin nasep ki pan hi.16th-18th hunciang in khualzin gamvakna hong khangto semsemta a tua hang in pilna,theihna le thungaihsut thumuhna tampi hong khangto sak hi .Leitungbup ah British ,Scandiniviante , Russian, German ,Japan minamte tourist atam pen in ki ciam the hi.1841kum in England pan Thomas Quartz in Meileng tawh khualzinna (Train Tour) hong pan khia in 1845kum ciang in leitung ah a masa penpen Tourism Agency hong phuan khia hi.Meileng le Tembawpi te tawh khualzin ding in geel sak a ni 222 leitung bup kim vel in zin sak hi.

20th century ciang in Jet engine vanleng te hong ki pan a hih man in vanleng bup sap khualzinna hong thupi leuleu hi.21st century hun ciang in IT khantoh na huhau in Tourism nasepna tampi tak hong khang to hi.IT huhau in khantohna bek hilo in sum muhna zong hong khang to ahih man in mitampite in mun tuamtuam ah tawlnga ding in zin ziahziah zo ta uh hi.Khualzin mite pen a nop zin te,Excursionist te le mun minthang te apha nuam ngiat ci in nam (3) bang in mu thei hi.

Tourism nasep icih pen

Tourism nasep icih pen lenglado siam mahmah nasep (service) lian mahmah a hihi.Khualzin mite pen atam zaw ngeina ki bat pihlo minam tuam,pau ki thei lo, gam tuamtuam pan a hih man in amau te nopsak ding lung kim ding nasep na ahih man in limtak in igeel isep leh bek mite in nuamsa ding hi.Tourists te nopsak ding hanciam in lengla do ding a hihi.Tua hi leh bek Tourism nasep na hong thupi semsem in mi hong tam semsem ding hi.

• Khualzin mite hong zinnop semsem na ding in a kitangsam ngaihsut huai thu bulpite in,
• 1. A ut huai mun ah hi ding (attraction)
• 2. Lamtun nuam in paina nuam ding
• 3. Zintun na mun,nek le dawn,tawlngak na kicing in mun nuam ding
• 4. Khualzinte a ding limtak in geel siam ding cih te thupi mahmah hi.

Tua ban ah Tourist te hongzin zuahzuah theih nading in pawituamtuam bawltheih ding ki sam hi.Tourist te ading in atheih huai thuthak kaihkhop sak in gen dending ,mun khat pan mun khat ah zin pih kawikawi in neek le dawn pawibawlna ,cimphawng a gualnop na ding geel sak in I bawl sak ding thupi hi.

Tua bang nasep pen Tourism ading in a thupi mahmah a zungpi khat a hihi.Tua bang service tuamtuam ban ah zunbuk, ekbuk te akipan a nuam theithei tawl ngak na ding mun le vanzat te ki cingtak in I neih zawh ding thupi mahmah hi.Neek ding dawn ding namtuamtuam ki cing taak tak in I neih ding zong thupi hi.I gam I lei a khantoh theih na ding in Tourism nasepna ah paubanna om lo in limtak in geel ding kisam hi.Leengla te lungkim na in Tourism nasepna ah a thupi penpen ahi hi.

Khualzin nasep na pan in meetna punna le ham phat na tampi tak om hi.Travel & Tourism agent te bek hi lo in van neng neng zuak mite zong ham pha sak in gam a ding in Income tampi pungsak hi.A lang lam khat ah mi nam tuamtuam hong zin ahih man in ei ngei na hoihte ki nelhsiah in minam dang te ngei na in hong vuk nelh thei kha ding hi.

Tourist te utna munte:

I gam I lei I a etlawmna mun te,vasa nam tuamtuam te, tua gam mite I ngei na tuamtuam te le mite nuntak zia te , tanglai a vanzat minthang tuamtuamte le inn le lo mun minthang te, tawlngak theihna ding khawlmun nuamte, tuipi gei mun hoih te,….etc hi bang mun hoihte ah Tourists te pen va pai pih in a ki tangsap te uh service I piakna in Tourism nasepna a hihi.19th Century hun lai in mite in Tuipi tui ah tui bual leng ki cidam hi cih upna a neih man un tuipi ah kisil ding in khualzin ziahziah uh hi. Nepal gam ah Everest mual sangpi tung ah mite a kah nop man in tourism nasep tawh sum muh lawh mahmah uh hi.Ih gam I lei I ahoihna te ,Hotel te le service tuamtuam te pen Tourists te a lunglut sak nate ahihi.

Khualzin na pan adeihhuai ngei na hoih pawl khat

Gam dang I zin ciang in mi atam zaw in vanleng tawh I zin hi.Vanleng tung ah neek le dawn theih tam pi hong ki pia hi.I duh zah hong ki pia ahih tei hang in aki lawm zah I neek theih ding thupi hi. I duh zah vai khak ding in aval ngen lo ding hi hangh. I gamtat siamlohna hang in i mi nam le mimal hong zuak thei hi.Gam khangtokhinsa mite pen Immigration counter aki pan anneekna le mun tuam tuam te ah thupi in piicing pha diak uh hi.Kigual in ngak dim dem in ei hun tun masiah mite nawng kai sak lo uh hi.

A kul lua lo kampau zuaizuai het lo uh a zong om sesu lo uh hi.Hun zahtak in mawtaw, Bus ,MRT te zong ahun lian lian in ding in tung den uh hi.Mipite in hunzahtak in vanzat nate zong hunman sak uh hi.Bus express bang in ading khiat hun, bang hun in tung ding, cih te a ki pan atkhia sin sen uh hi. Singapore MRT sung a tutna a lai ki at hoih ka sa mahmah hi “Please offer to someone who needs more than you” cih pen tutna tung kong vang gei ah tallangh tak in suang uh hi.

