Kha Siangtho Lawnna le Pianthakna (Regeneration and Conversion)

Kha Siangtho Lawnna le Pianthakna (Regeneration and Conversion)

Mark 1: 15 – Upna le Kisikna (Faith and Repentance)

Regeneration pen “Suahkikna” kici zaw hi. Ahi zongin tua suahkik theihna pen Kha Siangtho in hong lawn ciang bekin a kisuak kik thei ahih manin a tamzawin ih tel theih ding khualna tawh Kha Siangtho lawnna ci-in ka hong zang hi. Tedim labu 185na ah hih bangin na kisa hi, ‘Kha Siangtho in mihing lungsim hei, mawhna hong phawksak thei’ na ci hi. Tua Kha Siangtho’ lawn mite piangthakte kici hi. Topa’ Kha Siangtho in a lungsim hon saka Lydia in zong Paul’ thuhilhna um in na piangthak hi, cih thu kimu thei hi (Sawltak 16: 14). Pianthakna pen Kha Siangtho’ lawnna ii a gah ahi hi. Pianthak ding pen eimau mawhpuak hi a, ong lawn ding pen Kha Siangtho’ nasep ahi hi. Conversion is the fruit of regeneration and regeneration is the work of God.

Pianthakna ih cih

Hih kum zalom 21 khat hun sungah thuhilhsya tampi takte in mihing kisap Thu sangin mihing duh le deih (felt need) thu gen bel in nei uh hi. Na tate pen mi’ tate sangin koici bangin gual tung tuang sak thei ding? Na lungkhamna teng koici bangin veng sak thei ding? Koici bangin sum zong ding? Koici bangin sum zek ding? Bangci leng daupai thei ding? Inn hoih lo hoih nei thei ding? Lawh cing thei ding? Cidam thei ding? Khansau thei ding? Thupha ngah thei ding? Hau thei ding?

Bangci bangin kipawl thei, kipumkhat thei ding? Bangci bangin minam lian suak thei ding? Bangci bangin hamphatna ngah thei ding? Bangci bangin pil thei ding? Khangto thei ding? Mite tawh kizom thei ding? Bangci bangin leitung kumpi namte suak ding? Bangci bangin sum bawl sum zuak siam ding? Bangci bangin kim le pam zuun ding? Bangci bangin mailam thu ding geel khol ding? Cih (felt need) thute bekbek tawh pulpit hong luah ziahziah ta uh hi.

Hih bangzia thuhilhnate pen Paul in lungdamna thudang na cih san hi. “A taktak in ci lehang lungdamna thu adang a om hi lo a, mi pawlkhatte in note’ lungsim hong toknawi-in, tua amau’ deih thu pen lungdamna thu a cihsak mawkmawk ka hi hi,” na ci hi. (Gal. 1: 6,7). Hih thute pen a gen siam mahmah khat in ong gen zakzakin a zak nop mahmah phial hangin Lungdamna thu the Gospel taktak na hi lo gige hi. Lungdamna taktak pen khang khat thu bek hi loin tawntung (eternity) tawh kisai thu ahi hi. Lungdamna Thu ih cih pen “Kisikna le Upna Thu” hilhna ahi hi. The gospel is “repent and believe”.

Natna ih neih khit ciangin Syavuante in ih natna hong muh sak kei leh a lungdam huai lo zaw ahi hi. Ih natna mukhia zo lehang tua pen a dam nading lampi kimu thei a, a lungdam huai thu (good news) hong suak kik hi. Tuamah bangin mawhnei mi khat in a mawhna za ah za kiphawkin, hong kitelmuh tak ciangin kisikna piang thei pan hi. Amau le amau dik a kisa 99 te sangin a mawhna a kisik mawhnei mi khat’ tungah lungdamna lianzaw hi (Lk. 15: 7). Lai Siangtho in Pasian’ vantung mite mai ah mawhnei mi khat a kisikna hangin vantung ah lungdamna lian mahmah hi na ci hi (Lk. 15: 10).

