Khangno le ka Sunmang ~ Dal Sian Pau

Khangno le ka Sunmang ~ Dal Sian Pau

Khangno pen mangkamin, “youth or young people” kici hi. Akum simin, kumsawm le nga panin kum sawmlilenga ciang huam thei hi. Leitungah, khangnote pen sepna, bawlna namtuam ah a minamte, kingakna, kinepna le mailam khantoh nadinga khuamkip muanhuai bang a, belh le suante ahi uh hi. Tua ciangin, ‘Ka sunmang’ pen ‘mangkamin’ “In my dream” cihna ahi hi. Hih taka, “Ka ngaihsutzia” zong kici thei hi.

A thulu in leitungbuppi a, khangnote huam a, ka gennopna panin “Zomi Khangnote le ka sunmang hiam, ka ngaihsutzia mailam ah” cih ka gennoppi pen ahi hi. Hih tawh kisai-in thuluke tuamtuam i zatma-in mikangte paunak khat na lungsim sungah koihmasa in, hihlai simciat dingin ngaihsutna kong sung nuam hi. Tua paunak pen “You are the builder of a nation,” cih phawk ni. Nang pen “minam le gam kempa na hi hi,’’ ci-in kingaihsutna nei in.

1. Zomi khangnote aw, Khanglo in

Leitung ah minam khat in khantohna a neih ding ciangin piteek, puteek, nu le pate tung panin kipan masa ngei lo a, khangnote tung panin kipan hi. Tua ahih manin, kumzalom sawmnihlekhat a beima-in Zomi Khangnote aw bang ngaihsutna nei-in maciang suan dingin, na ngaihsun hiam. Nang le nang na kidong in. Hih kumzalom sunga na ngaihsutna pen a ngaihsunsun hi lo ding, a semkhia hih sawm in.

Tua hileh nang bek a khangto hi lo dinga, na minam a khangtosak na hi ding hi. Bang ah khangno khat in khantohna nei ding i hiam. Khantohna namkim genkhin zo lo ding hi hang. Itna tawh khantohna le Zomi buppi khantoh nadingin hiang tuamtuam panin “ke’n bang sem leng,’’ ci-in khat leuleu in zong “ke’n bang sem leng …” ci-zel lehang, i mi, i sate sungah, a zawng, daipamte khempeuh kem zo ding hanga, Zomi khangno khanglo in cihna panin a khanglo kisuak ding hi.

2. Zomi khangnote aw, Zopau zang ngam in

Ka sunmangin ka ngaihsutsut ciangin Zomi Khangno khat in lungsim sungah a phawkhuai pen Mikang khatpeuh khualzin gamvakin a om ciangun amau’ pau “Mangpau” bek zang uh a, midang pau zangtheiphial leh zong zang vet lo uh hi. Tua bangin a om manun Mikangpau pen tuhun khang sungah leitung pumpi’ pau suak hi. (International Lingua Franca). Tua ciangin Paunak khat in bangci hiam cihleh “Language is Identity,” ci-a ke’n bel “Language is one and formost identification of each languages.” Tuhun khangnote aw Zopau hangsansak ni.

Leitung gamtampi ah tengta hanga Zomite pen mi mawkmawk banga kingaihsut hun nawn lo hi. Pau awsuah kician khat zang setset, paukhiat ziahziah hun hita hi. Kawlgama Zomite in Kawlpau, Luseipau le Paudangte sangin Zopau (Tedim) pen mite lakah zangkhia sensen ta ding hi hang. Bazal (Zii) kai ciangin, Sai-ngak ciangin, Hotel ngak ciangin, Kawlezi (College) i pai ciangin, Univalsiti (University) kah ciangin, Hotel ah i om ciangin, Zato-inn ah na sem in, Zato kah ciangin, ka sunmang ka ngaihsutna bang hileh Zopau (Tedim Awsuah) tawh mi hopih masa ding hi hang. Na pau zumpih kei in.

Na pau hangin Pasian in hong lamto nuam a, i pau pen a zang dingin Pasian in hong bawl hi a, Pasian in mi’ pau i siam mana hong pakta hi lo hi. Zopau (Tedim Awsuah) a i pau ciangin Pasian lungkimzaw hi cileng kikhiallokha ding hi. Na pau hangsansak in.

India gam, America gam le gamtuamtuama om Zomite’n zong minam neu i suahloh nadingin Zopau (Tedim Awsuah) mah zangin minampi suahsawmin mabang pat hun hita hi. Minam dangte’n hong khennen zawhloh dinga lungsim i neih ciangin nation kihi pan ding hi. Gam tuamtuama om Zomi Khangnote aw, Zopau zang ngiatngiat ni. Zopau hangsansak ni. Hehna, thangpaihna i neih ciangin Zopau tawh paukhia, awngkhia bek hi loin, lungnop sinnop-a i om ciangin Zopau tawh mite (minam dangte) kiangah a pau ngam awngkhia ngam pau ziahziah ngam dingin Zomi Khangnote aw na pau (Zopau) hangsansak in.

