Kei na gal hi lo ~ Evan. Suangh Dal

Kei na gal hi lo ~ Evan. Suangh Dal

Kei pen kuama gal hi lo hing. Ahi zongin Topa’ kammal tawh kileh ngat-a thuhilhna khempeuh ii gal ka hi hi. Min than nopna hanga a post hi leng hih bang Lai nasep, lailet nasep tawh Lungdamnathu bekbek hih bangin hong post lo ding hing.

Kei kitang sakin mi a mawhsak nuam hi leng ka gen ding tam lua hi. Mite in kei hong gensiat ciangin ka heh ngam loh khinkhianna thu khat om hi. Amau hong gensiatna sangin kei na suksia khin khian lai zaw pek hing.

Thumaan thutak le Lungdamnathu ka post teh a mi a su kha a kawk kha a bang om kha zelzel ding hi. Ahi zongin ken a mi kuamah hong mudah hong el hong kawk tuam hi peuhmah ngei lo hing. No gal-in nong ngaihsun phial uh zongin kei adingin ka mission field na hi. Mission field -a ka zat Tongsan, Innpi Group le Zomi Daily te thupi kong sa mahmah a, muhna zai (အမြင်ကျယ်) kong sa hi.

Mi ka thusimna in comment te ka dawng tanghtangh-a amau kampau zia tawh kituakin ka thuk thei hi. Facebook ah ka active a, hong comment peuhmah like piakna tawh Facebook lim zat mahmah lel ka hihna thu like piakna tawh ka lak ngam hi.

Lawm (friend) pen hong invite te bek ka confirm, ka sang hi. Ken ka invite kei hi. Ahi zongin ka kilawm ka ki friend khit mi in bangbangin hong ko zongin, nawngkaai ka sa mahmah phial zongin, thuak zawhna kisinna in ka block ngei kei hi.
Nangh deih bangin kong it zawh loh hangin a mi bel kuamah hong mudah keng. Ahi zongin thumaan ka gen teh Lungdamnathu ahi banga ka genteh hong peel lo ding hi. Hong thei siam in. Kuama gal ka hih loh hangin Topa’ kammal tawh kileh ngat-a thuhilhna khempeuh ii gal ka hi hi.

Hun lap in ~ be in time. Hun maan in ~ be on time.

“On time” sungah “in time” kihel thei a, “in time” sungah “on time” kihel thei nawn lo hi.
Hi mah taleh Jesuh Khrih pen a hun lap (in time) in na san kei leh amah tawh tawntung na mangkhawm thei kei ding hi.

In time= cih teh hun maan nawn lo. Ahih hangh lap lai. Meileng zingsang nai 8:00 am a pai ding pen mi khat nai 8:5 am a tung. Hun maan nawn lo. Ahih hangh a kamphatna ah a meileeng zong tua zingsang nai 8:00am lian ah na pai khia nailo bilbel ahih manin a sungah lut khuan kipia lai. Tua pen lap lai kici hi. Hun maan nawn lo napi lap lai.

Topa Jesuh ziat lam-a misuam pa in hun maan takin ngah nawn lo napi a sih ma diakin Jesuh upna tawh hun lap liailiai lai hi. LST sungah a ziat lam (a taklam) cih kammal om lo hi. Ahi zongin koizaw bel cih genna lem lo ahih manin thu hoih zaw pen taklam (ziat lam) a kitang sak hi pong hi.

On time= cih teh hun lap bek hi loin maan taka lap ahi hi. In time= cih teh hun maan nawn lo napi lap lai na khat nei cihna hi.

Eite zong i kha tawh kisai ah hun a maan nawn lo tam pitak i om khin kha ding hi. Ahi zongin hun lap thei lai hi teh. Topa Jesuh a hun lap in Tanpa le Topa in sang in. Na “on time” kei leh zong “in time” thei lai hiteh. Evan. Suangh Dal