Khuai Khawi A Thupitna ~ Thang Suan Mung

Khuai Khawi A Thupitna ~ Thang Suan Mung

Ni dangin Zomite in lei khuai, sing khuai, sing dawn a khuaipi kaite, khuaivah leh a no neek theih, Ngal Tun leh tunpi bute gam sung pan kila/ ki at in a zuu leh khuaino bek i ngah thei hi. Nuntak zawhna ding leh sum leh paai a suak dingin kingaih sun kha lo hi. Tuhun khantohna tawh kizui-in gam khangto khin sate leh Kawlgam nangawn ah khuai khawina pan sum leh paai zonna hong om ta hi.

Zogam ah amah leh amah a omsa khuaite kila in a khawi ki om hi. A hih hangin khuai khawi zia tawh kisai pilna/siamna kinei lo ahih manin nuntakpih nading zah ciang kikhawi thei nai lo hi.

Tu in kumpite in tangpi tangta phattuam pih na ding deih sakna tawh gamdang pan a kikhawi thei khuainam tuamtuam sung pan Kawlgam khua hun tawh kituak a kikhawi thei dingin Italy khuaivah nam leh Israel khuaivah nam kici te nam gawmin hong khawi uh hi. Kumpite bek hi lo-in mimal khuai khawi nuamte zong thapia mahmah ta uh a, a khawi nuamte in kumpi tungah License siau in kikhawi thei hi.

Vietnam gamah khuaibu 500000 kikhawi-in, Kawlgam bupah kumpite leh mimal kigawm khuaibu 60000 kikhawi zo pan hi. Kawlgam khuai khawi zia pen khuai an omom na munah a hun zui-in kituah kawikawi hi.

Kawlpi Tsp. ah November 11, 2003 kum in kumpi khuai zum leh khuaibu 100 tawh khuai khawina hong kipan hi. 2007 December leh 2008 April sungin Kawlpi Tsp. ah kumpi leh mimal khawi khuaibu 7500 val hong kikhawi to a, Zomi sung pan khuaipu mi 10 tang kihel uh hi. Sagaing Division, Mandalay Division leh Shan State sungah khuai kilim khawi pen hi.

Khuai khawina panin khuaizu, khuainun, khuaibaal (Bee Pollen) cihte kingah hi. Khuai khawi siamte in kum khatin khuai bu 10 pan khuaizu Pipa 2 (Gallon-110) ngah zo uh a tulaitak Pipa khat Ks. 250000/- man hi. Tu laitak khuaibu khat Ks 40000/- tawh kilei hi.

Khuaibu khat khawina dingin khuai ankung a kicinna lo Ekka (1) kisam hi. Kawlpi gam sungah khuai ankung Sising lo Ekka 23965, Mim lo Ekka 6542, Vaimim lo Ekka 3866, Nipi paak lo Ekka 36000 leh Ankam lo Ekka6816 kicing hi. Khuai khawina hangin khuai ankung namte cipha in gahpha san hi. American gamah lo neite in khuaipu/khawite kiangah tuk tun khat (kha 6) sung US$ 180 tawh saap in a lo sungah khawi sak uh hi.

Kawl gamah khuaipu/ khawite in lo neite losap kipia zaw behlap hi. Khuai khawina-ah phalbi leh khua khal hun sung tengin khuaizu kila thei bek a, tuk sung teng khuai anvaak kik kul hi. Khuai an dingin cikhum leh Be-ik (a vui) in kipia thei hi. Khuaite in natna tuamtuam ngah thei ahih manin a hunhun in zato tuamtuam theh kul hi.

I Zogam khuai te zong gamdang khuaivah te mah bangin khuai khawi pilna/siamna tawh kikhawi thei ta ahih manin khuai khawi pilna/siamna sinin khawi kipat hun mahmah ta hi. Zogam khuaivah khawi nuamte in kumpi tung panin huhna (khuai khawi zia pilna leh khuai van kisam tuamtuam) kingah thei hi. Kawlgam khuaizu te pen Malaysia, Japan leh Sen te in tam lei penin leitung gam tuamtuam ah zuak sawn uh hi.

Gamdang ah khuaizu puak zawhna (Export) ciang dong na hih zawh leh khuai khawi nasep sang ahoih zaw nasep Kawlgam ah om lo hi. Tua hi-in Zo Vontawi te in khuai khawina tawh nuntak khuasakna ah i khantoh theihna dingin deihsakna lianpi tawh Tongsan pan kong hanthawn hi. Thang Suan Mung