Obama kumpi a suah manin vantungah lungdamna kiciamteh hi na ci lo hi. Mawhna kisikna ah lungdamna lian penpen hi. Mawhna kiphawkna ah kisikna piang thei bek hi. No repentence no forgivenness. Mawhna kiphawk loin kisik thei lo a, kisik loin mawhna mai thei lo hi. Mawhna thu ih biakinn sungah a kihilh hiam? Ahih kei leh ei le ei kidik bawlin, kipahtawi-in, kilungkim sak mahmah thuhilhnate bekbek ih kitulhtulh ih kibakbak hiam? Mite in thumaan a ngaihnop loh hun, amaute’ deihna bek a zuihnop hun, amaute’ zaknop thute bek a gen ding sya a cial thuahthuah hun hong tung ding hi (2 Tim 4: 3).

Paul in hih bangin na gen hi, “Mite’ pahtak ding a ut ka hi kei a, Pasian’ hong pahtak ding a hanciam ka hi hi. Mihingte’ hong pahtak theih nadingin a gamta hi zenzen leng, Khrih’ nasem ka hi kei ding hi” na ci hi(Gal. 1: 10). Lawm nang e leh, bangteng peuh gengen na hia? Thei mahmah ih kisa phial zongin Mawhna thu a dong ciangin ih kihilh siam nai het kei uh hi. Kimawhsakna thu peuh, khat le khat phu kilakna, kimawhsakna tawh pulpit khawng zat ding hi lo beka, mawhna thu bel Pawlpi in a suutsuut ding a kul ahi hi.

Mawhna thu hilhna daatmaan tawh (X-ray) ih kizaih ciangin ih natna kimu thei pan bek hi. Tua bangin ih kimuh theih leh a lungdam huai (good news) ahi hi. Tuni a thuhilhnate in mawhna thu hong kimu thei sak zo lai sam hiam? Kisit tel ni. Ih khutmee khat tawh mi ih mawh sak laitakin ih khutmee a dang li tengin ei hong kawkkawk lai mawk veh e!

Kisikna le upna pen pianthakna ah kimu thei hi. Kisikna a pian theih nadingin mawhna thu ah ki-muh kul hi. Mawhnei mi na hih lam na ki-muh ciangin tua kimuhna in Khrih sungah Upna na kisap lam ong tel sak ding hi. Tua upna vangliatna sungah kisik theihna piang hi. Lai Siangtho sungah upna na-ngawn Pasian’ letsong hi, na ci hi. Faith itself is the gift of God (Eph. 2: 8,9). Upna tawh kisikna a pian theih nadingin Kha Siangtho’ lawnna na kisam hi.

Ahi zongin tua Kha Siangtho in bangci bangin hong lawngin hong hei hiam cih thu pen Lai Siangtho in hih bangin na gen hi. Huih zong a utna peuhpeuh ah nung a, a huging na zak theih hangin koi lam panin hong nung a, koi lamah nung ahi hiam, cih na mu thei kei hi. Kha tawh a suak mite zong tua mah bang ahi hi, na ci hi (John 3: 8).

Lamdawt tawn Upna (Easy believism) kidop huai

Kisikna le upna (Faith and Repentance) bulphuh mel khol lopi-in a tunga ka gen thu dangdang teng peuh tawh a piangthak a kisa mite in amaute adingin Khrih in bangteng sepsak khin hiam cih a laigil taktak thute ah a na kician nai ngiat lo mite na hi hamtang ding uh hi. Hih bang mite pen lungdamna thudang (another gospel/a different gospel) ahilh thuhilhkhial syate ii a gah hi mawk uh hi (Gal. 1: 8-10). Gupna koici ngah ding?

Mite in a up baih theih nading un, hong pianthak mengmeng theih nading un ci-a kizol bawl gawp, gupna khawng hawm bawl gawp, kipia gawp, gup ngah mi kitang sak gawp, khensatsakna crusade pi khawng bawl gawpna tawh mihing’ min le za adingin a kipia gawp (forced conversion) pianthakna pen lamdawt tawn upna kici hi (Easy believism = Decisionism, alter call, methods).