Tua ciangin, nang Theologian khat na hihleh thugen mikhat hi ding na hih ciangin Kawlgam, Vaigam, tuipigal gamte ah na om leh zong, Mang Lai Siangtho zang masa loin Zo Lai Siangthote mah zang masa inla, tua ciangin Mangkamin letkhia/mang Lai Siangtho tawh simin, nang Zomi Khangno khat Theologian na hihleh, na Zopau zahpih kei inla, hangsansak in.

I pau in thupha a ngahtheih nadingin zat tam leh minam dangte’n a zak tamsak mahmah ding kisam hi. Na pau na zahpihleh nanglenang a kizahpih suak ding na hih manin, mangthang ding hi teh. Minam mangthang i suahloh nadingin i omomna, i sepnana, i tennana ah, zat hamtang ding hanciam ni. Na pau (Zopau) hangsansak in.

3. Zomi khangnote aw, Zongeinate le Zongeina puante

Minam dangte’n hong zatpih dingzah in, silhin, zangin, tualtelsak ding hi hang. Zomi khangno khat na hihleh Zongeinate, Minam dangte’n hong dot ciangin, a gen thei dingin thei inla, na theihlohte Zomi a theite kiangah dot ding hanciam inla thei in. Gtn: Leitung ah minam a mangthangte pen a ngeina uh a thudonlote le a theilote ahi hi.

Zomi khat in, a mangthang ahih nop keileh, Zongeinate le Zopau Zopuante a letkip nakleh mimangthang kisuak lo ding hi. Zongeina ah zuhawm, sahawm nopni, dahna, kiteen, kipinate in, zatzia tuamtuam kinei-a, tuate, Zomi khangnote aw, kankhia-in zuih ding hanciam ni.

Zongeina puante

Zomi khangnote aw Zopuante, i tenna, i omna, i sangkahna, Kawlezi kahna, Univalsiti kahnate ah “tualtelsak ni”, Silh ngam ding hi hang. Mite hong simmawh nadingin zang lo leuleu ding hi hang. Bang hang hiam cihleh, Pasal puante gen ni.

(a) Tangcing:

Hih Tangcing puanza pen numei in silh mawkmawk ding hi lo hi, cih phawk ni. Khanglui lai-in, Pasal khempeuh in silh thei lo hi. Sahang, Sai, Humpi le galman, saman, gal-ai, sa-ai, tang-ai, a tongte bek in silh in, a sih uh ciangin, keng thei uh hi. Tuhun ciangin, hih a tunga kigente hun hi nawn lo ahih manin namthumin khen ni.

Siamsinna lam ah, Tan sawm zawh ciangin silhin, nektai-in zangin, Lai Siangtho sang mante G.Th tungsiah in zangin, silh in, sum zong pai zongte zong, ahau a min dawkdeuh, veng sung Hausa upa, Biakna pawlpi upate in silh in, pasal khempeuh in silhmawk kei lehang kilawm in, mite in (minam dangte) hong simmawh lo ding. Zogam le Zomite tennana ah minam dangte in paizia, ngeina a lenkip Minamin hong thei kawikawi ding uh a, zahtakna hong pia in, minam vangnei kisuak ding hi.

(b) Puanlaisan:

Hih puanlaisan zong numei in hong silhpih kei hen. Zomi pasal khempeuh in silhtheih ding (common traditional cloth) puanza ahi hi. Sihna nopna pawite ah pasalte’n silh ding hoih hi.

(c) Angki:

Zopuannak pen pasalte bek mah in silh ding kilawm hi.

Numei puanngeinate:

(a) Puandum, (b) Khephiau, (c) Zonik, (d) Zonikvom, adangdangte numei puan ngeinate pen Pasal in pheituamin zat hetloh ding ahi hi. Pasal na hih leh zang vet kei in. Numeite in zong Zonik, Zonikvom, khephiaute pen nik ahih manin puan-ak khawngin khui a, silhloh ding ahi hi. Silh ding numei ngeina puan om hi cih phawk ni. En hoih i sak hangin minam dang Zongeina a theikha kiukiaute’n i minam hong simmawh ding hi. Kidawm ni. Zongeina le Zominam puante, a zat nading mun le ahihna bangin Zomi khangnote aw, zattheih sawm in, silh in, zun in, zang ni.

Thukhupna:

Zomi Khangnote aw, ihihna zahpih lo ding, mite lakah Zopau, Zongeina le Zongeina puante a zang ngam dingin, lungsim hanciamna belin nei ni. Minam dangte kisimmawhsak lo, e’n zong minam dangte simmawh lo ding hi hang. Mi’ pau zang masa loin Zopau zat masak ding hanciam ni. Mi’ pau siam ding kisam masa lo-a, Zopau siam ding hanciam ni. Hih thu phawk in, ”Zopau siam masa loin, minam dang’ pau kisiam thei lo hi.” Zomi Khangnote aw, lungsim kikhat in, maciang suan ding hi hang. S. Dal Sian Pau (Senior Resource person, Central Institute of Indian Languages, Mysore)