Khangthak Khangno le Hun Thak ~ Bob Tuangpi

Khangthak Khangno le Hun Thak ~ Bob Tuangpi

Mihing nuntakna hunpi thumin kikhen hi. Naupang hun, khangno hun, khangham hun cih bangin mipilte in hunpi thum na suah uh hi.I nu’ sungpan i piankhiat kipan kum (17) ciang naupang’ hun kici thei hi. Kum bangzah liante khangno kici hiam cih mikimin kum ciangtanna tuamtuam omtek hi. Ahi zonginUnited Nations Organization (UNO) leh World Bank(WB) te in kum (18) pan kum (24) kikalte khangno in ciamteh uh hi. Ei’ gamah bel tua bang a kician kum ciaptehna omlo hi. Ahizongin leitung buppi in asanna ah khangno cih ciangin kum (18) pan kum (40) ciang gualte huamkha hi cih ki sangtek hi. Mipilte’ zong, “Life begins at fourty”, (kum 40 teh mite picin khangham kipan) na ci uh ahih manin kum (40) nuaisiah khangno kici thei hi. Tua ahih manin kum (40) tungsiah khangham ulian kici thei pah hi.

Khangno a kicih naak leh lungsim pumpi cidam, thatanghat, hi setset tangzang, lawp mahmah na khat pepeuh sin nuam, thei nuam, hih ken a kici tata a semnuam a hih nuam citciatte(nui kei oo!). Mihingte’ khuasak nuntakna (social community) a khangtosak a nopcisak leh akiamsak thei khangnote mah a hi hi. Tua ahih manin, ulian khangham taaltakte in khangnote lamlahsiam ding leh a seksiam ding uh kisam mahmah hi. Ki pawlna tuamtuam(social communities) ah khangnote thahat leh tua ki pawlna zong mazangin khangto tetek pah hi.

Ahizongin, tuhun khangthak khangnote a ki cih naak leh upa khanghamte’ bangci muh uh hiam cih leh namnih in mu uh hi. Pawlkhatte’n kei zong khangno pan khangkhia ka hih teh ci’n deihsakna hehpihna tawh lamlakin pantah uh hi. Adang pawlkhatte leuleu in khangthak khangno cih naak leh, tulai khangthak khangnote hanciam nopna, cihtak thasanna, ngimna tupna kician nei kei uh, ei’ lenlai khangno lai bang kei uh ci’n neumuhna mit tawh en uh hi.

Tulai khangnote pen sunni tangtumin niangtuisai(tea shop) peuhah a kimanna mel omlo a mawk ciakciakte, hun mawk beisakin zudawn beer dawn peuhkidemin nu leh pate piaksa neih leh lamhte a mawk zatzatte, kuamahthusimlo bangmah awlmawh nei kei uh, sum tawm nei le uh eueu sa-in amawk zai ekhekh-te uh hi, a ci tawh asam uh koisak zel mamsakzel, sansakzel, vomsakzel kangsakzel mi khuasuak ding hikei uh a ci tawh bang tawh om zelzul uh hi.