Hotkhiatna (Salvation) pen Pasian’ nasep ahi hi. Pasian in na nuntakna ah na hong sem hiam? Pasian Kha Siangtho’ ong lawnna pen Lai Siangtho kammal tungtawn ahi hi. Pasian’ kammal tawh piangthak na hiam? Ahih kei leh mite’ hong thuzawh gawpna le lungsim kibumna (emotional conversion) tawh a piangthak kha peuh na hiam? Kisit tel in. Na pianthak zia (your conversion experience) ki-en kik in. Khat le khat ih pianthak zia kibang sitset cih bang om thei lo ding hi. A kibang khat om a, tua pen upna le kisikna (faith and repentence) ahi hi.

Nau suah zia zong kibang lo hi. Pawlkhat inn ah suaka, pawlkhat zato ah suakin ki-at hi. Pawlkhatte a lo kuanna lampi ah suak thei hi. Pianthakna ah a kibang sitset thei lo tuahkhak thu (conversion experience) bulphuh luatna pen ei le ei kikhemna piang thei nuam mahmah hi. Conversion experience is deceitful. Tuahkhak thu ka cihteh, tua ni tua kha, nai tua zah hun in cihte pawl hi. Ih tuahkhak zia (conversion experience) kibang lo ahih manin tuahkhak thu bulphuhna pen kizang kim thei lo hi.

Pianthakna maan ih cih pen a beisa tuahkhak thu ah kinga zaw loin nisim nuntakna ah a kilang ding hi zaw hi. It must be a conversion of life style. Tulaitak na nuntakna in piangthak mah ingh, hong ci sak hiam? Cih bulphuh ding hi zaw hi. Tuahkhak thu bulphuh ding hi lo a, nuntak pih thu bulphuh ding pen Pianthak zia maan hi zaw hi. Converted life /not conversion experience.

Topa Jesuh’ taklam a kikhai gutapa’ pianthakna en lehang a beisa thu a bulphuh ding khat zong nei lo hi. A beisa thu bulphuh lo ding ka cihteh eimau le eimau tuahkhak thute kibulphuh lo ding ka cihna hi a, a beisa pan Khrih le a Singlamteh Tatkhiatna hanga gup ngah kiciatna thu bulphuh lo ding ka cihna hi lo hi. Amah bulphuh ding, ei le ei thu kibulphuh lo ding cihna hi. Singlamteh tungah a kikhai laitak in a piangthak hi zen hi.

A beisa hun ah a mawhna kiphawkin Khrih hong tatkhiatna Singlamteh thu a kisap lam kimu thei hi. Tulai hun a Christian minpua mi tampi takte in hih hun tomno sunga gutapa tel zah in kisikna tawh pianthakna thu tel vet lo kha ding uh hi. Singlamteh tung panin a piangthak hih gutapa’ pianthakna pen thuk in zai mahmah ding hi. Banghang hiam cih leh Topa’ veilam a kikhailum gutapa in hih thu thei ban vet lo hi.

Topa’ Kha Siangtho’ lawnna a ngah mipa in upna le kisikna (repentance and faith) ii a thukna le a zaina mu thei hi. Kha Siangtho’ lawnna tawh suahkikna (regeneration) pen khatvei suah a tawntunga kimang thu ahi hi. Regeneration is a one action for all time. It is a single act and never repeated. Mihing a kiphasakte in radio in a gensa thu gen kik lo ci thei se uh hi. Pasian bel a kipha sak hilo napi, a sepsa sepkik kul sak ngei lo hi. Kha Siangtho’ lawnna hanga ih ngah pianthakna pen maban a nei a nungta a gamta pianthakna ahih kul hi. Conversion is a progressive one – 2 Cor 3: 18.

Topa Jesuh ong paikik ding ngak kawma pianthakna pen gah pha hamtang ding hi. Conversion is a continuing work until glorification. Pianthak theih nadingin tua kisikna (repentance) pen ih nisim Christian nuntakna ah a kimu thei ahih ding kisam hi. Na Christian nuntakna ah kisik mel na pua hiam? A kiniamkhiatte a kisikte ahi uh hi. Na nuntakna ah thungen lasa in a kikhawm mi na hi hiam? Topa’ thuhilhnate a nuntakpih mi na hi hiam? Repentance is a daily attitude of Christian life.