Ei pen mite a huh a pii bawlthei ding in hong pan tah uh hi.Ahi zong in I gam ah “ phungzi nasem te tutnapia in” ki ci in numei naupaiite ,naupangno te , leh mikhangham sate ading bang mah ki geel sak lo hi.Station tuamtuam le zunbuk,lamkanna mun le, sai tuamtuam (super market) te ah khedam lo te ( disables ) ading leng tawh paitheihna ding in lampi limtak in bawlsak uh hi. Elevator zong koih sakuh a khang no pipi in zang lo in uham te le disable te bek zang sak in tuambawl in limtak in panpih uh hi.

Bus le MRT tung ah kiphusepsup kha lo in khat le khat ki zahtak bawl in ki nawkkhak sawm het lo in EXCUSE Me ci in ki pelh diamdiam uh hi. A kim a pamte huathuai leh muhdah theih ding in gamta hetlo in a mithek tawh ki en diamdiam uh hi. Mi khempeuh in siangtho le a etlawm penpen silh in vak khia uhhi. Khua ul gimnam namsak het lo in siangsinsen den uhhi. Zateptep te ading in muntuam vilvel om in ki koihsak hi. Tua munte bek le sai pawlkhat te bek ah zateptep theibek uh hi. Zatep, Khaini le tuibuk cih te a ding mun om mel lo hi.

Khua sung lam lian dungte leh Highway lamlianpi dung te a etlawm theithei ding in limtak in zem sinsen uh hi. Lamlian pi kim le pam te ah mite nuntak na zia phattuam na a piangsak ding hanthot na kammal hoih nono te suang khia uh hi. Kualalumpur khuapi sung ah “Life is a journey, not a destination, Plan to work” cih Dr. Maharthir ii hanthotna kammal hoih te limtak in suangkhia uh hi.Mi minthang gualtung tuang te tangthu le amau nuntak zia, a kam malhoihte uh mite phat tuam na ding in deihlsak in ettheih ding in limtak in koih uh hi. Khuasung vakkawm kawm in mun khem peuh pan in ki mu kha ahihman in a sim kha mi te lungsim tha guan mahmah hi.

Van zuak te in limtak in kem sinsen in siangthosak uh hi. Avan zuak uh pen amau lei nop dan teek teek mah bang in siangthosak in limcisak uh hi. Khualzin gamvak mi dangte in limci asaktheih ding an le tui limtheithei bawl in puah toto uh hi. Ei Zomi te bang zong minam dang te in I an nek te hong duhpih theih na ding in en zong hoihtak in puah pha in a limthei thei in I bawl I zuak ding kisam hi. Minam dangte in annek tuidawn pen pii ngaihsut ngiat uh hi. Japan te bang anlim penpen Everest mualdawn ah om le zong kahto in va ne ding uh hi ki ci liang hi. An lim tui lim duh ngiat uh a tua hang in a cidam in akhan sau uhhi.Tua bang a kingah na mun te zong utmah mah uh hi.

Thukhup na

Ei Zomi nam te in I Zogam ah khualzin gam vak na sep tawh kisai hong khangtoh theih na ding in tu aki pan in tha I san pah ding kisam hi. Khualzin gam vak mite in a nopsak theih na ding geelsiam inlengla do siam ding ahi hi.Inn le Hotel tampitak zong lam ding kisam hi. Hotel nasep na kipan in khualzin te zong Hotel ah tung in I zintun na mun te nawngkai sak loh ding thu pi hi. Annek tuidawn zia, nuntakkhuasak zia te ki en pha in Tourist te do zo ding in I ki thawi hun ding hi ta hi.

Zomite I annekte ki en pha ni. An hoih an lim vi ve hi na pi I bawl siam loh man in mi te in hong duhpih lo hi. I ngeina an te pen mi te hong duh pih ding in I puahding kisam hi.Zogam khua pi Haka ah SABUTI kizuak pen mi nam dang te in zong hong duhpih mahmah uh a kawlgam muntuamtuam ah zong ki ngah ta hi. Kawl gam ah mi te hong theih pih anlim khat hong suak ta hi. Ei duh dan in I huan sang in mite duh theih ding in I bawlsiam ding kisam hi.I Zogam a mun minthang ahi MOUNT VICTORIA mual le tua sung a om vasa min thang te pen leitung mipil te in zong a thu pi ngaihsut mahmah mun hi a asung a leitung ah citawm penpen vasanam a hi Iropogon natmanansis vasa nam te om hi.

Tua vasa nam te en nuam in leitung a vasa lam uk te hong zin nuam mahmah uh hi. Kawl gam Journal te gen na ah vasa nam min thang etna ding in Zogam ah Mount Victoria pen ahoih pen pen hi ki ci hi. I Zogam mual le guam te pen Pasian in a etlawm penpen in hongbawlsak hi a tua te pansan in Tourism nasep na hanciam in sem zo leng a sawt lo in “ smokeless Industry” muntam pi ah hong ki lam ding a I Zogam zong a sawt lo in “ Smokeless Industrialized State” hong suak ding hi. I Zogam le Zomi khan toh na ding in Tourism nasep na ah thasan in hanciam ciat ni. Tg. Dal Sian Mung (M.A) IR Reference: An article of Daw Khin Swe Myint (Burmese), Yangon University Annual Magazine