Kalasai! tua bek hilo, ong gen leeng, nisapi nuai ah pheituam kigak leh puan kisuahzo nawnlo ding a silh tawh, khua-ul kai lialua kawmin a naakvang pan mei a khusak vauvau bang omlai, khua-ul nisa veva nuai-ah puantual dialdual lukhu nei leh pheituam leivat duahduah a silh ateng giap ta leuleu pawl tawh, vanpi bang phukha dekliang aa sam tung veva-in Zomi cool guys peuh a kici nong pawl tawh, dialsan deldal khat khawng tawh taltang a gak ekh-in latest model mitlimlang vom kheukhau a bulh dih zen honkhat tawh, khuadam khualum guahzu nisa, lamsuk lamto ta leh puan ngawngbak deda niksing pha mahmah, khedap tawsang gega(high heel) tawh kituk dekdek aa pai luangluang pai lanlan tawh, internet&e-mail, facebook, twitter cihte online ah mitkham sumbei-in a mawk tuttut tawh VZO chat peuh tawh kiho a, “I love you” peuh a kimawk cihcih a kikhem pianpian tawh (he he.. ki suang kei oo!) ci;n a phusansan nu leh pa pawl khat tawh, Internet café ah sun thapai game kimawlin galpi thumna a ki kapkap tawh..online tungah ka gitloh pianpian hang a pualamah thu nuam mawh lo hing, a ci vial zong om lai( ong sukha pian mawk e! ha ha), online tung pan peuh a ki ko giapgiap ki ngikngik tawh bang tawh tulai khangthak tuailai khangnote bel lungkham huai sa lua ing, na sia kei lua mahmah uh ci’n khangnote a hawmthawh nu leh pa uhamte ciak ngeingai uh hi.

Mawkmawk uh teh! Khangnote tua bang teng bek hizenzen kei! Biakinn sungah Pasian phatin lasa lamakaih khangnote, nopna dahna ah a mapang tanu semte, Zogam, Zomi a tawisang khangnote, genthei liangvai dongtuakte a huh a zuun a puah a phungvuh khangnote, minam leh gam ading a nuntakna a khua-ul, a sisan a lungtang a lutang pia-in ngawngtan a thuakngam mapang khangnote mah hi zel lo hiam? Nuntakna haksatna hangin nu leh pa u leh nau a vak a et nadingin innzuak, lozuakin leitung gam tuamtuamah nasep teello-in zumlo takin innkuan nuntak nang a zong a upna tawh a theih ngeiloh gam ah mite’ netniamna thuakin luangkham liang mah aa khantoh nang a zong khangnote, zing nisuah pan nitum khuamial dong khantoh nang hanciamin pilna tuamtuam a sin khangnote hizel hi.

Hih bang hidan khangnote i deih i deih kei aa paakta in paakta kei zongh, zingciang I gam leh minam I biakna ong makaih ding tuailai momno aksineelkaite himawklo uh hiam? Tua ahih manin u ham thuthei nu leh pa pi leh pu a nei a lamh a pil a siamte’n pantah in seksiam leng I mai ah lametna limcii ding hi. Tuhun pilna hun(knowledge age), leitung buppi khuata khat bang(globalization or global village), thu kizak baih mahmah hun(information age), cihte in leitung kawciiksakin toisak hita hi.

Tua hi a, uhamte in I thumuhzia, thupomzia, sandante khuahun kikhel zui-in kalsuan ding hita hi. A piang thu khat pepeuh ah I thumuhzia (world view) mamah a hoihlamah ngaihsutna(positive thinking) neih ding hun hita hi. A piang thu leh na khat pepeuh (event) pen I thukkikna(respond) zui-in a gah asia apha(outcoming or result) mu ding at ding I hih manin Zomi tuailai khangthak khangnote tawh a kisukha kizomkha (stakeholder) khempeuhin mawhpuak I neitek hi.

Leitungah gamkekna(colony) hun bei kuan (18th, 19th leh 20th) hunsung kum (100) val phial I Zogam leh Kawlgam gamkekte’ khutnuai ah ki om hi. Kawlgam suahtakna ngah zawh kum (10) sung parliament democracy tawh kikalsuanin khantoh hun pen zongh hipah hi. 1962 pan 2010 ciang dong I gam sungah mi khat bek kampauna tawh I gam kikalsuan hizen hi. Tua hi a, Zomi Kawlmi cih omlo-in, I ngaihsutna thumuhna siacip hi. Education system hoihlo ahih manin, pilna lam ah ki niamkiat mangin khangnote a pil a siam ding zah in kitangzo mamah lo hi. Bang zah takin I gam pilna lam niamkiat hiam cih leh, “Pilna lam a niamkiat dan khangnote’n thudotna (question) zong bawl ngamlo bawltheilo uh hi” ci’n, Aung San Suu Kyi in gen hi.