Lai Siangtho thu a tel semsemte in Lai Siangtho simna sungah thuk lut semsem ding hi. Mawhnei mi na hih lam a Siangtho Pasian mai ah na kitel semsem ciangin na nisim nuntakna ah kisikna gah na gah pha semsem dinga, a picing a khangcing Christian na hi semsem ding hi. A kisik nuntakna nei nu/pa pawl nuam a, a kisik lo nuntakna nei nu/pa thuak hak hi. Khuamialna ah puan nin kilang khol lo a, khuavakna ah puan nin kilang semsem hi.

Mawhna hanga khatvei a kisikna hanga pianthakna tawh a nisim nuntakna ah kisikkikna a ngah pa’ nuntakna khum zungzung hi. Mawhnei mi hi lai ih hih manin ih nisim nuntakna ah khatvei kisikna hanga tui kiphumna tawh ih pianthakna hangin ih nisim nuntakna ah kisikkikna a pian theih nadingin thu ih nget tawntung a kul ahi hi. Piangthak lote’ thungetna ah mawhna kimaisak thei ngiat lo a, piangthaksate thungetna ah mawhna kimai sak pahpah hi.

Mawhna a mai pahpah theih nadingin a kisam thungetna ih ngah theih nadingin pianthakna kisam masa a, tua pianthakna pen kisikna le upna tawh piang thei bek hi. Mawhnei mi mawhna hong kimaisak (forgiven sinners) te hi lai ih hih manin ih nuntakna ah a kisik paisuak pianthakna ih khuasak pih a kul ahi hi. Mawhna ka nei kei hi ih cih leh eite a kineihkhem ih hi a, eite a thutak lo ih hi hi (1 John 1: 8). Ih sungah mawhna gu cian lai hi. Ih dinmun kilaih in midiktang te ih hi beka, mawhna ih sungah cian lai hi. Sihna ah mawhna a vui siang pan ding ih hi. Tua ahih manin mawhna na thah kei leh mawhna in nang hong that ding hi. Piangthakte pen mawhna a that thatte ih hi lai hi, cih kiphawk ni.

Ahi zongin a nunlui ngeina ah a bualkikte a piangthak taktak lote ahi uh hi. Paunakah, “Ui in a luak nekik hi,” a cihna le, “Vok a kisilsiang khit ciangin buannawng lak mahah bualkik veve hi,” a kicihna thu, amaute tungah a piang ahi hi (2 Peter. 2: 22). Luak nekik cih pen piangthak kineihte’ pianzia (Paunak. 26:11) a genna hi a, vok a kisilsiang khit ciangin buannawng lak mahah bualkik veve cih pen tua bang mite gup ngah bang keekin om uh a, tua bang mite pen a luak nekik ui tawh ahi zongin vokpi bangin a kibualna lui buan lak ahi, tua leitung ci le sa nate’ deepna sungah kibualkikna tawh amaute pen a kipatcil himhim pan kipanin Kha Siangtho’ lawnna maan taktak a na ngah kha lote, piangsualte ahi uh hi.

Tua ahih manin “Tatkhiatna pen kingah takpi thei lo a, kitan takpi thei lo hi,” ka ci nuam hi. Pukna (Apostate) le nungtolhna (backsliding) kibanglo hi. A puk ih cihte pen a kipatcilna uh ah amau le amau a kikhemte hi khin zo uh hi. Gupna taan cih pen a kipatna thu tawh a kisai thu hi zaw hi. Hih thu tawh kisai in Hebrews Lai Siangtho 6: 1-6na sungah na hilhcian hi. Kum zalom 21 hun sungah Crusade a kibawl sima piangthak a kici kikkikte tawh kivalak ka sa mahmah hi.

