Khuai meivak li ~ Khat Thang

Khuai meivak li ~ Khat Thang

Khuai-mei-vak li kigualin inn sung khatah kivak khawm hi. Tua Khuai-mei kivakte in thu gen thei ciat uh hi.

Khat in thu hong gen masa-a, “kei pen Neihlelam huahna ka hi hi, mikim kei hong deih uh a, ka omna mun ding hong zong tawntunguh hi. Ken zong mite kisapnate ka huh thei zel hi. Pawl khat in ahih leh kei pen a thupi masa hikei teh hong cih ponguh hangin, mikim phial in hong deih mahmah khat ka hi hi.” ci-in a gen khit teh thakhatin huih hong nung vat a hih manin tua khuai-mei-vak hong mit hi.

Khuai-mei-vak dang khat hong pau leuleu-a, “kei ka min It-na hi. Khat veivei hong kimangngilh theih zel hangin, kei ka om lohna munte ah hong kilunggulh thei mahmah hi. Bangbang ahizongin ken mihingte khat le khat a kilemna ding, a kipum khatna dinguh a piang sak den ka hi hi” ci-in hong kipulak khitteh, Huih hong nung vat zel a hih manin hong mit hi.

Khuai-mei-vak dang khat hong pau zel a, “kei ka hih leh Kilemna ka hi hi. Na khempeuh a hoih thei pen dingin a kemcing tawngtung ka hi hi. Kei vangin mihingte ki-itin nungta khawm liallial thei uh hi. Kei bel mikim kisap den khat hing veng ee” acih khitphetin, Huih hong nung zel a hih manin hong mit hi.

Tua laitakin, Inn sungah tangvalno khat hong lut a, khuai-mei mit thum teng a muh ciangin dahin hong kap hi. A cihna ding dang thei tuan lo-in, a mah kia phun kawmkawmin “bang cih peuhmah ding ka hia leh?” a cih lai tak, khuai-mei-vak khat a om lai pen hong pau-in tangvalpa hong hopih hi.

“Tangvalpa aw! bangmah lung himawh peuhmah kei in! hih a mitsa khuai-mei teng kei mah in, a tangkik dingin kong vak sak thei hi. Kei ka min Lam-etna kici hi. Lem-etna na lungsim takpi tawh nong neih nak a leh, Neihlelam hauhna, It-na, Kilemna avekpi in hong piakik thei kha ding ka hi ve!” ci-in hopih hi.

Hih I thu gelh in, Lam-etna kician I neih nak leh na khempeuh a nei thei ding I hih lamtak hong phawk sak banah supna, baina I thuak khak hangin lungkham lo-in Lametna kaht teitei tawh kalsuan ding a kisapna hong phawk sak hi.

*Tha hong pia laisim mimal khempeuh tungah ka lungdam, mi a tam theithei sim ding lunggulhna tawh Inn lam ah a free phial a hawm zawh ding laibu zong ka hanciam laitak hi. Tedim ah FM station hong kipat ciangin zong mipi zak theih dingin makaite in hoih a sak bangun hong hawm khiat sak dinguh hi. Topa’ thupha!* Khat Thang