Kha Siangtho Kuacik Suah kei ni

Kha Siangtho Kuacik Suah kei ni

Kha Siangtho Sunga Kipumkhatna Kuacik sak kei ni (Gal. 5: 22-23)

Hih hun nunung ah ahi lo ahi ih sak hong tam nuamzaw ta hi. Gentehna in an neng kiatsuah sa top kik sangin ih kiatsuah ma-in kiatsuah loh ding cih thu a thupi zaw hi na pi in, Zomi te in an nengkia tawmkik cih kithupi sak kha zaw zel hi. Tua ahih manin a kiatma hun sangin a kiat khit, a nat khit a sih khit hun thupi sazaw ih hih manin a kia sa na peuhmah ih tawm nuam valval uh hi. Sapul omna ah musane kikaikhawm a cih kibang zel hi. Zomi Christian te sungah Jesuh maw a Thupha ih cihcih hangin, Thupha gen ciang bek a thei Pastor kitam zaw zek lai hi. Zomi te in Upna thu ih gengen hangin eimau zuihzawhna le itzawhna thu mah ih bulphuh kha zelzel lai hi. A taktakin kuamah in zuihzawhna le it zawhna tawh Gupna ngah ngei lo ding hi. A it zo lo ih hihna thu ih kitel ciangin a it zo nuam ih suak thei pan ding hi. Ei mawhneite adingin itzawhna thu Hehpihna hanga Jesuh’ sungah upna bek tawh kipia hi.

Ih nuntakna ah ahi lozaw a thupi lozaw thute thupi sakzaw, amaan lozaw pen a maanzaw sa, ahi lo zaw ding thu teng a hi zaw ding sasa kha thei zel hi hang. Tua bang thu kihilhna sung pan a khangkhia Christian pawlkhat in Kha Siangtho’ nasepna kuacik sak uh hi. Kha Siangtho kuacik sak ka cihteh amah le amah in a kuacik cihna hi lozawin, eimau sanzia pomzia kuacik lua ka cihna hi.

Lai Siangtho siksanin Pa Ta Kha thu ih et ciangin Pa’ hun, Ta hun Kha Siangtho hun ci-in khenna ih thupi sak mahmah uh hi. A taktak in ken kong gen nop in ah Pa Ta Kha in a tawntung pan tawntung dongah nasem khawm den uh hi. Piancil in Pa Ta Kha mah in na sem khawm uh hi. Tuamah bangin hotkhiatna thu ah zong Pa Ta Kha in sem khawm tawntung uh a, Pa bek Ta bek Kha bek in sem cih bang hi lo hi. A hun ih khen mah bangin a nasep puak uh khen huai zaw lo diam? Pa in hon a, Ta in Tan in, Kha Siangtho in gum hi.

Salvation pen hotkhiatna kici hi. Redemption pen tatkhiatna kici hi. Sanctification pen Gupkhiatna kici thei hi. Pa Ta Kha in hong honkhia hi. Pa Ta Kha in hong tankhia hi. Pa Ta Kha in hong gumkhia hi, kici thei hi. USA le a pawlte in ISIS te khut sungpan micimawhte honkhiat hi cihdaan in zong kizang thei hi. Ahi zongin Lai Siangtho’ gen hotkhiatna pen tua sangin tangzai zaw hi. Hotkhiatna pen a bulpi mawhna pan hotkhiatna ahi hi. Mihingte pen mawhnei mi ih hihna pan hotkhiatna kisam hi (salvation from the guilt of sin). Mawhna ii a vangliatna sung pan hotkhiatna kisam hi (salvation from the power of sin). Ih nisim nuntakna mawhna tawh kidiahna pan hotkhiatna kisam lai hi (salvation from the presence of sin).

Hotkhiatna pen Pa Ta Kha in semkhawm den hi. A taktak in Pa’ hun Ta’ hun Kha hun cih daan hi lozaw a, Pa’ sep Ta’ sep, Kha’ sep om cih ding hi zaw hi. Pa in honkhia cih ciangin, seh, geel, teel cihna hi. Ta in honkhia cih ciangin tangmi sem, palai sep sak, a nuntakna le a sisan tawh tankhia cihna hi diak hi. Kha Siangtho in honkhia cih ciangin siansuah, lamlak, gumkhia cihna hi diak hi. Hotkhiatna (Salvation) tawh kisai ah Pa’ nasep pen geel-seh-teel hi diak a, Ta’ nasep pen tan hi in, Kha’ nasep pen gum ahi hi. Pa Ta Kha in hon-tan-gum hi.