Ahizongin, 2010 khitah kumpi thak makaih Thein Sein leh a pawlte in, kumpi siangtho(clear government) leh ki ukna hoih( good governance) tawh ong makaih zawh gam kikhel hanhan hita hi. Kumpi thak hita in gam kihongta kikhelta ahih manin tu-in ahih leh kumpi hoihlohman hi ci’n kumpi bekbek ki mawhsakthei nawnlo hita ahih teh khangthak khangnote zong kipuahphat aa khuaphawk ding hun hita leuleu hi.

Leitung bupphial democracy ki ukna tawh kikalsuan hita ahih manin, tuhun(democratization) hun, America mite in leitungbup a deplaitakhun(Americanization) hita ahih manin Zomi khangnote zong hunlapin hun in ong taisanloh nadingin kikhelna hunah kibual hun hita hi. Hih bek a thudikzaw hi cih lettentanna(fundamentalism) te pan pusuah hun hita hi. Pawlpi a kibat kei leh ki galbawl ekh, khua a ki bat kei leh lainat mello, beh a ki bat keh deihsak phalo, minam a ki bat pau a ki bat keh ki gimneih pianpah, kei tawh na ngaihsutna na sanziate a ki bat kei leh ka gal cih hunte leitung tuihualpi in taimang khinta hi. Eite khempeuh leitung gammi khat(global citizen) I ve maw ki cih hunah a nungta khuasate I hih lam phawkhuai hi.

Tuhunin gam khat leh gam khat kizop kikawmna ah a tawntung gal omlo, a tawntung lawmhoih omlo, a tawntung naseppih sumbawlpih theih lawm bek om cih ngaihsutna in mu ong la mahmah ta hi. Sumbawlna ah capitalism, market economy, stock market kizat hun hita aa leitung nitumna nisuahna, sak leh khang leitung kiuli huihlakah ngenbang(network) tawh kizom dimdiamin digital technology tawh card neuno khat tawi ziau aa leitung ututna ah sum ki thoh ziahziah hun hita hi.

Pilna a puahkhap hun (knowledge age) hita zen hi. Thusim selsim cihte in muh a luah zawh nawnloh hun a hi hi. Albert Einstein(man of 20th century,physicist) leh Stephen Hawking(physicist) te’ hun, technologist-Bill Gates(Microsoft), Steve Jobs(Apple Com) leh Mark Zuckerberg(Facebook) te’ pilna tawh leitung a kawciik mahmah hun ahi hi.

Tua a hih manin,I tual lungsim(local mindset) pan pusuakin leitung gammi khat lungsim(global mindset) vom ding hun hita hi. Avom akang, asan adum tawh buai hun hi nawnlo-in, “zawhngeu(cat) avom akang thupi kei zusa amat theih ding a bulpi hi”, cih tawh leitung a kipei litlit hun a hihi. Tu ciangin ei leh amau(us&them) ki cicih hun hi nawnloin eite(us) ci’n lungsim taizangtakin leitung mite a kalsuan hun hita hi. Mihingte pen khat bek a nungta zolo(social being) hi aa, khat leh khat i kizop kikawm ciangin nuntak nang neek leh dawn ding ong piang khia ahihi.

Tu in zongh, I gam kikhelin democracy lampi ah paita ahih manin gammi khat hamphatna leh sepding zuihding mawhpuakte(tawan), the rights and responsibility of a citizen, cihte zong kanin zuih ding hun hipah a, ei gualnop suahtakna hangin midangte nawngkaisaklo ding cihte zong tubang ki sinsin huai theih loh a phamawh ahihi. Tua bang aa I kiginkholh leh tuzawh kum(10) khit teh Zomi leh Zogam pen Kawlgam ah a pilpen a haupen gam a khuasuak pen minam kisuak thei lua mahmah ding hi.Singapore gam phutkhiapa, Lee Kuan Yaw in, “deihtak thasan I hanciam leh tuzawh kum sawm teh Kawlgam banzo(level) ding hihang” ci’n (Singapore Independence day,1959) in a gammite tungah hanthotna leh kamciam na pia hi. Tun Singapore khuk ciang zong kiban nawnlo hi.

