Khangno lungtang (Khangno te na neumuh khakleh)

Khangno lungtang (Khangno te na neumuh khakleh)

Khangno cihpen kum 13-30 kikal hi a ci om hi. Kum 16-40 kikal hi a ci zongh om ding hi. Zi le pasal a neilo khempeuh khangno hi a ci om hi. Kum bangzah leh bangzah kuam sungaa omte khangno ki ci hiam cih hih sungah i gen kei ding hi. Khangno te lungsim puakzia a gennuam i hizaw hi.

Khangno te lungtang (lungsim) pen ki khel baih mahmah hi. A upkhat um cinten thei hi. A uploh zaw pen a man dingin ngaihsun thei nawnlo liang hi. A upkhat sihpih ngam zen uh hi. Siangtho nuam aa thuman bek deih hi. Ki liansak nuam hi. Mi in thupi a sak ding ut uh hi. Uk hamsa thei hi. Hehna leh kamkhauh tawh thuhilhna zadah mahmah se uh hi. Damtak aa thukihilhna sangsiam baih hi. Itna tawh thuki hilhna nialzo ngeilo hi.

Khangno lungsim in thukhat peuhpeuh khentat ngamngap lel hi. Khialh ding lau den lo hi. Khialbaih aa kisik thei hi. Zahpihna, nenniamna thuak nuam ngiatlo hi. Thauk zolo hi. Khasia baih aa lungneu baih thei hi. Tua mahbangin lungdam baih aa lawpbaih leuleu hi. Maisak theihna nei hi. Ngaihsutna tampi a neih laitak a hihi. Lungkham thei aa a mah guak ki neumuh thei hi. Tua hunlaitak aa thapiakna pen a khangkhat dong khom thei hi. A si ding lian singno khat tui khat vei i buak tawh kibang ziau thei hi.

Innkuan khat sungah nulepa bek lungdam henla khangno te (ta te) lungdam ngeikei leh tua innkuan nuam ding hi kici ngeilo ding hi. Nulepa a nuih sangin tano te ki khawlkhawm in a nuih khawm liailiai pen innkuan nuam a hihlam kitelpian pah hi.

Na innkuan sungah na tate mun pia in. Na tate nasem sak in. Muan bawl in. Muan sawm in. Muangtakpi lel in. Pattah inla thuhilh in. Na upmawhsangin a hoihzaw in semthei lai hi. A zia khat thei aa tua tawh nasawl theih ding bek kisam hi.

A lungsim puakzia uh theita na hihmanin na khangno te zattheih sawm in. Na dahsak nopleh oltak in na dahsak thei hi. A kizangthei dingin na bawlnop lezongh na bawl thei ta hi. A lungsim sukha ziau in. Khangno te na neumuh khak leh na kisik veve ding hi. Na zatsiam leh na tupna sangin a sangzawna mun hong tunpih ding hi. Siamsin Library