Khual zinpa’ la (Meditation on Psalm 121) ~ Rev. Dr. Pau Khan En

Khual zinpa’ la (Meditation on Psalm 121) ~ Rev. Dr. Pau Khan En

Khualzin mite gim apia, misuam misut te buk theih na ding mualbo atamna Israel gam (Luka 10 :29-37) ah khatkia khualzinpa khat om in pangpa kisalua ahihman in mual tunglam khuadak giaugiau kawm in “Keimah huhna koilai pan hongpai ding a hihiam?” ci- in, hih Late 121 phuak in na na sa hiau hiau ahih manin hihpen “Khualzinpa’La” (Traveller’s Psalm) hong ki ci vawt hi. Misuam, misut, ngongtat a, mi neihsa asut leh mithat thei te tam in lauhuai na, patauh dipkuat na, gal leh sa a tamna, mun ah khattang khualzin a, apai mite a ding in ngaihmuan na om lo- a hih man in, “Keimah huhna koipan in hong pai ding a hihiam?” cih pen dot loh phamawh thu dotna khat a hi hi.

Mihing te nuntak na pen atung a i gensa mah bang in nat le sat, patauh dipkuat na tampi lak ah nisim nisim a khualzin bang ihi-a, tua lak ah, “Nu aw, kei aw, Siatna mangpa hia mualbo khatpeuh pan hong pai thong leh, Keimah huh pa koipan hong pai ding hiam? (From where my help comes?) ci- in laukawm liing kawm in a kidong tek ding a hi hi. Tua hi- a, hih dotna a dawng mite’ dawnzia nam (4) i en ding hi.

I. LEITUNG PIANPIH PAN A DAWN NA (Answer from Nature)

Pianpih leitung in pianzia le ngeina, dan (Natural law) khat tek nei a, tua te i palsat khak kei nak leh tua dan in eilam ah hong pang in hong huh hi, ci uh hi., Agenteh na- in, nisa mah mah lak leh guah zu mah mah lak ah bangmah khulo pin sau veipi pai lehang i lutang na hi. Pianpih nate- in thukhun ( natural law) neitek uh a, tuate i zuih zawh leh hong huh, hong huu in, i palsat khak leh hong gawt hi, cih a hi hi. A maan na ciang om lua zen hi. Pianpih nate ( Nature) zong huhna hong luanna naak khat mah a hihi.

II. LEITUNG PILNA PAN A DAWN NA (Answer from Science)

Leitung nate thuktak a sinna leh kanna (Science) in zong mihing tate cihmawhna te hong huhna om peuhmah hi. Adiakdiak in Zato lam pilna (Medical Science) in mihingte lawhmawh na tampi hong huh ahih man in, kei hong huhpa leitung pilna (Science) pan hong pai hi, a kici thei ding lua mah a hi hi.

III. BIAKNA PAWL KHAT TE LEH LUNGSIM LAM SIN TE DAWN NA (Answer from some Religions and Psychology)

Keimah huhna koipan hong pai ding hiam? cih dotna pen Biakna pawl khat te leh Lungsim lam a kan pawl te- in, keimah huhna ding pen koidang pan hong pai hi zenzen deksuai lo- in KEIMA SUNG ( Myself) pan vingveng a hong pai hi, cihiau uh hi. Buddhism te bang in bel apua lampan a kihuh theih cih bang hikhol kei. Buddha Gotama pasian honghilh pen ei leh ei in i hanciam tawm theih na ding dharma ( ta-yar) bek hi-a, asep ding leh a hanciam ding bel ei leh ei ( self ) hanciam tawm ngiat ding hi, ci- uh hi. Hinduism, Jainism,Judaism leh biakna dang pawl khat in zong ei leh ei hanciam tawm ding in hilh uh hi.

Tua bangmah in Lungsim lam kanna (Psychology) in zong cihmawh hun a huhna pen, koidang pan hi lo, eima sung pan mah (self) hi, ci lel uh hi. Amau’ cihna ah, hih nisim a izat, thagum hatna leh pilna i cih te pen i tha hatna leh pilna i neih khempeuh lakpan seh kua suah seh khat (1/9) bek a kizang hi zen a, adang seh kua suah seh giat (8/9) pen donghu ding in ei sung mah ah zat loh in om phitphet hi, ci uh hi. Man lua zen hi.