A langkhat leuleu ah thu-um mi piangthak taktakte zong bel nungtolh thei kha mah ding uh hi. Ahi zongin hih nungtolhna le pianthakna thu kisai kik nawn lo hi. Lai Siangtho sungah ka midik mi a tuk hangin ka phong kik ding hi a cih mah bangin Tatsa mite ih pukkik ngei kei ding ta zongin pawlkhat pen kinungtolh kha ding hi cih zong a theih huai thu khat ahi hi. Peter in zong Topa na nial kha zel hi. David zong mawhna sungah na bual kha zel hi. Hih thu ah nungtolh ding kihanthotna hi loin thu-ummite’ pianzia maan a gen ih hi bek hi. Ahi zongin a tawpna ah kisikkikna hun lap tawntung ding uh hi.

Hih laimun ah a nungtolh (backsliding) mite adingin Lai Siangtho in hih bangin gen hi, “Ahi zongin Pasian kiangah ih mawhnate va pulak lehang, amah citakin thuman ahih manin, ih mawhnate hong maisakin ih hoih lohnate khempeuh hong siangsak ding hi” (1 John 1: 9). Ahi zongin a puk (apostate) mite’ adingin Lai Siangtho mun om nawn lo hi. Thu-ummi piangthak taktak khat pen za ah za mawhkik thei ding hi. Mawhna khat ih bawl ciangin za ah 70,80,90 cih bang om tuam lo hi. Matthew 6: 9-13na mun pen piangthakte thungetna ahi hi. Puk (apostate) cih le tuk/nungtolh (backsliding) cih thu kibang lo hi.

A puk ih cihte pen puk cih ding hi lo zawin a piangthak vet lo gigete cih ding hi zaw hi. Kisikkikna ih cih pen khangtawntunga ih puak ding vaipuak ahi hi. Tua kisikna hanga pianthakna tawh kisikkik zelzel theihna thupha pen Kha Siangtho’ lawnna pan in ahong kipan ahi hi. Conversion is the effect of regeneration. Repent and believe the good news/the gospel. Up ding le kisik ding pen tel ding thu hi loin, sawlna hi. It is not an option, it is a command (Mark 1: 15; Matt 3: 2; Sawltak 2: 38). Hih thu lo tawh mi khat nuntakna ah kikhelna lian le pianthakna maan piang thei ngei lo ding hi.

Ei Christiante,

Mawhnei ka hih laitakin Kha Siangtho in ong lawng ahih manin mawhna kiphawkin kisikna le upna tawh ka piangthak hi. upna le kisikna (faith and repentance) pen a kikhen theilo sumtang a bang hi a, ahi zongin upna pen a maidawk zaw hi. Faith precedes repentance. Ih up manin a kikhensat thei ahi hi. Lai Siangtho sungah gupna pen khensatna tawh na ci lo a, upna tawh na ci tawntung hi. Na khentat khit theihna pen na up man na hi gige hi ei lawm! Ei zong mawhna hong kimai sakte ih hih manin mite’ mawhna zong mai sak ni.

Pianthakna thu a umte ih hih manin mite’ zong a piangthak uh ciangin kei mah tawh kibang ahih manin ka telsiam mahmah kul ding hi. Lai Siangtho sungah midangte’ tungah thu na khen kei un ci hi (Matt 7: 1). A piangthak mi ciat in ngeina lui nei hi. Tuate tawh kimawh zonzon ding hi nawn lo hi. Piangthak mite in pianthak ma in a kituaci mah hi, pian thak khit ciangin a tua ci ding hi cih thu bulphuhna tawh ih pianthak pihte ih muh theih kul hi. Mipawlkhatte in tua pa/nu a pianthak hangin nidangin tua ci gamtat hi cih bulphuh uh hi. Tua bang thu a bulphuhte in pianthakna thu tel nai lo uh, cihna hi lai hi. Pianthakna thu a tel ei thu-ummite in midangte’ pianthakna zong san sak ni, theihpih ni, cepteh pih ni. Eimau mah bangin pianluizia a nei mite hong piang thak uh a, eimau mah bangin pianthakzia a nei mite kilamdang hamtang ta ding hi cih kimuh pih ciat ni. Evan. Suang Dal