Leitung tuihual tawh luankhopna ah I kepcing ding I minam hihna( our national identity) ahi I pau, I lai, I ngeina leh Vanglian Pasian’ tate I hihna kembit ding zong khangnote’n mangngilh loh ding ahihi. I kibatlohnate thahatna-in zatsiam, nasepkhop theihna lungsim(team spirit) nei in mainawt leeng eite in zongh hih thei hihang(Let us move forward we can do it, Barack Obama). Zogam Zomi akhangtosak a hoihlam ah a khelzo ding ei tuailai momno khangthakte hihang, kikhelhuaite kikhelin kalthak suanpha ni(The change, we need. Barack Obama). Tulaitak I kikhen ngeingai hangin ni khat ni teh khut khat tawi khe khat khai bangin nasem khawm ding hihang(I’ve a dream, some day we’ll work hand in hand, Martin Luther King, Jr).

Hunthak democracy hunah suaktatakin biaktheihna, suaktatakin pawlzawttheihna, suaktatakin lungphotheihna, cih bangte nget ding bebek ciang tawh a nitum democracy manphatna tua ciang bek a thei khangnote hilo-in ih sep I bawlna, ih suahtakna ah tawan neihna(responsibility) leh I makaihna I gamtatna ah mawhpuak lakngamna tawankhanna(accountability) cihte zong zatsiam zuihsiam ding zong kisin pah ding hun ahihi. Makai sem napi’n nungzuite’ vai-ah tawankhan zolo cih bang omtheihloh hun leh siangthotakin mipi theihsakna(transparency) cihte makai zawdeihte in I sep I bawlnate ah tangpi tangta theihsakna neih pahpah ding zongh ahihi.

Tuhun democracy hun ah gammi khat tawan (mawhpuak) zolo in bangmah hamphatnate(rights) ki ngahlo ding ahih manin khuaphawkin pilvang ding hun hita hi. Ciilsia ken! a cihna mun ah ciilsia teitei, lamkan theilo ding a cihna munah lamkan teitei cihte zong mi nawngkaisak hipah hi. Ataktakin democracy in zuih ding thukhun tawh kidim ki ukna hizaw hi. A khialte a mawhna bangin mawhpiakna, thukham tungah kuamah omlo(no one is above the law) ahihi. Hih kikhelna hunah a bualsiam dingin kiging khol ta ding hihang.

Tua ahih ciangin, hunthakah makai siam ding lutang ahi ding zingciang makai ding Zomi tuailai momnote zongh I manphatna ki thei in thala ta ni. Uham thuthei taltaakte in zong khangno tuailaite, Sianmang’ lungdeih zingciang makai dingte lamlakin pantah siam tek ni. Rome khuapi mei in a kattum laitak galetin a nui hiuheu lel mawk Neru kumpipa bangin kei’inn a kap kei naak leh phamawh sa keng cih lungsimte vomkhak hetloh ding ahihi..

Khangnote manphatna mipilpa khat in hibang na ci hi, “no khangnote pen zingsang nisuakthak tawh kibang hi uh teh, ka lametna khempeuh note tungah ka koih hi” ci’n Sen communist makaipi Mao Ze Dong, in khangnote na vaikhak ngei hi. Lamlak siam om-in khangnote zong lam hong lakte’ thumang banah ki puahphat dingte kipuahpha, nutsiat dingte nusia, kepcing dingte kemcing hizen leng tulai Zomi khangtak tuailai lia leh taangte’hanciam dan bel vandawn aa aksineelkai leh zingsol a lazo dingte uh hizen veh aw! See you at the top! Bob Tuangpi