Ka khua vuah nupi nu khat a inn uh kang citciat a, patau dipkua lua in a an koihna uh beem teng apua lam ah amah kia in pua khia vanvan zo hi. Mei teng hong daih ciangin mun khat ah anbeem teng koih khawm ding ci-a, adom sak uh leh lok zong lok zo nawn ta lo hi. Aden mah mah a, a tha umpi (reserved force 8/9) teng hoh koi tak tungta eide ! Cimawh in dong tuak taktak le hang maw, ei sung mahmah pan zong huhna bangtan hiam khat bel omtuak lua zen hi ei! (My help comes from myself)

IV. HUHNA MIDANGTE

KIANGPAN HONG PAI HI. (My help comes from others, – Answer from Sociology)
Mihing te pen tolteen lo- in a honteen te i hi-a, a kikhenglah,a kinuamtuam, cihmawh lawhmawh na ah a kihuu, a kihuh te, a kikhenglah te hihang. “Nang om leltak hang ka noptuam na om mahmah kei,” i kicih giapgiap khawng pen hehkam hi bek a, a pau khiat huai hetlo kam a hihi. A kikhenglah zungzung te hi hang. Tua ahih man in khanglui te- in, ” Nang na om a kei mipi tangtuam, nang pai lecin, kei zuang lo ding maw lawm, ” na na kici ngeungeu zen uh hi.

Kum 1977 pan 1982 ciang Leipi Pawlpi ah Pastor kasep sung in Kalay Council of Churches (KCC) ah zong General Secretary ka sem a, ka Khangno Secretay uh pen Methodist Pawlpi pan mibel, mi citak Sya Hminga hi- in gamdang Mizoram Aizawl khuapi pan in nungak melhoih mahmah khat zi in nei hi. Thukan SB2 te- in thei in a nupa maan (photo) a suanpen azi kawlgam mi hilo cih tawh sum ngen den in sumtawk na in nei uh hi.

Nawhlua sapian a hihman in Sya Hminga in zong a u Prof. Dr Khuanga Australia gam ah kumpi te phalna tawh Physics subject in Ph.D la ding a, a omlai in tuagam ah a vazin i kumpipa U Newin tawh amaan kizaih khopna pen amau nupa maan gei ah nasuang ta ekh hi. Tua maan amuh nungsang un bel thukan SB2 te Sya Hminga te inn ah zual zo nawn lo- uh hi. Cihmawh lawhmawh i tuah teh maw mihon (Sociology) lam khat peuhpeuh tawh huhna hong pai lua zen hi ei.

I cihmawh i beidon laitak in hih a tung a i gensa a hi, 1)Nature 2) Science 3) Self leh 4) Sociology te kiang pan in huhna (help) bel bangtan hiam aw khat a kingah keeisam a hihi. Ahizong in hih lawmsam gualsam a, a tuah khak ding lauhuaina te ngaihsun kawm in, ” Keimah in mualtung lam ka en to hi. Keimah huhna koi lai pan hong pai ding ahi hiam?” ci- in dong hi. (v.1) Amah’n adawn kikna ah atunga igen sa huhna naak nam (4) te pan ci lo hi.

Banghang hiam cih leh tua huhna naak (source) nam li pan a hong luang huhna (help) pen cingkhin zo lo-in ciangtanna (limitation) leh kisapna nei theih lai uh hi. Tua a hihman in, amah’n, ” Van leh lei a bawl Topa kiang panin keima huhna hong pai hi” (v.2) na na ci hi. Pasian kiangpan a hong luang huna bek a kicing huhna ahih hi. Tua amah ahuh Topa pen

• 1) Van leh lei a bawl Topa (v.2)
• 2) A khe te taal sak lo ding a a kem pa (v.3)
• 3) Lusu lo- a, zong a ihmu lo pa ( v. 4)
• 4) Amah acing, ahu dingin a kiang ah a om pih denpa (v.5)
• 5) Sun in ni- in gim sak lo ding a, zan in kha in zong gim sak lo ding. (v.6)

Taanglai Israel mite upna ah TUNG SUN NI leh ZAN SOLKHA te in simlei mite gim sak theih na ding vaang (power) bang tan hiam khat nei hi, ci- in um uh hi. Vaang gil lote pan in amah ki huu ding, cihnop na a hi hi.

Ei Zomi khanglui mite- in zong thuak lah khasiat muisiatna a neih uh ciang in, “Nipi, Khapi, aw na thei in” ci- in siattut thei uh hi. I pom i saan dan ki valak mahmah hi.

• 6) Siatna khempeuh pan hu in kem ding (v.7)
• 7) A sungtum, a pusuah na ah kem tawn tung ding (v.8)

Nuntak na i cih hih a pangpaa khualzin pa bang i hi hi. Covid 19 pul natna lauhuai na sung ah leitung bup tawh khual i zin khawm a, ngongtat hiamtawi galkap tetawh Myanmar gam kia bek khualzin in i dip a kuakua hi. Hong huh ding kiim leh paam mualbo te lam i ento hi.Ei hong huh ding koipan hong pai ding a hi hiam? Lamet bei in i om lai tak mah in khualzin pa bangmah in lametna naak a hi, TUNG A PA en kawm in lau huai na sung mah ah khamuang tak in i leitung khualzin na zom dih ve ni! Rev. Dr. Pau Khan En