Kha (6) nuaisiah naungekte tui piakbeh kullo ~ Hau Lun

Kha (6) nuaisiah naungekte tui piakbeh kullo ~ Hau Lun

Kha (6) nuaisiah naungek te tui pialo ding cihna-in naungek te tuidat kisamlo cihna hilo hi. Nu nawizu ahkl naungek te ading aki bawl nawivui sungah tuidat aki cingin om khin ahihman in piakbeh kullo cihna hi zaw hi.

A golkhinsa te tui dawn bangin naungek tui pia lehang a kal (kidney) in tua tui teng lakhia zo nailo hi.A pumpi sungah tuidat le a-al dat ki kimlohna hong piangin tuival teng a khuak ah ki khol thei hi. Tuival a tam le a tawm tung ki nga-in a nuai-a bang damlohna tuamtuam piangsak thei hi.

• 1. Mai bawk/pawm sak
• 2. Nidang sangin ihmu mu sak
• 3. Ciinglo-in kapkap sak
• 4. Lua khia sak
• 5. A hangdang omlo in sibup sak
• 6. Sibup pahpah in si thei
• 7. A sih lianloh hangin khuak ciimlohna, bengngongna le lam siauhna satak te ki sia-in lampai theihlohna piangsak thei hi.

Kha (6) nuaisiah tui piak khakna pen ahang tuamtuam hang hi thei hi. Theihlohna hang, sum neihloh hangin nawi vui a bawl ciang aki ciangtanzah sang tui tam sak zawkna le nawivui bawl daan theihlohna hang zong hi thei hi.

Nu nawizu mah ahoih pen hi-a, a hang tuamtuam hangin nawivui a piak kul naungekte ading nawivui na bawlsak le, nawivui bangzah ah tui siang bangzah suung ding cih theilo pi-in mawk bawl kha kei in. Nawivui bung tungah a bawl daan ding limtak en in. Na tel kei le a tel Siavuan/siamah te tung ah dong tangtang in. Deihsakna tawh, Hau Lun Lam-etna