Tatkhiatna thu om lo hotkhiatna pen a si ahi hi. Jesuh ong tatkhiatna om lo gupna thu le hotkhiatna thu pen a pualam biakna thu ahi hi. Tatkhiatna redemption tawh kisai ah upna tawh dikna (Justificatin by faith) a thupi mahmah ahi hi. Tua hi a, Tatkhiatna le diktanna kikhen khia thei lo hi. Hehpihna hanga upna bek tawh ih ngah diktanna pen Jesuh’ ong tatkhiatna Singlamteh tung bekah piang hi. Ih theih dingah hotkhiatna le gupkhiatna bucing pen tatkhiatna hang bek ahi hi. Tapa Jesuh nasep tatkhiatna hangin mawhna panin gupkhiatna le hotkhiatna a piang thei pan ahi hi. Huhpa Kha Siangtho’ nasep pen tatkhiat hi dih nawn loin gup ding hi ta hi. Jesuh hangin gupna a piang thei hi a, tua gupna a piantheihna pen tatkhiat nasepna hang ahih manin Jesuh tawh kisai ah tatkhiatna thu bulzaw hi.

Hot Tat Gup tawh kisai ah tulai Limsang te in Jesuh bek bulphuh bilbel uh a, Jesuh in honkhia tankhia gumkhia, Honpa gumpa ci uh hi. Khialhna bel om sam lo hi. Ahi zongin Pa’ hun Tapa’ hun Kha Siangtho hun ci-a hun a khen keeinazah uh tawh ngaihsun lehang kituak lo hi. A hun ih khen keei sangin a nasep (office) uh tel lehang kipicing zaw ding hi. Pawlkhatte in thumgawm Pasian pen tui+tuikhal+tuikhu bangin a genteh bangin tulai Limsang upna in zong hot tat gup thu tawh kisai ah Jesuh bek suah uh a, Pa le Kha bei sak uh hi (Gentehna. Pa Ta Kha pen tui a suah hun om, tuikhal a suah huh omin tuikhu a suah hun om cihbangin hilhkhial uh hi). Huhpa Kha Siangtho’ nasep pen huh, siansuah, gum hi zaw deuh hi. Tapa’ nasep pen tatkhiat ahi hi. Huhpa Kha Siangtho pen Pa le Ta in hong sawl hi. Nasep zia tel huai zaw a, hun tawh buai ding hi lozaw hi. Amau’ nasep ciat om hi. Tapa bekin hot tan gum hi loin Pa Ta Kha in hontangum ahi hi. Ahi zongin Ta sep diak pen tankhia ahi hi. Tanpa le Topa ahi hi.

Pawlkhat te in Kha Siangtho thu suutsuut in hoih sak mahmah sam uh hi. Kipumkhatna ding bulphuh in Kha Siangtho paulap keei sam uh a, ahi zongin a Kha Siangtho thugen uh a khupna pen kuatoi kuacik sak lua mahmah thei uh hi. Kha Siangtho hun ci keei sam napi un, Kha Siangtho nasep ding om sak ngiat lo uh hi. Kha Siangtho pen amau’ nasem suah bek mawk uh hi. Gupkhiatna nasep ahi (Sanctification) pen Kha Siangtho’ nasep tang sak nuam peuh mah lo uh hi. Kha Siangtho pen eite ong gum dingin Jesuh Khrih in ong kaciam pen ahi hi. Huhpa Kha Siangtho in tatsa mite gum hi. Tua pen Kha Siangtho’ nasep huhna thu ahi hi.

Tua hi a, Jesuh pen gupna a piangsak pa hi mah a, ahi zongin tanpa ahihna bul zaw ahih manin Jesuh pen Tanpa le Topa cih ding hi zaw hi. Pawlkhatte in Kha Siangtho sungah kipum khatna gengen na pi in, Kha Siangtho ong siansuahna ong gupkhiatna ahi Galati 5: 22-23 thute sungah kipumkhatna tawh khup loin, lamna dianna le pukna sunga kipumkhat nading ciang bekin Kha Siangtho sunga kipumkhatna thu hong suut uh ciangin Kha Siangtho a kuacik suah sak uh ahi hi. Kha Siangtho sunga kipumkhatna pen lamna dianna tukna, hugin ngaihna, Pawlpi paizia (movement) le haleluijah sawmvei za vei cihna ciang bekah kuacik lo a, Galati 5: 22, 23 tawh kidim zah dong dingin thuk in zai ahi manin, Galati 5: 22-23 sunga kipum khat dingin Kha Siangtho sungah kipumkhatna tangzai sak ni. Kha Siangtho sunga kipumkhatna kuacik sak kei ni. Evan. Suang Dal