Kei hong hotkhiat manin hong sihlawh

Kei hong hotkhiat manin hong sihlawh

Mihaupa khat in tapa khat bek a nei hi. A gam ngeina uh tawh kizui-in galkap tum’loh phamawh ahihmanin galkap a tum hi.

Na sa pipi-in a tapa galkap a tum pen, a sawtna ciangin hong tung tading hi cih a lamen hi. Tua bangin a lamet-et laitakin tangval khat a inn vuah hong hawh a, “Na tapa hangsan mahmah hi; kei leh midang tampite’ nuntakna hong hotkhiatna lamah hong sihlawh hi” a cih kawmin, tua misipa’ lim a suaih pen pia in, “Lim suaih ka siam kei hi. Ahizongin hong hotkhiat ka lungdam’ lahna in, ka siamtawp-a ka suaih, hih na tapa’ lim a hi hi” a ci hi.

Tua mihaupa in a tapa ngai ngeungau-in, tua a tapa’ lim pen a en den hi. Amah a sih kuan ciangin a lawmitte khat thu a vaikhak hi.

A sihkhit ciangin, a neih a lamh leh a tapa’ lim, Liilaam dingin a vaikhak hi. Hunkhat ciangin mihaupa zong a si hi. A neihsa liilaam hun ding hong tung ta hi. Mun tuamtuam panin mihau, miliante a lei dingin hong tungtung ta hi. Inn leh lo, huan khempeuh ngah teitei a sawm tek uh hi.

A liilaam dingpa hong kipanin, a tapa’ lim kisuai pen a liilaam masa hi. “Bangzahin ngap na hi uh hiam” a ci hi. Tua hong pai mihaute’ huancingpa khat in, a neih zahzah hong lekkhia in, “Ke’n dangka 10 in ka ngam hi” a ci hi. Liilaampa in, “Kua in dem nuam na hi uh hiam” a ci leuleu hi. Mihau, miliante in tua pen thu in sim lo-in, a neihsa gamh tuamtuamte a ngak zihziah uh hi.

A dawng kuamah om lo ahihmanin, liilaampa hong ding to-in, huancingpa’ tungah tua lim a piak’kawmin, “Tu ni vai, liilaam’ ding teng ki zo ta! Hih gamh neipa in a tapa it mahmah ahihmanin, a tapa’ lim a leite’ tungah a gamh khempeuh zong piakhawm pah dingin hong vaikha hi. Tua ahihmanin tuni-a kipanin huancingpa’ tungah na khempeuh a ki-ap hita hi” a ci hi.

Kum tulnih val khinzo a, Van leh Lei a neipa in a Tapa khat neihsun hong sihsuah hi. Tua a Tapa a deih mi khempeuhte na khempeuh piak dingin a ciam’ hi. Tu ni dongin Tapa a deih na om uh hiam hong cici lai hi. Tdkhen