Khasiangtho tawh maw?
Christu Topa hongsawl na mahbangin, Pa, Tapa le Khasiangtho ahi Tothum Pasian min tawh tuisawpna (Tuiphumna) angah mi in, Christu Topa sungah anungta mithak asuak ahihi. Tua thu hangin, Christian thuzui mi khat i cih in, Christu Topa deihna, lunggulhna leh Topa nuntakzia te ama nuntakna phungpi, ama nuntakna thagui asuaksak mi ahihi. Hi thu hangin Paul in, ‘eite Christu sungah ih om hi’ cih ahi a, ‘Christu in eite sungah hong omhi’ cih ahi zongin genbelh in nanei hi (cf. Col 1:27). Christu in eite sungah hongteng in, eite zong ama sungah nungta himah taseleng, dahna le haksat gentheihna in eite hong nusialo in, hong taisan lo a, eite leitungah i nuntakna in nuamna vive, maitai na vive tawh akidim nuntakna nahi lo hi. Paul mahmah zong nuam hun, dah hun, lungdam hun leh khitui luan hun te tawh naki dim hi. Hih thu hangin, Christian hihna, Jesu Topa i upna in leitung nuntakna sungah ci le sa phattuamna, leitung ah natna satna, dahna lungkhamna te tawh kipelhna cihthu ahi masa kei hi. Honggum Topa i upna in, leitung haksat gentheihna, buaina, dahna kahna thuak in, lungkhamin lamet bei a, i om hun ciangin, Topa in keitawh thuakkhawm hi – tua ahih manin hi leitung kagentheih thuakna te in amawkna hilo in, nikhat niciangin Topa in thaman hongpia dinghi cih thu upna pan i ngah theihtelna tawh thuakzawhna leh thuaksiam na ahihi.
Khasiangtho in mihingte sungpan bangsem hiam? Khasiangtho in amasa pen in Pasian kammal thu man thutak hong theisak, hong umsak ahihi. Lamkhatpan in genleng, Khasiangtho in Topa thu ahi gupna thu i uptheihnang, i teltheihnang, i santheihnang in mihing te lungsim sungpan na asem ahihi. Amah in Pasian kammal ngaihsiamna, telsiamna, man zawhna, theihtheihna, nuntakpih zawhna leh nuntakpih theihna hongguan hi. Hih thu hangin, Khasiangtho tawh akidim mite in Pasian hong thupiakna leh ama kammal te tungah “Nadeih bangin keitungah piangta hen. Kei mahin nangma nasem nu kahihi” (Lk 1:38) ci in kiniam khiatna tawh Maria bangin nadawng uhhi.
Khasiangtho in, Pasian kammal tungah ihnuntakna khempeuh ihpiak khiatzawh nangin, Topa deihbangin i nuntakzawh nangin eite lungsim sungpan in thagui hongguan in, hongma kaih ahih manin, Khasiangtho anei taktak te leh, tau Khasiangtho makaihna amuang taktak te bek in ‘Nadeih bangin keitungah piangta hen’ ci thei uhhi. Hih thu hangin, Jesu Topa’ Nu Maria in Khasiangtho asang, Khasiangtho angah mite khempeuh lakah Khasiangtho tawh, Khasiangtho sungah nuntakzia apicingpen in anuntakpih nu ahihna thu athak in hong phawksak hi. Tua ahih man in, Khasiangtho asangmi khatciat in, Maria nuntakzia leh Maria ii Pasian kammal tungah aki ngakzia te tungah zahtaak lo, thupi salo, pahtawi lo in omtheih lo uhhi.
Khasiangtho in eite hoihna phatna, eite pilna, eite thupi’t na te hong theisak, hong pulak ahi kei hi. Mihingte mitmuh na-ah eite hong lamsang zong ahituan kei hi. Christian khangtaangthu i etkik ciangin, Khasiangtho tawh akidim te in akiniamkhiat pen mite na hiden uhhi. Leitung kitawikhai na te zangin amau te i etciangin, amau te i lapsang nading, 
thupi i sak nading bangmah i mu hetkei kha thei hi. Khasiangtho im mi lungsim hei in, Pasian mai ah i mawhna, iki cinlohna, i gitnat lohna leh i kilawmlohna hong phawksak in, mawhna pan kisikkikna lampi ah eite hongpai pih ahihi.
Tuhun tulai takin, Christian pawlkhat te in Khasiangtho in kei hongsawl ci in ahizongin, Khasiangtho kasang ci in ahizongin, gen in lungdamko in tetti pang uhhi. Ahi zongin, apasal, azi ata te tungah mawhmaisak ding, kilemnang hanciamding phawk khalo thei uhhi. Khasiangtho in mi mawhna hongtheisak pilna hongpia hilo in, eimawhna hong phawksak hehpihna hongpia ahizaw hi. Tuhun mi pawlkhatte in ahih leh, Khasiangtho kangahhi, Khasiangtho kasanghi ihci tei ahi zongin, ei mawhna, eikhialhna mulo in, mimawhna mikhialhna, pasal hoihlohna, zi hoihlohna te bek a muthei, Upna kibanglo liangko kikim lo cih thu, thu meilet in nei in, kilemna hanciam ding sangin pasal te zite, teeknu teekpa, mo nu cihte tawh annkuang na ngawn a uumkhawm nuamlo, a uumkhawm zolo Khasiangtho kangah hi aci Christian ki omthei hi. Khasiangtho in ei le ei kitel na, kiniamkhiatna, lungduaina, migitna, natna satna leh haksatna te ah thuakzawhna, Pasian deihna banga nuntak zawhna hongpia hina pi in, tuhun Christian pawlkhat te ngah khasiangtho in Laisiangtho sunga akigelh Khasiangtho tawh hongki lehbulh nathu aphawkhuai thu khat ahihi.
Mikhatin Khasiangtho ngahmaw ngahlo cih ihtheihna dingin, Laisiangtho sunga Khasiangtho tawh akidim, Khasiangtho tawh anungta mite nuntakzia tawh etkak in khentel ding kisam pha mahmahta hi. Laisiangtho sungah Khasiangtho tawh akidim, Khasiangtho tawh anungta mi in, amasa pen in Maria i muding hi. Maria kiniamkhiatna, siangtho na, migitna, Pasianthu aman na te tawh aki keelki nuntakna anei mi in, Khasiangtho kangah hi ci leh tua minu tua mipa nuntakna pen ‘Khasiangtho tawh maw?’ ci a, lungngaih phat mahmah ding ahihi.
Rev Fr Damian Dal
(Nimdildial)
Comment piaknop aomleh...